कुस्तीः भारतले ४ स्वर्ण जित्दा नेपाल २ रजतमा सीमित

A+ A A-

१३औं दक्षिण एसियाली खेलकुदअन्तर्गत जनकपुरमा भइरहेको कुस्ती प्रतियोगितामा आइतबार भएको सातवटा विभिन्न तौल समूहमा भारतले चारवटा स्वर्ण पदक जितेको छ ।

श्रीलंका २ र पाकिस्तानले १ स्वर्ण पदक हालिस जित्दा नेपाल २ रजत र २ कास्यमा सीमित बनेको छ ।

आइतबार तीन पुरुष र चार महिलाको विभिन्न तौल समूहमा कुस्ती भएको थियो । कुस्तीमा पुरुषतर्फ ६१ किलोग्राम तौल समूहमा भारतका रवीन्द्रले स्वर्ण, पाकिस्तानका बिलालले रजत र श्रीलंकाका उदराले कास्य पदक जिते भने ८६ किलोग्राम समूहमा भारतका पवनकुमार स्वर्ण, पाकिस्तानका उमर अहमद रजत र बंग्लादेशका श्रीश्रोत रायले रजत पदक प्राप्त गरेका छन् ।

त्यस्तै, ९२ किलोग्राम समूहको खेलमा पाकिस्तानका इनाम स्वर्ण पदक हासिल गरेका छन् भने श्रीलंकाका सलिथा रजत र नेपालका समिर शाह कास्य पदका प्राप्त गरेका छन् ।

महिला समूहतर्फ ५९ किलोग्राम समूहमा भारतकी अंशुले स्वर्ण, बंगलादेशकी निपारेनले रजत र नेपालकी कोमल खत्रीले कास्य पदक जितेकी छिन् । त्यस्तै, ६२ किलोग्राम समूहमा भारतकै साक्षी मलिक स्वर्ण, श्रीलंकाकी महिराले रजत र बंगलादेशकी अख्तर सरमिनले रजत पदक जित्न सफल भएकी छिन् ।

यसैगरी, ६५ किलोग्राम समूहतर्फ श्रीलंकाकी दिलहानी स्वर्ण, नेपालकी सुशीला चन्द रजत र बंगलादेश मोस लक्की कास्य पदक जित्न सफल भएकी छिन् भने ७२ किलोग्राम समूहतर्फ श्रीलंकाकी अयोमी स्वर्ण, नेपालकी निर्मला जागरी रजत र बंग्लादेशकी अख्तर रोजिना कास्य पदक जिते ।

भारतले तीन दिनमा १२ वटा स्वर्ण पदक जितेको छ भने पाकिस्तानले ३ वटा, श्रीलंका २ वटा र नेपाल १ स्वर्ण पदक जितेका छन् । विजयी प्रतियोगीहरुलाई प्रदेश २ का आन्तरिक मामिला तथा कानन मन्त्री ज्ञानेन्द्र यादव, प्रदेश सभा सदस्य मञ्जु यादव र रामसरोज यादव तथा पाकिस्तानका कुस्ति सचिव अब्दुल शेख लगायतले मेडल प्रदान गरे । भोलि अन्तिम दिन दुईवटा प्रतियोगिता हुनेछन् ।

प्रकाशित मिति: आइतबार, मंसिर २२, २०७६ १९:११