इलाम पुग्ने पर्यटकलाई स्टार होटलभन्दा होमस्टे प्यारो

A+ A A-

इलाममा पछिल्लो समय होटलहरूमा भन्दा होमस्टेमा बस्ने पर्यटकहरू बढ्दै गएका छन् । विदेशी पर्यटकहरूसमेत महिनौंसम्म इलामका होमस्टेमा बिताउन थालेका छन् ।

पछिल्लो समय इलाममा ग्रामीण पर्यटनको अवधारणाअनुरूप होमस्टे पर्यटनप्रति आकर्षण बढेको छ । गाउँकै हावापानी, बाटोघाटो, खानपान र गाउँले परिवेशमा रमाउन मौलिक गाउँबस्तीमा पुग्नैपर्छ । गाउँको मौलिक परम्परा, रहनसहन र जीवनशैली बुझ्दै ग्रामीण पर्यटकीय स्थलहरूको भ्रमण गर्न विदेशी मात्र होइन, स्वदेशी पर्यटकहरूको पनि आकर्षण बढेको हो ।

सुकिलो सडकमा हुइँकिएर स्टार होटलमा बसेर आनन्द लिँदा बेग्लै मजा होला तर गाउँघरमा फन्को लगाउँदै गाउँले घरमा बसेर रमाउँदा बेग्लै अनुभूति लिन सकिन्छ ।

फुर्सदिलो समय वा चाडबाडको मौसममा घुम्न निस्किनेहरूको रोजाइमा कि त लामो दूरीको ट्रेकिङ कि त होमस्टे रोजाइमा पर्ने गर्दछ । फरक गाउँको फरकफरक परिवेश, खानपान, जीवनशैली बुझ्ने मौका होमस्टेमा मिल्ने गर्छ । पछिल्लो समय इलामका होमस्टेमा तेस्रो मुलुकका पर्यटक आउने क्रम बढेको छ । इलामको माईपोखरी, फिक्कललगायतका होमस्टेमा पालैपालो २० भन्दा बढी देशका पर्यटकहरू महिनौंसम्म बस्ने गरेको स्थानीय होमस्टे सञ्चालकहरूले बताएका छन् ।

तीन वर्षअगाडिसम्म पर्यटकहरूको आकर्षणमा खासै पर्न नसकेका होमस्टेहरूसमेत विस्तारै पर्यटकहरूको रोजाइमा पर्न थालेका छन् । यहाँको राम्रो वातावरण र रहनसहनले आकर्षित बनाएको उनीहरूको भनाइ छ । धेरै विदेशी हिमालको पदयात्रामा जाने भए पनि केहीले इलामलाई गन्तव्य बनाउन थालेका छन् । पर्यटकलाई खान र बस्न सहज हुने भएकाले पनि घुम्न आउने गरेको अन्तु पर्यटक विकास समितिका अध्यक्ष धनकुमार आलेले बताए ।

महँगा होटलको तुलनामा सस्तोमा स्तरीय सेवा होमस्टेमा पाइन्छ । होमस्टेमा बस्र्ने पर्यटक एकै परिवारमा जस्तै गरी बस्ने गर्दछन । उनीहरू धेरै होमस्टेमा गाईको थलो भकारो गर्ने, घाँस काट्ने, घरको काम सघाउने, खाना पकाउने, दूध डेरीमा पुर्‍याउनेसमेत गर्दछन् । धेरैजसो पर्यटकहरू हप्ता दिनदेखि महिना दिनसम्मको समय मिलाएर बस्ने गरेका छन् । होमस्टेबाट यहाँको कला, संस्कृति, भेषभूषा, खानपानमा रमाउन पाउँदा बसाइ ज्यादै राम्रो र स्मरणीय हुने विदेशी पर्यटकहरू बताउँछन् ।

होमस्टेमा बस्ने विदेशीले अनलाइनमार्फत सिधै समय मिलाउने गरेका छन् । पर्यटकका लागि सुविधा मात्र नभएर यहाँको पहिचान झल्कने गाउँघर, रहनसहन र हरियालीले पनि आकर्षित बनाएको देख्न सकिन्छ । फ्रान्स, जर्मनी, जापान, इटाली, नेदरल्याण्ड र कोरियाका नागरिकले समेत इलामका लोभलाग्दा होमस्टेको स्वाद लिएको अन्तु पर्यटक विकास समितिका आलेले जानकारी दिए ।