धार्मिक पर्यटकलाई लक्षित गर्दै सीता र माउन्टेन एयरले पूर्वमा उडान भर्ने

A+ A A-

पूर्व क्षेत्रको दुई विमानस्थलमा सीता एयर र माउन्टेन हेलिकोप्टरले सेवा प्रदान गर्ने भएका छन् । खासगरी धार्मिक पर्यटकका लागि सुरु गरिएको यो सेवाबाट हलेसी महादेव र ताप्लेजुङको पाथीभराको दर्शन गर्न चाहने पर्यटकका लागि निकै फलदायी बन्ने सीता एयरका प्रबन्धक निर्देशक राजेन्द्रबहादुर सिंहले जानकारी दिए ।

उनले पूर्व क्षेत्रमा सबैभन्दा बढी विमानस्थल रहे पनि निजीक्षेत्रले ती विमानस्थलको उपयोग नगरिरहेको अवस्थामा सीता एयरले चालेको पाइलाबाट प्रदेश सरकार र संघीय सरकारको लक्ष्यलाई पूरा गर्न मद्दत गर्ने विश्वास व्यक्त गरे ।

सीता एयरले भद्रपुर र विराटनगर विमानस्थलबाट हप्तामा एक पटक सुकेटार र लामीडाँडा उडान भर्ने तथा यी दुवै विमानस्थलबाट हलेसी र पाथीभरा दर्शन गर्न हेलिकाेप्टर उपलब्ध हुने प्रबन्धक सिंहले जानकारी दिए ।

प्याकेज टूरका लागि एक यात्रुले २३ हजार तिर्नुपर्ने र ती यात्रुले हवाईजहाज एवं हेलिकोप्टरको सुविधा पाउने भनिएको छ । खासगरी पर्यटन वर्ष २०२० लाई लक्षित गरी ल्याइएको सो सेवाले नेपाल–भारतका लागि हजारौं तीर्थालुले लाभ पाउने अनुमान गरिएको छ ।

पहाडी क्षेत्रका विमानस्थल ५०० देखि ७०० सम्मको रनवे हुने र यस्ता रनवेमा ठूला जहाज जान नसक्ने अवस्थामा सीता एयरले सेवा सुरु गर्नु यस क्षेत्रका जनताका लागि फाइदा पुग्ने बताइएको छ ।

यही मंसिर २९ गतेदेखि सुरु हुने उक्त सेवाबाट यस क्षेत्रका होटल व्यवसायी र ट्राभल्स सञ्चालक उत्साही भएका ट्राभल्स एवं होटल व्यवसायी भविष्य श्रेष्ठले बताए । मोरङ व्यापार संघका अध्यक्ष एवं सीता एयरका प्रवर्द्धक प्रकाश मुन्दडाले नेपाल वायु सेवा निगमले फाटफुट उडान भर्ने सो स्थानका लागि सीता एयरले गरेको प्रयास सराहनीय रहेको बताए । (रासस)

प्रकाशित मिति: बुधबार, मंसिर २५, २०७६ ०९:४४