‘नेपाल साहित्य महोत्सव–२०१९’ को आठौं संस्करण पोखरामा

A+ A A-

पोखरामा लिटरेचर फेस्टिबल हुने भएको छ । आईएमई नेपालको लिटरेचर फेस्टिबलको आठाैं संस्करण शुक्रबारदेखि पोखरास्थित लेकसाइडको बाराहीघाटमा हुने भएको हो । बुकवर्म फाउन्डेसन र र्‍यान्डम रिडर्स सोसाइटीकोको आयोजनामा फेस्टिबल हुने बताइएको छ ।

फेस्टिबल २७ मंसिर देखि ३० सम्म आयोजना हुनेछ । बुकवर्म फाउन्डेसनका निर्देशक अजित बरालले फेस्टिबलमा अघिल्ला संस्करणभन्दा यसपटक नयाँ वक्तालाई आमन्त्रण गरिएको जानकारी दिए । ‘सुरुका संस्करणमा एउटै अनुहार दोहोरियो भन्ने धेरै गुनासा र सुझाव आए,’ उनले भने, ‘यस पटक हामीले ९८ प्रतिशत नयाँ वक्तालाई फेस्टिबलमा ल्याउन लागेका छौं ।’

चार दिनसम्म चल्ने फेस्टिबलमा १ सय १० भन्दा बढी वक्ता सहभागी हुनेछन् । कार्यक्रम एक दर्जनभन्दा बढी विदेशी लेखक सहभागी हुने बरालले जानकारी दिए । ‘फेस्टिबलमा अन्तर्राष्ट्रिय लेखकहरूलाई पनि ल्याउन लागेका छौं । यहाँको साहित्यलाई अन्तर्राष्ट्रियकरण गर्न पनि सहयोग मिल्ने अपेक्षा राखेका छौं,’ उनले भने । उनका अनुसार फेस्टिबलमा ४० भन्दा बढी सेसन समावेश गरिएको छ ।

फेस्टिबलका अहिलेसम्म चारवटा संस्करण काठमाडौंमै गरिएको थियो । पाँचाैं संस्करणदेखि पोखरामा आयोजना गर्न थालिएको हो । फेस्टिबलको अर्काे आयोजक संस्था र्‍यान्डम रिडर्स सोसाइटीका अध्यक्ष केशवशरण लामिछानेले फेस्टिबलले पोखरेली साहित्य उजागर गर्न मद्दत पुगेको दाबी गरे ।

‘फेस्टिबलका सबै संस्करणमध्ये तीनवटा पोखरामै भएका छन् । त्यसले पनि हामीलाई अपनत्व महसुस भएको छ,’ उनले भने, ‘यस संस्करणमा २० प्रतिशतभन्दा बढी वक्ता पोखरेली बुद्धिजीवीलाई नै सहभागी गराउन पाउँदा हामी पनि खुशी छौं ।’

साहित्य महोत्सवले युवा पाठकमाझ पठन संस्कृतिमा उत्प्रेरकको भूमिका खेलेको आयोजकको दाबी छ । महोत्सवमा दक्षिण एसियाली राष्ट्रको सर्वोत्कृष्ट पुरस्कार डीएससी पनि प्रदान गरिनेछ । २५ हजार अमेरिकी डलर (२७ लाख ५० हजार रुपैयाँ) राशिबराबरको उक्त पुरस्कार दक्षिण एसियाली साहित्यिक पुरस्कार गुठीले ८ वर्षदेखि प्रदान गर्दै आएको हो ।

नेपालको साहित्य महोत्सवमा पुरस्कार वितरण गर्न पाउँदा खुशी लागेको पुरस्कारका सहसंस्थापक सुरिना नरुलाले बताइन् । ‘आईएमई नेपाल साहित्य महोत्सवसँग सहकार्य गर्न पाउँदा उत्साहित छौं,’ उनले भनिन् ।

प्रकाशित मिति: बुधबार, मंसिर २५, २०७६ ०८:४०