वैज्ञानिक खोजमा आधारित पुस्तक ‘युनिक डिस्कभरी इन युनिभर्स’ सार्वजनिक

A+ A A-

काठमाडौंमा आइतबार वैज्ञानिक खोजमा आधारित पुस्तक सार्वजनिक गरिएको छ । कमलकुमार रिजालद्वारा लिखित ‘युनिक डिस्कभरी इन युनिभर्स’ नामक अनुसन्धानपरक पुस्तक सार्वजनिक गरिएको हो ।

उक्त पुस्तक नेपाल प्रज्ञा प्रतिष्ठान कमलादीमा आयोजित एक कार्यक्रमका बीच नेपाली कांग्रेसका उपसभापति विजयकुमार गच्छदारले सार्वजनिक गरेका हुन् ।

पृथ्वीको उत्पत्ति, मानव जातिको विकासक्रम, ग्रहहरूको उत्पत्ति र सूर्य उदय तथा अस्तलगायतका विषय समेटिएको उक्त पुस्तक वैज्ञानिक खोजमा आधारित रहेको लेखक रिजालको भनाइ छ । पुस्तकले मूलतः सूर्य पूर्वबाट मात्र उदाउँछ भन्ने मान्यतालाई चुनौती दिएको छ । ‘युनिक डिस्कभरी इन युनिभर्स’का अनुसार सूर्य चारवटै दिशाबाट उदाउने गर्छ ।

सदियौंदेखि पूर्वबाट सूर्य उदाउँछ भन्ने मान्यताभन्दा फरक दृष्टिकोण राखेर लेखिएको पुस्तक ‘युनिक डिस्कभरी इन युनिभर्स’ नेपाली पाठकहरूका लागि मात्र नभएर विश्वभर खगोलीय अध्ययन गर्नेहरूका लागि नितान्त नयाँ विषय हुनेछ ।

कार्यक्रममा कांग्रेस उपसभापति गच्छदारले सूर्य पूर्वबाट मात्र नउदाउने भन्ने कुरा सुन्दा आफूलाई अनौठो लागेको बताए । तर, खोज र अनुसन्धानहरूले पूर्ववत् मान्यताहरूलाई भत्काउने हुँदा ‘युनिक डिस्कभरी इन युनिभर्स’ ले निक्र्याेल गरेको खोजले पनि नयाँ तथ्य स्थापित गर्ने उनको भनाइ थियो ।