शाइन रेसुंगा विकास बैंकः लगानीकर्ता किन बेच्न चाहन्छन् सेयर ? (समग्र विश्लेषण)

शाइन रेसुंगा विकास बैंकः लगानीकर्ता किन बेच्न चाहन्छन् सेयर ? (समग्र विश्लेषण)

A+ A A-

दुई संस्था प्राप्तिपछि नाफा वृद्धिदर उच्च
औसतमा वार्षिक २४ प्रतिशत लाभांश
बढ्ने प्रयास, लगानीकर्तामा अन्योल कायमै

माघ २०६५ बाट ३ जिल्ले विकास बैंकको रूपमा सञ्चालनमा आएको शाइन डेभलपमेन्ट बैंक अहिले विभिन्न मर्जर र प्राप्तिको चरणसँगै राष्ट्रियस्तरको विकास बैंक बनेको छ । शाइन र रेसुंगा डेभलपमेन्ट बैंक एकआपसमा मर्जर भएर बनेको शाइन रेसुंगा डेभलपमेन्ट बैंकले हालै पूर्णिमा विकास बैंक र भार्गव विकास बैंकलाई समेत प्राप्ति गरेको थियो ।

चालू आवको पहिलो त्रैमासमा बैंकले ३२ प्रतिशतले नाफा वृद्धि गरेर १२ करोड ७४ लाख रूपैयाँ नाफा कमाएको छ । नाफा रकमका आधारमा यो बैंक सबै विकास बैंकमध्ये चौथो स्थानमा छ ।

राष्ट्र बैंकले राष्ट्रियस्तरको विकास बैंकलाई तोकेको चुक्ता पुँजीभन्दा केही रकम वृद्धि गरेको बैंकले बोनस सेयरमा समेत जोड दिँदै आएको देखिन्छ । पाँच वर्षयता वार्षिक औसत २४.२१ प्रतिशत लाभांश दिएको छ । पहिलो त्रैमासमा नाफापछि १ प्रतिशत लाभांश दिन सक्ने क्षमता छ । निश्चय नै आव अन्त्यसम्ममा यो दर बढ्ने नै छ ।

८७ करोड रूपैयाँ ब्याज आम्दानी गरेको बैंकको ब्याज खर्च नै ५४ करोड छ । शुल्क, कमिसनलगायत अन्य आम्दानीबाट ५ करोड रूपैयाँ कमाएको छ । खुद ब्याज आम्दानी रकमका आधारमा पनि बैंक साताैं स्थानमा छ ।

प्राप्तिको कारण बैंकको निक्षेप र कर्जा दुवैको वृद्धिदर उच्च छ । यद्यपि यी दुवैमा यो राष्ट्रियस्तरका विकास बैंक अन्य विकास बैंकहरूमध्ये सातौं स्थानमा छ । यस आधारमा कर्जा र निक्षेप दुवैको बजार हिस्सा ८ प्रतिशत छ ।

बैंकको जोखिम सम्पत्तीको आधारमा पुँजी कोष पर्याप्तता अनुपात १७ प्रतिशत छ । बैंकको जगेडा तथा सञ्चित कोषमा कुल १ अर्ब २१ करोड रूपैयाँ छ । बैंकको कोष लागत ८.०४ प्रतिशत रहेकोमा केही घटेर ७.९० भएको छ ।

खराब कर्जाको दर सामान्य बढे पनि यो १ प्रतिशतभन्दा मुनि नै छ । यो ०.४५ प्रतिशतमा सीमित पार्न सफल भएको छ । बैंकले खराब कर्जाका आधारमा सो कर्जाको २ सय ७७ प्रतिशत रकम राखेको छ । प्रावधानको रूपमा ४ करोड ८८ लाख रूपैयाँ राखेको छ । निक्षेप प्राथमिक पुँजीका आधारमा कर्जा लगानी अनुपात ७७.४९ छ । बैंकसँग थप लगानीका लागि पुँजी कम पर्न थालेको छ ।

बैंकको प्रतिसेयर आम्दानी १९.१२ रूपैयाँ, मूल्य आम्दानी अनुपात १३.२३ गुणा र प्रतिसेयर नेटवर्थ १ सय ४६ रूपैयाँ छ । प्रकाशित विवरणअनुसार प्रतिसेयर आम्दानीमा विकास बैंकहरूमा चौथो र प्रतिसेयर नेटवर्थ आधारमा आठौं स्थानमा छ ।

बैंकको अध्यक्षमा राजेन्द्रप्रसाद श्रेष्ठ र प्रमुख कार्यकारी अधिकृतमा प्रकाश पौडेल छन् । आव २०७३/७४ को वित्तीय विवरणअनुसार बैंकमा सबैभन्दा धेरै सेयर स्वामित्व दिलीपराज मास्केको छ ।

वियरिश प्रवृत्ति

बैंकको सेयर मूल्य बर्षकै न्यून विन्दु २ सय २३ विन्दुमा पुगेर बढ्ने क्रममा छ । हाल मूल्य २ सय २९ रूपैयाँ छ ।

सेयर कारोबार अधिक बिक्रीको क्षेत्रमा छ । यद्यपि यो स्केल वृद्धि भइरहेको छ । १४ दिने आरएसआई सूचकको स्केल २६.४१ मा आएको छ । आरएसआई स्केल ३० भन्दा मुनि भए सेयर अधिक बिक्री क्षेत्रमा, ३० देखि ७० बीचमा भए सन्तुलित क्षेत्रमा र ७० भन्दा माथि भए अधिक खरिद क्षेत्रमा रहेको विश्लेषण गरिन्छ ।

हालै मात्र सिम्पल मुभिङ एभरेज रेखा क्रसओभर भएको छ । २१ दिने रेखाले ७ दिने रेखालाई काटेर माथि लागेको छ । मूल्य वियरिश प्रवृत्तिमा आएको यसले संकेत गर्छ । पीभट विश्लेषणले भने अब बजार बढ्ने क्रममा नै रहे एक महिनामा २ सय ४९ मा पहिलो प्रतिरोध र घट्ने क्रममा रहे २ सय १६ मा पहिलो टेवा पाउने देखाउँछ ।

बैंकको सेयर मूल्य गत साताको तेस्रो दिन बैंकको सेयर मूल्यले कालो लामो मैनबत्ती आकृति बनाएको छ । त्यसपछि डोजी आकृति बनाएर बजार घट्न रोकिने कमजोर संकेत दिए पनि संकेतअनुसार बजार बढेको छ । त्यसयता बजार समान्य रूपमा बढ्न थालेको छ ।

तर, तीन दिनकाे कारोबारमा पनि कालो मैनबत्तीको आकृतिको उच्च विन्दु कट्न सकेको छैन । यसले मूल्य बढ्न नसकिरहेको समेत देखाउँछ । कारोबार गर्नुअघि पहिलो दिनको कारोबार हेर्नु सही हुन्छ ।

प्रकाशित मिति: आइतबार, मंसिर २२, २०७६ १२:२१