ग्लोबल अन्तर्राष्ट्रिय सम्मेलन काठमाडौंमा सुरु

A+ A A-

दुईदिने ग्लोबल अन्तर्राष्ट्रिय सम्मेलन काठमाडौंमा सुरु भएको छ । २१औं शताब्दीको नेतृत्व, दिगो विकास र उच्च शिक्षाका विषयमा छलफल गर्न सम्मेलनको आयोजना गरिएको हो ।

शुक्रबार उद्योग वाणिज्य तथा आपूर्तिमन्त्री लेखराज भट्टले सम्मेलनको उद्घाटन गर्दै देश विकासका लागि नयाँ नेतृत्व आवश्यक रहेको बताए । विकासका नयाँ आयमहरूमा सरकारले काम गरिरहेको बताउँदै मन्त्री भट्टले अन्तर्राष्ट्रिय सम्मेलनले नेपालको विकासमा टेवा पुग्ने बताए ।

‘हिजोको ज्ञान भोलिका लागि काम नलाग्न सक्छ । त्यसैले नयाँ ज्ञानको खोज अनुसन्धान गर्न सम्मेलनको आयोजना गरेका हौं,’ ग्लोबल कलेज अफ इन्टरनेसनलका अध्यक्ष पुष्कर वज्राचार्यले भने ।

‘२१औं शताब्दीको नेतृत्व र डेभलपमेन्ट कस्तो हुनुपर्छ ? हिजोको विकासकाे परिभाषा आजका लागि उपयुक्त छ कि छैन ? विकासको नयाँ परिभाषा के हुन सक्छ ? यी विषयमा बृहत् रूपमा खोजी गरिनेछ,’ उनले भने ।

विद्यार्थीमा ज्ञानको वृद्धि गर्न सम्मेलनको आयोजना गरिएको उनकाे भनाइ थियाे । ‘सम्मेलनमा विद्यार्थीहरूलाई पनि सहभागिता गराइएको छ,’ उनले भने,‘यसबाट विद्यार्थीहरूमा नेतृत्व गर्ने क्षमता, विकासका अवधारणा, ज्ञान, सीप सिक्ने अवसर पाउनेछन् ।’

ग्लाेबल कलेज अफ इन्टरनेेेसनलका प्रिन्सिपल देवराज पनेरूका अनुसार सम्मेलनका लागि आठवटा विषयमा १ सय ५० भन्दा बढी रिसर्च पेपर आएका थिए । तीमध्ये छनोट भएका ३८ वटा रिसर्च पेपर प्रस्तुत गरिनेछ ।

सम्मेलनमा नेपाललगायत बंगलादेश, इन्डिया, इटाली, अमेरिका, अस्ट्रेलिया इजरायलका विज्ञहरूको सहभागिता रहेको छ । सम्मेलनमा राष्ट्रिय तथा अन्तर्राष्ट्रिय गरी १ हजारभन्दा बढीले सहभागिता जनाएका छन् ।

ग्लोबल कलेज अफ म्यानेजमेन्ट, ग्लोबल कलेज अफ इन्टरनेसनल र ग्लोबल इन्स्टिच्युट फर पोलेसी रिसर्च डेभलपमेन्टको आयोजनामा पहिलो पटक सम्मेलनको आयोजना गरिएको हो । सम्मेलन शनिबारसम्म चल्नेछ ।