१३औं साग : आर्चरीमा १० वटै स्वर्ण बंगलादेशको पोल्टामा

A+ A A-

१३औं दक्षिण एशियाली खेलकुद (साग) अन्तर्गत पोखरामा सम्पन्न आर्चरीमा बंगलादेशले १० वटै स्वर्ण पदक हात पारेको छ । १० स्वर्ण पदकका लागि सोमबार पोखरा रंगशालामा भएको खेलमा बंगलादेशले आर्चरीतर्फ एकल तथा टिम इभेण्टमा स्वर्ण पदक हात पार्न सफल भएको हो ।

रिकर्भ महिला तथा पुरुषतर्फ बंगलादेशले स्वर्ण पदक हात पार्न सफल भएको छ भने कम्पाउण्डतर्फको महिला तथा पुरुषतर्फ पनि स्वर्ण पदक हात पार्न सफल भएको हो ।

पुरुषतर्फको रिकर्भ खेलमा बंगलादेशका उत्कृष्ट खेलाडी एमआर सानाले भुटानका छिरिङ केन्लीलाई पराजित गर्दै स्वर्ण हात पारे । सोही इभेण्टको महिलातर्फ बंगलादेशकी १४ वर्षीया उदीयमान खेलाडी आतुन एमएसटी इटिवाईले भुटानकी डिमा सोनामलाई पराजित गर्दै स्वर्ण पदक हात पारेकी हुन् । रिकर्भ एकल पुरुषतर्फ श्रीलंकाले कास्य पदक हात पार्न सफल भएको छ ।

श्रीलंकाका डीई शिल्भा एमएसले भुटानका स्लामा मोहमदलाई पराजित गर्दै कास्य पदक जित्दा सोही इभेण्टको महिलातर्फ बंगलादेशकी मोनिरा मोहानाजले भुटानकी कर्मालाई पराजित गर्दै कास्य पदक जितेकी हुन् । कर्मा ओलम्पिकमा छनेट भएकी खेलाडी हुन् ।

त्यसैगरी, कम्पाउण्ड एकल पुरुषतर्फ बंगलादेशका राना एमडी सोहीलले दोर्जे तेण्डीङलाई पराजित गर्दै स्वर्ण पदक हात पारेका छन् । कास्य पदकका लागि भएको खेलमा बंगलादेशका दास असिम कुमारले श्रीलंकाका वासान्त कुमारलाई पराजित गरी कास्य पदक जितेका हुन् । सोही इभेण्टको महिलातर्फ बंगलादेशकी विश्वास सुमाले श्रीलंकाकी करुणारेन्टी अनुराधालाई पराजित गर्दै स्वर्ण पदक जितेकी हुन् । श्रीलंकाले यस विधामा कास्य पदक हात पार्‍याे ।

श्रीलंकाकी दमयन्तीले बंगलादशेकी बनिक सुस्मितालाई पराजित गर्दै कास्य पदक जितेकी हुन् । बंगलादेशले कम्पाउण्ड महिला तथा पुरुष, रिकर्भ महिला तथा पुरुष र रिकर्भ मिक्सतर्फ स्वर्ण पदक हात पार्न सफल भएको हो ।

१२औं सागमा कास्य पदक मात्र हात पार्न सफल भएको नेपालले घरेलु मैदानमा भने रजत पदकसम्म हात पार्न सफल भएको छ । सागमा सहभागी राष्ट्रमध्ये प्रमुख दाबेदारको रूपमा भारतलाई मानिए पनि यस पटक भारत सहभागी नहुँदा अधिकांश पदक बंगलादेशले हात पार्न सफल भएको हो ।

प्रकाशित मिति: सोमबार, मंसिर २३, २०७६ १४:०८