१३औं सागमा स्वर्ण पदक जित्नेमा पुरुषभन्दा महिला खेलाडी बढी

A+ A A-

१३औं दक्षिण एसियाली खेलकुद सागमा नेपालले ४५ स्वर्ण पदक हात पार्दै भारतपछि दोस्रो स्थानमा छ । यो नेपालको ऐतिहासिक जित हो । यसअधि नेपालले आठौं सागमा ३१ वटा स्वर्ण पदक हात पारेको थियो ।

त्यसको रेकर्ड तोड्दै नेपालले १३औं सागका केही खेल नसकिँदै नयाँ इतिहास रचेको हो । प्राप्त स्वर्ण पदकमध्ये २६ महिला खेलाडीको नाममा रहेको छ । जसमा कराते र तेक्वान्दोका महिला खेलाडीले सबैभन्दा बढी स्वर्ण जितेका छन् । त्यस्तै, बक्सिङमा समेत केही महिलाले स्वर्ण पदकका लागि खेल्नै बाँकी छ ।

यी हुन् १३औं सागमा स्वर्ण पदक जित्ने महिला खेलाडी

करातेमा : निर्मला तामाङ, संगीता मगर, सरु कार्की (टिम काता), त्यस्तै ४५ केजी मुनी तौल समूहकी कुसुम खड्का, ५० किलो तौल समूहमा अनु अधिकारी र ६८ केजी समूहमा सुनिता महर्जन, ६८ केजी तौल समूहमा अनुपमा मगरले स्वर्ण पदक हात पारेका छन् ।

तेक्वान्दो : तेक्वान्दो पुम्से १७ –२३ वर्ष उमेर समूहमा सिना मादेन लिम्बू, २३ –२९ वर्ष पार्वती गुरुङ, २९ वर्षमाथि आयशा शाक्य, त्यस्तै महिला टिम समूहमा समेत निशा दर्नाल, स्वस्तिका तामाङ र सञ्जिला तिमल्सिनाले समेत स्वर्ण पदक हात पारेका छन् ।

त्यस्तै, २३–२९ वर्ष समूहमा नीता गुरुङ, प्रशंसा क्षत्री र सुशीला राईले स्वर्ण पदक हात पारे । तेक्वान्दो ग्यारोगीतर्फ पनि ४६ केजीमुनिमा काजल श्रेष्ठ र संगीता बस्यालले नेपाललाई स्वर्ण दिलाएका छन् ।

त्यस्तै, ट्रायथलनमा सोनी गुरुङ, उसुमा सुस्मिता तामाङ, निमाघर्ती मगर, जुनी राई, एथलेटिक्स (१० हजार मिटर) सन्तोषी श्रेष्ठ, साइक्लिङ (डाउनहिल) निश्मा श्रेष्ठ, साइक्लिङ लक्ष्मी मगर, पौडी (४०० मिटर फ्रिस्टाइल) गौरिका सिंह (२ सय मिटर ब्रेकस्ट्रोक) गौरिका सिंह, त्यस्तै पौडीमा समेत गौरिकाले स्वर्ण पदक हात पारेकी छन् ।

भारोत्तोलन ५९ केजीतौल समूहमा सञ्जु चौधरीले नेपाललाई स्वर्ण दिलाएका हुन् ।

प्रकाशित मिति: सोमबार, मंसिर २३, २०७६ १३:४०