अन्तर्राष्ट्रिय आमन्त्रित महिला फुटबल हुने

A+ A A-

नेपाली सेनाले प्रधानसेनापति सातौं अन्तर्राष्ट्रिय आमन्त्रित महिला फुटबल प्रतियोगिता २०७६ आयोजना हुने भएको छ । अखिल नेपाल फुटबल संघ (एन्फा) सँगको सहकार्यमा हुन लागेको प्रतियोगिता आइतबारबाट सुरु हुँदैछ ।

प्रतियोगितामा सहभागी आठ टिमलाई दुई समूहमा विभाजन गरिएको छ । समूह ‘ए’मा आयोजक त्रिभुवन आर्मी क्लब, प्रदेश १, एपीएफ र सिक्किम रहेका छन् । यस्तै, समूह ‘बी’मा प्रदेश २, नेपाल पुलिस क्लब, प्रदेश ५ र भुटान छन् ।

प्रत्येक समूहबाट शीर्ष दुई स्थानमा रहने टिम सेमिफाइनमा प्रवेश गर्नेछन् । पछिल्ला ६ संस्करण नकआउटका आधारमा सम्पन्न भएकोमा यसपालिदेखि समूह विभाजन गरी लिगकम नकआउटके आधारमा खेलाउन लागिएको हो । पहिलो खेल आयोजक आर्मी क्लब र प्रदेश १ बीच हुनेछ ।

प्रतियोगिताको विजेताले ट्रफीसहित नगद तीन लाख प्राप्त गर्नेछ । यसैगरी उपविजेतालाई एक लाख ५० हजार रुपैयाँ प्रदान गरिनेछ । सेमिफाइनलमा पराजित हुने दुवै टिमले ५०–५० हजार प्राप्त गर्नेछन् । साथै, प्रतियोगिताको सर्वोत्कृष्ट खेलाडीलाई स्कुटर प्रदान गरिनेछ भने सर्वोत्कृष्ट गोलरक्षक, मिडफिल्डर, डिफेन्डर, फरवार्ड र प्रशिक्षकलाई जनही १० हजार नगद पुरस्कार दिइनेछ ।

२०७० सालदेखि सञ्चालन भइरहेको प्रतियोगितालाई अझ स्तरीय र प्रतिस्पर्धात्मक बनाउन दुई विदेशी टिमलाई पनि सहभागी गराइएको महासेनानी शशिकिरण रायमाझीले बताए । सिक्किम र भुटानका उत्कृष्ट महिला टिम प्रतियोतिगामा सहभागी हुने पनि उनले बताए ।