अर्थमन्त्रीले चाहे आउन सक्छ ‘सिंगल डिजिट’मा ऋणको ब्याजदर

A+ A A-

उद्योग व्यवसायीहरू बैंकबाट लिने ऋणको ब्याज धेरै भयो भनेर गुनासो गरिरहेका छन् । उद्योगी व्यवसायीको टोलीले प्रधानमन्त्री केपी शर्मा ओलीलाई समेत भेटेर बैंकको ब्याज कम हुन पहल गरिदिन आग्रह गरिसकेका छन् ।

अर्थमन्त्री डा. युवराज खतिवडा पनि उद्योग व्यवसाय प्रवर्द्धनका लागि बैंकबाट लिने कर्जाको ब्याज कम हुनुपर्ने तर्क गरिरहेका छन् । तर, केही संख्यामा रहेका ऋणीका लागि लाखौं निक्षेपकर्ताको निक्षेपको ब्याज कम गर्ने पक्षमा आफू नरहेको अर्थमन्त्री डा. खतिवडाले बताउने गरेका छन् ।

अर्थमन्त्री डा. खतिवडाले चाहने हो भने अहिले पनि बैंक कर्जाको ब्याज एकल अंक (सिंगल डिजिट) मा आउने सक्ने देखिएको छ । यसका लागि सरकारको करिब शतप्रतिशत लगानी रहेको राष्ट्रिय वाणिज्य बैंकले नाफा कम खानुपर्ने हुन्छ ।

राष्ट्रिय वाणिज्य बैंकले प्रकाशित गरेको विवरणअनुसार उसको आधार दर (बेसरेट) ६.६ प्रतिशत छ । राष्ट्रिय वाणिज्य बैंकले आधार दरमा ३ प्रतिशतसम्म नाफा राखेर कर्जा प्रवाह गर्दा पनि सो बैंकबाट प्रवाह हुने कर्जाको ब्याजदर १० प्रतिशतभन्दा कम हुने देखिएको हो ।

तर, राष्ट्रिय वाणिज्य बैंकले भने मौकाको फाइदा उठाउँदै कर्जाको ब्याज महँगो गरिरहेको आरोप ग्राहकले लगाएका छन् । आधार दरमा ३ प्रतिशतसम्म प्रिमियम राखेर कर्जा दिँदा पनि सिंगल डिजिटमा ब्याज हुने भए पनि राष्ट्रिय वाणिज्य बैंकले बढी लिने गरेको ग्राहकको आरोप छ ।

‘अघिल्लो साता राष्ट्रिय वाणिज्य बैंकबाट स्कुलका लागि ऋण लिन गएका थियौं, बैंकको कर्जा विभागका कर्मचारीले आधार दरमा ४ प्रतिशत थप गरेर मात्रै ऋण दिने भन्नुभयो, बैंकले आधार दरमा ३ प्रतिशतसम्म प्रिमियम थपेर ऋण दिएको भए पनि सिंगल डिजिटमा ऋण पाइन्थ्यो तर ४ प्रतिशतको अड्डी लिएका कारण सम्भव भएन,’ राष्ट्रिय वाणिज्य बैंकबाट ऋण लिनका लागि फाइल पेस गरेका एक व्यवसायीले शिलापत्रसँग भने ।

राष्ट्रिय वाणिज्य बैंकले प्रकाशित गरेको कर्जाको ब्याजदरअनुसार पनि उसले प्रवाह गर्ने अधिकांश कर्जाको ब्याजदर ९ प्रतिशतको हाराहारीमा नै देखिन्छ । तर, बैंकले माथिल्लो अंकको प्रिमियम लिने गरेका कारण ब्याज महँगो भएको हो ।

तर, अरू बैंकले भने सिंगल डिजिटमा कर्जा दिन सक्ने सम्भावना कम देखिएको छ । नेपाल राष्ट्र बैंकले बैंकहरूलाई आधार दरभन्दा कम ब्याजदरमा ऋण प्रवाह नगर्न निर्देशन दिएको छ । आधार दरमा थप गर्ने प्रिमियमको दर नतोकेका कारण बैंकहरूले कतिपय अवस्थामा बढी ब्याज लिने गरेका हुन् ।

यस्तो छ बैंकहरूको आधारदर