दूधवाली भन्दा नमज्जा लाग्थ्यो

A+ A A-

नेपालमा सम्पन्न १३औँ दक्षिण एसियाली खेलकुद (साग)अन्तर्गत जनकपुरधाममा कुस्तीका सम्पूर्ण खेलहरू सम्पन्न भएका छन् । कुस्ती प्रतियोगितामा भारतका खेलाडीहरूले आफ्नो दबदबा देखाए ।

कुल २० स्वर्णका लागि भएको कुस्ती प्रतियोगितामा भारतका खेलाडीहरूले १४ वटा स्वर्णमा कब्जा जमाउन सफल भए । तर, नेपाली खेलाडीले पनि केही स्वर्ण जितेर साख राखे । स्वर्ण विजेता संगीता धामीसँग शिलापत्रका लागि सुजीतकुमार झाले गरेको कुराकानी प्रस्तुत छ ।

सागमा कुस्तीको इतिहासमा पहिलो पटक नेपाललाई स्वर्ण दिलाउन सफल हुनुभयो, कस्तो अनुभव भइरहेको छ ?

एकदमै खुशी छु । आफ्नो देशका लागि पहिलो पटक स्वर्ण पदक जित्दा गौरवान्वित हुनु स्वाभाविक नै हो । फेरि स्वर्ण जित्ने लक्ष्यका साथ मैदानमा थिएँ, सोही सपना पूरा भयो । मेरो करियरका लागि पनि यो सुनौलो अवसर थियो ।

स्वर्ण पाएपछि तपाईं एकदमै भावुक हुनुभएको थियो, कुनै खास कारण थियो कि ?

अवार्ड ग्रहणपछि मलाई कसैले मेरो बुबाको नाउँ सोध्नुभयो । मेरा आँखा रसाएर आए । हामी तीन दिदीबहिनी हौँ । कान्छी बहिनी गर्भमै रहेका बेला बुबा आमालाई छाडेर जानुभयो । त्यसपछि कहिल्यै उहाँले हाम्रो विषयमा सोध खबरसम्म गर्नु भएन ।

आमा नै सबैथोक हुनुहुन्छ हाम्रा लागि । कसैले मलाई बुबाको विषयमा सोध्छ भने मेरो आँखा रसाएर आउँछ ।

यहाँसम्म पुग्नका लागि कति संघर्ष गर्नुपर्‍यो ?

मलाई त ठूलै संघर्ष गर्नुपरेको छ, यहाँसम्म पुग्नका लागि । बुबाले छाडेर गएपछि मेरो सबै सपना चकनाचुर हुनै लागेको थियो । म बच्चैदेखि खेलाडी बन्न चाहन्थो तर कक्षा १० मा आएपछि मात्रै कुस्ती खेल्न सुरु गरेँ ।

स्नातक पहिलो वर्षसम्म आउँदा मेरो यो सपना पूरा भएको छ । मलाई कुस्तीमै भविष्य बनाउने धोको छ ।

सफलतापछिको साथीहरूको प्रतिक्रिया के छ ?

मेरा साथीहरू पहिले मसँग बस्नसम्म रुचाउँदैनथे । मलाई दूधवाली भनेर गिज्याउँथे । आमाले भैँसीको दूध बेचेर जसोतसो हाम्रो पालनपोषण गर्नुभएको छ ।

मैले पनि कहिलेकाहीँ दूध घरघरमा पुर्‍याउनुपर्थ्याे, जसले गर्दा कलेज जान पनि अबेला हुन्थ्यो । त्यसैले साथीहरू पनि दूधवाली भनेर जिस्क्याउन थालेका थिए ।

त्यो सुनेर मलाई रुन मन लाग्थ्यो । त्यो दिन नमज्जा जस्तै हुन्थ्यो । अहिले भने मेरो सफलता देखेर उनीहरू पनि खुशी छन् ।

तपाईंले अहिलेसम्म कतिवटा स्वर्ण पदक जित्नुभएको छ ? भविष्यको योजना के छ ?

मैले अहिलेसम्म राष्ट्रिय र अन्तर्राष्ट्रिय गरी तीनवटा स्वर्ण जितिसकेकी छु । कुस्तीमा भविष्य बनाउने सोच छ । त्यससँगै नेपाली सेना बन्ने मेरो ठूलो धोको छ ।

प्रकाशित मिति: बुधबार, मंसिर २५, २०७६ १३:३१