नाइजेरियामा १०० जनाभन्दा बढीको गोली हानी हत्या

नाइजेरियाको उत्तरी-मध्य बेन्यु राज्यको गुमास्थित येलेवाटामा कम्तिमा १०० जनाको गोली हानी हत्या भएको छ । त्यसक्रममा सयौँ मानिसहरू घाइते र दर्जनौँ अझै बेपत्ता रहेका अन्तर्राष्ट्रिय सञ्चारमाध्यमले उल्लेख गरेका छन् ।

मानवअधिकार समूह एम्नेस्टी इन्टरनेशनल नाइजेरियाले फेसबुकमा एउटा पोस्टमा बताएअनुसार यो हमला शुक्रबार रातिदेखि शनिबार बिहानसम्म भएको थियो ।

एम्नेस्टीका अनुसार, यस सामूहिक हमलामा आक्रमणकारीहरूले गाउँका धेरै परिवारलाई उनीहरूको घरमा थुनेर जिउँदै जलाएका बताइएको छ । जसका कारण मानिसहरूको पहिचान गर्न समेत मुस्किल भएको थियो ।

बेन्यु पुलिसले हमलाको पुष्टि गरेको छ, तर हत्या कसले गर्‍यो र कति जना मारिए भन्ने कुरा बताएको छैन । स्थानीय बासिन्दाहरूले न्यूज एजेन्सी एएफपीलाई बताएअनुसार हमलामा १०० भन्दा बढी मानिसको मृत्यु भएको अनुमान गरिएको छ ।

बेन्यु नाइजेरियाको मध्य बेल्टमा पर्छ, जसको उत्तरमा बहुसंख्यक मुस्लिम जनसंख्या रहेको छ । दक्षिणमा धेरैजसो ईसाईहरू बस्छन् । दुवै समुदायबीच प्रायः जमिन र पानीका लागि लडाईं हुने गरेको बताइएको छ ।

जातीय र धार्मिक विभाजनका कारण यो द्वन्द्व अझ खराब हुने गरेको छ । जसका कारण त्यहाँ हिंसा भड्किने गरेको छ ।

अनुसन्धान फर्म एसबीएम इन्टेलिजेन्सका अनुसार, सन् २०१९ देखि हालसम्म बेन्युमा भएका झडपहरूमा ५०० भन्दा बढी मानिसको ज्यान गएको छ र २२ लाख मानिसहरू आफ्नो घर छोड्न बाध्य हुनुपरेको छ ।

एम्नेस्टी इन्टरनेशनलले मे २९, २०२५ मा आफ्नो एक रिपोर्टमा दाबी गरेको थियो कि पछिल्लो दुई वर्षमा मध्य र उत्तरी नाइजेरियामा बन्दुकधारीहरूको हमलामा कम्तिमा १०,२१७ मानिसहरू मारिएका छन् ।

प्रकाशित मिति: सोमबार, असार २, २०८२ ०७:२६