एउटा भारतीय कम्पनी ल्याउन ऐन नै बनाइदै छः डेरी उद्योग संचालक

A+ A A-

संघीय संसदमा दर्ता भएको ‘विदेशी लगानी तथा प्रविधि हस्तान्तरण सम्बन्धि कानुनलाई संशोधन र एकीकरण गर्न विधेयक’ प्रति डेरी उद्योगीहरुले आपत्ति जनाएका छन् ।

सरकारले डेरी उद्योगको क्षेत्रमा विदेशी लगानी भित्र्याएर नेपाली उद्योग र किसानलाई समाप्त पार्न खोजेको आरोप लगाउँदै उनीहरुले डेरीको क्षेत्रमा आउने विदेशी लगानीलाई रोक्न आग्रह गरेका छन् ।

नेपाल डेरी एशोसिएशन र डेरी उद्योग संघले आयोजना गरेको पत्रकार सम्मेलनमा डेरी उद्योगी सुमित केडियाले सरकारले आफूहरुलाई उठीवास गराउन चाहेको आरोप लगाए ।

‘राज्यले विदेशी लगानी भित्र्याएपछि बाध्य भएर कारोवार छाडेर हामीलाई वैदेशिक रोजगारमा जानुपर्छ या उनीहरुको उद्योगमा काम गर्नुपर्छ,’ उनले भने ।

डेरी क्षेत्रमा ३० अर्बको लगानी रहेको, बार्षिक १ अर्ब रुपैयाँभन्दा बढी कर तिरिरहेको, गुणस्तरी दुग्धजन्य पदार्थ उपलब्ध गराइराएर राष्ट्रिय आवश्यकता पूरा गरिरहेको समयमा विदेशी लगानी किन चाहियो भन्ने प्रश्न पनि उद्योगीको छ ।

स्वदेशी लगानी नभएको क्षेत्रमा विदेश लगानी भित्र्याउनु उपयुक्त हुने भएपनि स्वदेशी उद्योगले नै राष्ट्रिय आवश्यकता पूरा गरिरहेको सन्दर्भमा स्वदेशी लगानी धराशायी पार्नुभन्दा अर्काे प्रयोजनको लागि नभएको आफूहरुको बुझाइ रहेको उद्योगीको आरोप छ ।

‘उद्योग छैन, काम गर्ने मान्छे छैन, उत्पादन छैन, डेरी क्षेत्र त आफैमा सक्षम हुँदा हुँदै पनि राज्यले विदेशी कम्पनी भित्र्याएर यो क्षेत्रलाई पनि धराशायी बनाउन लागेको छ,’ केडियाले भने ।

नेपाल दुध विकास संस्थान (डिडिसी) का महाप्रबन्धक इश्वरीराज न्यौपानेले विदेशी लगानीले नेपालका किसान र उद्योगी धारासायी हुने बताए ।

‘सुन्दैछु भारतको अमुल कम्पनी नेपालमा उद्योग स्थापना गरिरहेको छ, यदि त्यस्तो हो भने नेपाली किसान र उद्योगीका लागि दुर्भाग्य हुन्छ, हामी अमुल कम्पनीभन्दा कुनै कुरामा कमजोर छैनौं,’ न्यौपानेले भने ।

दुधको क्षेत्रमा नेपाल आत्मनिर्भर हुन गइरहेको बताउँदै उनले यस्तो अवस्थामा अमुल जस्ता अन्तराष्ट्रिय कम्पनी नेपालमा आयो भने नेपाली किसान र उद्योगी धारासायी हने दावी गरे ।

डेरी उद्योग संघका अध्यक्ष अरनिको राजभण्डारीले नेपालका डेरी उद्योग सक्षम भइसकेको कुरा सरकारले स्वयं स्वीकार गरिसकेको अवस्थामा पनि विदेशी लगानी भित्र्याए नेपालको डेरी उद्योग समाप्त हुने बताए ।

नेपालमा हाल १ हजार ८ सय ५० डेरी उद्योग क्रियाशील रहेको बताउँदै उनले सबै उद्योग आआप्नो क्षेत्रमा सफल रहेको दावी गरे । उनले पनि डेरी क्षेत्रमा विदेशी लगानी आवश्यक नभएको दाबी गरे ।

‘देशको कुल गार्हस्थ उत्पादनमा कृषिले मात्र २९ प्रतिशत योगदान दिइरहेको छ, त्यसमा दुग्ध क्षेत्रले ९ प्रतिशत योगदान दिइरहेको छ, त्यसैले यसलाई धारासायी हुनबाट बचाउनु सबैको कर्तव्य हुन आउँछ,’ अध्यक्ष राजभण्डारीले भने ।

दुध क्षेत्रमा ३० अर्ब लगानी रहेको र २० हजारभन्दा बढीले प्रत्यक्ष रोजगारी पाएको उल्लेख गर्दै अध्यक्ष राजभण्डारीले यो क्षेत्रबाट दैनिक ३ करोड रुपैयाँ शहरबाट गाउँमा गइरहेको दाबी गरे ।

नेपालका डेरी उद्योग अमुल कम्पनीभन्दा कुनै रुपमा कमजोर नरहेको बताउँदै उनले भारत सरकारले जस्तै नेपाल सरकारले पनि नेपाली डेरीलाई सुविधा दियो भने अमुलभन्दा पनि राम्रो काम गरेर देखाई दिने चुनौति दिए । भारतमा उत्पादन भएको दुध त्यहाँ खपत नभइरहेको अवस्थामा अमुलमार्फत नेपाल ल्याएर बेच्ने षड्यन्त्र भइरहेको बताउँदै उनले भारतले अफ्रिकी तथा सार्क देशलाई केन्द्रविन्दु बनाएर आफ्नो दुध खपत गरिरहेको बताए ।

एशोसिएशनका अध्यक्ष राधाकृष्ण सापकोटाले विभिन्न बहानामा अमुल जस्ता अन्तराष्ट्रिय कम्पनी भित्र्याउने काम भइरहेको आरोप लगाए ।

‘यो क्षेत्रमा ५ लाखभन्दा बढी किसान लागेका छन्, विदेशी लगानी आयो भने ती सबै किसानको हालत के हुने हो, त्यसको बारेमा कसैले सोचेका छन् ? यो क्षेत्रमा सबैभन्दा बढी साना किसान रहेका छन्, ठूला कम्पनी आयो भने ती किसानको हालत के हुन्छ, ठूला कम्पनी आयो भने नेपालकै दुध प्रयोग गर्छ भने ग्यारेण्टी छैन,’ अध्यक्ष सापकोटाले भने ।

सार्कमै बढी दुध उत्पादन गर्ने देशहरुमा नेपाल तेस्रो स्थानमा रहेको बताउँदै सापकोटाले यस्तो अबस्था थाहा पाउँदा पाउँदै सरकारले विदेशबाट कम्पनी ल्याएर सबैलाई मास्ने काम गर्न लागेको आरोप लगाए ।

प्रकाशित मिति: सोमबार, फागुन २०, २०७५ ००:४४