सुदूरपश्चिममा भ्रष्टाचार: ७ वर्षमा ५ हजार उजुरी, ३४ जना रंगेहात पक्राउ

A+ A A-

सुदूरपश्चिम प्रदेशमा पछिल्लो समय भ्रष्टाचार बढ्दै गएको छ । अख्तियार दुरुपयोग अनुसन्धान आयोग कार्यालय कञ्चनपुरमा पछिल्लो सात वर्षयता भ्रष्टाचारका ५ हजार २ सय १ उजुरी परेका छन् । यीमध्ये ४३ सय ७९ उजुरी फर्छ्याेट भएका छन् भने ८ सय २२ उजुरीमाथि अझै अनुसन्धान चलिरहेको छ ।

अख्तियार दुरुपयोग अनुसन्धान आयोग कार्यालय कञ्चनपुरको तथ्यांकअनुसार आर्थिक वर्ष २०७०/७१ मा ७ सय ४९ मुद्दा दर्ता भएकोमा २ सय ३२ फर्छ्याेट भएका छन् । यस्तै, २०७१/७२ मा यो संख्या बढेर १ हजार १ सय २६ उजुरी दर्ता भए । कुल उजुरी १ हजार ६ सय ४३ पुग्दा १ हजार १ सय ३२ वटा फर्छ्याेट भए भने ५ सय ९ मुद्दामा फैसला हुन बाँकी रहेको देखिएको छ ।

यस्तै, आर्थिक वर्ष २०७२/७३ मा ९ सय ५८ मुद्दा दर्ता भएकोमा कुल जिम्मेवारी १४ सय ६७ पुग्दा १ हजार ४३ मुद्दा फर्छ्याेट भए भने ४ सय २४ मुद्दा फैसला हुन बाँकी देखिएका छन् ।

यसैगरी, आर्थिक वर्ष २०७३/७४ मा ६ सय ४४ मुद्दा दर्ता भएपछि कुल जिम्मेवारी १ हजार ६८ पुग्दा ६ सय ९५ फर्छ्याेट र ३ सय ७३ फैसला हुन बाँकी देखिएको छ । २०७४/७५ मा ५ सय ८८ नयाँ मुद्दा दर्ता हुँदा कुल जिम्मेवारी ९ सय ६१ मध्ये ४ सय १९ फर्छ्याेट र ५ सय ४२ मुद्दा फैसला हुन बाँकी देखिएका थिए ।

त्यस्तै, आर्थिक वर्ष २०७५/७६ मा ७ सय ३४ मुद्दा दर्ता भएकोमा ६ सय १ मुद्दा फर्छ्याेट भएका छन् ।

चालू आर्थिक वर्षको चार महिनामै ४ सय उजुरी

चालू आर्थिक वर्षको कात्तिक मसान्तसम्ममा ४ सय २ उजुरी अख्तियारमा दर्ता भइसकेको अख्तियार दुरुपयोग अनुसन्धान आयोग कार्यालय कञ्चनपुरका सूचना अधिकारी टोपबहादुर विष्टले जानकारी दिए ।

सबैभन्दा बढी कैलाली त्यसपछि कञ्चनपुर, बैतडी, डडेल्धुरा र सबैभन्दा कम उजुरी बाजुराबाट परेको उनले बताए । हाल अख्तियारमा ८ सय २२ उजुरीमाथि अनुसन्धान जारी रहेको उनले बताए ।

अख्तियारको नजर स्थानीय तहमा

स्थानीय तहमा भ्रष्टाचार भइरहेको भन्दै उजुरी आउने क्रम बढ्दै गएपछि अख्तियारले स्थानीय तहमाथी निगरानी बढाएको छ । हाल अख्तियार कार्यालय कञ्चनपुरमा परेका उजुरीमध्ये १ सय ७७ उजुरी स्थानीय तहमा भएका भ्रष्ट्राचारका बारेमा रहेको सूचना अधिकारी विष्टले बताए ।

३४ जना रंगेहात पक्राउ

अख्तियार कार्यालय कञ्चनपुरले पछिल्ला सात वर्षयता ३४ जनालाई रंगेहात घूससहित पक्राउ गरेको छ । उपसचिव, शाखा अधिकृत, बिचौलिया गरी अख्तियारले यो अवधिमा ३४ जनालाई रंगेहात पक्राउ गरेको सूचना अधिकारी विष्टले जानकारी दिए । नीतिगत भ्रष्टाचारका उजुरीमा समेत निकै वृद्धि उनले बताए ।

सुदूरपश्चिम प्रदेशमा भ्रष्टाचारका उजुरी बढेसँगै अख्तियारले सक्रियता पनि बढाएको छ । आर्थिक वर्ष २०७०/७१ देखि चालू आर्थिक वर्षको हालसम्म चालू वर्षको ४ महिनामा ६ स्टिङ अप्रेसन गरिएको पनि सूचना अधिकारी विष्टले बताए ।

के भन्छन् जानकार ?

शून्य सहनशिलताको सिद्धान्त अवलम्बन गर्दै सरकार र आयोगले भ्रष्टाचार नियन्त्रणमा उल्लेख्य उपलब्धि पाएको दाबी गर्दै आए पनि जानकारहरू भने आयोगको दाबी हावादारी भएको बताउँछन् । बढ्दो भ्रष्टाचार न्यूनीकरणका लागि सरकारको स्पष्ट नीति हुनुपर्ने जानकार भवानीसिंह चलाउनेले बताए ।

‘सम्पत्तिमा उत्तराधिकारीको व्यवस्थाले भ्रष्टाचार बढाएको छ,’ चलाउनेले भने, ‘भ्रष्टाचार हुन नदिने हो भने सम्पत्तिको उत्तराधिकारी हुने प्रचलन हटाउनुपर्छ । राजनीतिक दलको फन्डिङ भ्रष्टाचारको अर्को जड हो । जबसम्म राजनीतिक दलको फन्डिङलाई व्यवस्थापन गर्न सकिँदैन, तबसम्म भ्रष्टाचार रोकिँदैन ।’

सार्वजनिक निकायबाट हुने भ्रष्टाचारजन्य कार्यलाई निरुत्साहित गरी सुशासन कायम गर्ने अभियानका साथ अख्तियार दुरुपयोग अनुसन्धान आयोगले १ असोज, २०७० मा तत्कालीन सुदूर पश्चिमाञ्चल विकास क्षेत्रको दिपायलमा क्षेत्रीय कार्यालय र २७ कात्तिक, २०७० मा कञ्चनपुरको महेन्द्रनगरमा आयोगको सम्पर्क कार्यालय स्थापना गरेको थियो ।

मुलुकको संघीय संरचनाअनुरूप हाल सुदूरपश्चिम प्रदेशका सबै जिल्लाहरूको कार्यक्षेत्र रहने गरी आयोगको कार्यालय कञ्चनपुरको पुनर्संरचना भएको छ ।

प्रकाशित मिति: सोमबार, मंसिर २३, २०७६ १९:४५