बेहुली लिन जन्ती लिएर जाँदा चार लाख जरिमाना तिरेर फर्किए बेहुला !

A+ A A-

जन्ती लिएर बेहुली लिन पुगेका बेला उल्टो जरिमाना तिरेर फर्किनुपरेको घटना सार्वजनिक भएको छ । झापामा बेहुली लिन गएका बेहुलाले सिन्दुर हाल्ने बेलामा हात नउठेपछि ४ लाख जरिमाना तिरेर फर्किनुपरेको हो ।

झापाको बुद्धशान्ति गाउँपालिकामा सिन्दुर हाल्ने बेला बेहुलाको हात नउठेपछि ढाँटेर विवाह गर्न खोजेको भन्दै तनाव सिर्जना भएको हो । झापाका प्रहरी नायव उपरीक्षक महेन्द्रकुमार श्रेष्ठका अनुसार भद्रपुर नगरपालिका– ७ का सुवेदी थरका एक युवक आइतबार बिहान बाजागाजासहित जन्ती लिएर बुद्ध शान्ति गाउँपालिका– २ बस्ने न्यौपाने थरकी युवतीसँग विवाहका लागि पुगेका थिए ।

बेहुली पक्षले विवाहका लागि सम्पूर्ण तयारी पूरा गर्दै जन्ती लिएर आएका बेहुलालाई वैवाहिक परम्पराअनुसार भित्र्याएर विवाह मण्डपसम्म लिएर गएका थिए। बेहुला मण्डपमा पुगेपछि बेहुली पनि मण्डपमा विवाहका लागि तयार भएर गइन् ।

तर बेहुलाले बेलुकीको सिउँदोमा सिन्दूर हाल्ने बेलामा उनको हात उठेन । ‘बेहुलाको हात माथि नउठेपछि उनी शारीरिक अशक्तता भएको बेहुली पक्षले थाहा पाएका थिए । त्यसपछि विवाह रोकियो र बेहुली र बेहुला पक्षबीच विवाद सुरु भयो । बेहुली पक्षले जन्ती लिएर गएको गाडी तोडफोड गर्न खोजेपछि उत्पन्न विवाद र तनाव रोक्न इलाका प्रहरी कार्यालय बुधवारेको टोली घटनास्थल पुगेको थियो ।

प्रहरीले सो घटना साम्य पारेर फर्किएको उनले बताए । तर, आर्थिक लेनदेनमा प्रहरी साक्षी नबसेको उनको भनाइ छ। बेहुला पक्षले भने बेहुली पक्षलाई चार लाख रुपैयाँ जरिमाना तिरेर फर्किएको बताइएको छ ।

बेहुलाले आफू डाक्टर भएको भन्दै युततीसँग प्रेम सम्बन्ध गाँसेका थिए । तर, उनी डाक्टर नभएर अस्पतालमा काम गर्ने कर्मचारी भएको बताइएको छ । प्रेम सम्बन्धपश्चात् दुवैको मन मिलेपछि उनीहरू विवाहका लागि तयार भएका थिए ।

टीकाटालो हुँदासम्म बेहुली पक्षले केही सोधखोज नगरेको र विवाह गर्न गएपछि विवाद झिकेको बेहुला पक्षको गुनासो छ ।

प्रकाशित मिति: मंगलबार, पुस १, २०७६ ०९:४५