घट्दै एचआईभी संक्रमित

A+ A A-

एचआईभी संक्रमितको क्षेत्रमा सुदुरपश्चिम प्रदेशको तेस्रो जिल्लाका रूपमा रहेको डोटीमा पछिल्लो समय संक्रमित संख्या घट्न थालेको छ । पछिल्लो तथ्यांक हेर्दा संक्रमितको संख्या घट्न थालेको बताइएको छ ।

जिल्ला स्वास्थ्य कार्यालयको तथ्यांकअनुसार जिल्लामा कुल ९ सय ९४ संक्रमित देखिएकाेमा हाल ७ सय ९९ ले एआरटी औषधि सेवन गरिरहेका छन् भने १ सय ७२ को मृत्यु भइसकेको छ । पछिल्ला तीन वर्षयताको तथ्यांक हेर्दा एचआईभी संक्रमितको संख्या घट्दो क्रममा रहेको देखिएको छ ।

आर्थिक वर्ष २०७३/७४ मा ४०, २०७४/७५ मा ३५ र २०७५/७६ मा २९ एचआईभी संक्रमित रहेका जिल्ला स्वास्थ्य कार्यालयका प्रमुख रमेश मलासीले बताए । उनले भने, ‘जिल्लामा एचआईभी संक्रमितको उपचारमा उल्लेख्य प्रगति भएका कारण संक्रमितको संख्या घट्दै गएको छ तर आर्थिक कारण दैनिक जीवनयापनमा भने समस्या परिरहेको छ ।
राज्यले एचआईभी संक्रमितका सवालमा केन्द्रित रहेर कुनै कार्यक्रम ल्याउन नसक्दा जिल्लाका संक्रमित दुःखमा पर्ने गरेका संक्रमितको जिल्लास्तरीय सञ्जाल लालीगुराँस एकता समाजका अध्यक्ष कमला मल्लले बताए । उनले भने, ‘हामीलाई राज्यका सबै क्षेत्रबाट बेवास्ता गरिएको छ, गाउँघरमा एचआईभी संक्रमितका समस्या जस्ताका त्यस्तै छन्, संक्रमितका समस्यामा ध्यान दिन जरुरी छ ।’

पछिल्लो समय देशमा शासकीय संरचना परिवर्तन भएसँगै स्थानीय तहले बजेट निर्माणमा एचआईभी संक्रमितका समस्यालाई सम्बोधन गर्न नसकेको गुनासो पूर्वीचौकी गाउँपालिकाकी एचआईभी संक्रमित रमा कुँवरले गरिन् ।

संक्रमितको संख्या धेरै भएकाले उनीहरूका समस्या समाधानमा सबै क्षेत्रले ध्यान दिन आवश्यक रहेको एचआईभीको क्षेत्रमा कार्यरत संस्था सामुदायिक विकास मञ्चका लघु उद्यम विकास अधिकृत डिलबहादुर सिंहले बताए ।

जिल्लामा हाल १ हजार ५ सय ६७ एचआईभी संक्रमित पत्ता लागेका छन् । पत्ता लागेका बिरामी पछिल्लो समय कहीँ पनि नभेटिएकाले दोहोरिएर आउने बिरामी बढी भएका हुन सक्ने बढी छन् । विभिन्न सरकारी तथा गैरसरकारी संस्थाले गरेको अध्ययनअनुसार डोटीमा पत्ता लागेका एचआईभी संक्रमितमा कामका लागि भारत गएर फर्केका र उनीहरूका श्रीमतीमा बढी देखिने गरेको छ ।

प्रकाशित मिति: मंगलबार, मंसिर २४, २०७६ ०९:५१