१३औं साग : पुरुष क्रिकेटमा श्रीलंका र महिलामा बंगलादेशलाई स्वर्ण

A+ A A-

१३औं दक्षिण एसियाली खेलकुद (साग) अन्तर्गत क्रिकेट प्रतियोगिताको उपाधि पुरुषतर्फ श्रीलंका र महिलातर्फ बंगलादेशले जितेका छन् । त्रिवि क्रिकेट मैदान कीर्तिपुरमा भएको पुरुष क्रिकेटमा श्रीलंकाले बंगलादेशलाई ९ विकेटले हराउँदै स्वर्ण पदक जितकाे हाे ।

पहिले ब्याटिङमा उत्रिएको बंगलादेशले निर्धारित २० ओभरमा ६ विकेट गुमाउँदै १ सय ५१ रनकाे लक्ष्य प्रस्तुत गरेकाे थियाे । जवाफीमा श्रीलंकाले १६ दशमलव १ ओभरमा १ विकेट गुमाएर लक्ष्य भेट्टायो । श्रीलंकाका लागि लासिथ क्रुसपुल र ओपनर पाथम निसंकाले अर्धशतक बनाए।

विष्फोटक ब्याटिङ गरेका लासिथले ४१ बलको सामना गर्दै ७३ रन जोडे। उनले ४ छक्का र ७ चौका प्रहार गरे । त्यस्तै, पाथम निसंकाले ६७ रनको योगदान गरे। बंलादेशका लागि एक मात्र विकेट मेहेदी हसन रानाले लिए ।

यसअघि बंगलादेशले निर्धारित २० ओभरमा ६ विकेट गुमाउँदै १ सय ५० रन बनायाे । बंगलादेशका लागि यासिर अलीले सर्वाधिक ५१ रन जोडे। त्यस्तै महिदुल स्लाम अंकनले ४४ र जाकिर हसनले २० रन जोड्न बाहेक अन्य ब्याट्स्म्यानले दोहोरो अंकको योगफल तयार पार्न सकेनन् ।

उता, १३औं सागअन्तर्गत महिला क्रिकेटतर्फको स्वर्ण भने बंगलादेशले जितेको छ । रमाइलो कुरा के छ भने पुरुष क्रिकेटमा बंगलादेशलाई हाएको श्रीलंका महिला क्रिकेटमा भने २ रनमा चुकेको हो । पोखरामा आइतबार भएको फाइनलमा श्रीलंकालाई बंगलादेशले २ रनले स्वर्ण चुम्नबाट रोक्यो ।

बंगलादेशबाट ९२ रनको सामान्य लक्ष्य पाए पनि श्रीलंकाले २० ओभरमा ९ विकेट गुमाएर ८९ रन मात्र बनाउन सक्यो । लंकाकी कप्तान हर्सिता माधवी ३२, लिहिनी अप्सराले २५ रन बनाए । बंगलादेशकी नहिदा अख्तरले २ विकेट हात पारिन् ।

यसअघि पहिले ब्याटिङ गरेको बंगलादेशले २० ओभरमा ८ विकेट गुमाएर ९१ रनको योगफल तयार गरेको थियो । बंगलादेशका लागि निगर सुल्ताना २९ रन, सन्जिदा इस्लाम र फाहिम खातुन समान १५/१५ रन जोडे । श्रीलंकाकी उमिषा थिमासिनीले ४ विकेट लिइन् । आयोजक नेपालले भने कास्य पदकमा चित्त बुझायो ।

प्रकाशित मिति: आइतबार, मंसिर २२, २०७६ १४:४७