दानापानी बन्द गर्छु भन्ने महतो बने काठमाडौंका सम्धी

A+ A A-

राष्ट्रिय जनता पार्टी नेपालका अध्यक्षमण्डलका संयोजक राजेन्द्र महताेका छोराको बिहे काठमाडौंका रैथाने नेवार समुदायमा भएको छ । बुधबार होटल हिमालयमा काठमाडौंको डिल्लीबजार बस्ने प्रकाशकाजी तुलाधरकी छोरी पलिशा तुलाधारसँग महतोका छोरा राघवेन्द्र महतोको बिहे भएको छ ।

मैथिली परम्पराअनुसार भएको सो विवाहमा पहाडी र मधेशी दुवै समुदायका व्यक्तिहरू सहभागी थिए । पूर्वप्रधानमन्त्री डा.बाबुराम भट्टराईले मारवाडी समुदायमा प्रचलित फेटा बाँधेकाे तस्वीर सामाजिक सञ्जालमा राखेका छन् ।

फेटा लगाएको तस्वीर पोष्ट गर्दै उनले लेखेका छन, ‘राजपा नेता राजेन्द्र महतोका सुपुत्र राघवेन्द्र महतोको काठमाडौंकी सुश्री पालिशा तुलाधरका साथ सुसम्पन्न शुभ विवाहमा पहाड र मधेशको संस्कृतिको रोचक फ्युजन !’

महतोमाथि काठमाडौंमाथि नाकाबन्दीमा सबैभन्दा बढी भूमिका निर्वाह गरेको आरोप लाग्ने गरेको छ । आफूलाई कट्टर मधेशवादी नेताको छवि बनाएका महतोको छोराको विहेको अहिले निकै चर्चा रहेको छ ।

काठमाडौंमा उनको आफ्नै घर पनि छ । उनी धेरै पहिलादेखि काठमाडौंमा बस्दै आएका छन् । तर, आन्दोलनको क्रममा काठमाडौंको नजरमा उनले जे छवि बनाएका थिए, आज उनै महतो काठमाडौंसँग पारिवारिक सम्बन्ध बनाएपछि जानकारहरूले यसलाई राम्रो मानेका छन् ।

महतोले नेवारी समुदायमा छोराको बिहे गर्नु निकै साहसिक काम भएको विश्लेषण भइरहेको छ । संयोजक महतोजस्तो व्यक्तिले काठमाडौंसँग पारिवारिक सम्बन्ध कायम गरेपछि नेपाली राजनीतिमा राष्ट्रिय एकताको ठूलो सन्देश जाने विश्लेषकहरू बताउँछन् ।

सामाजिक परिवर्तनको क्षेत्रमा महतोले लिएको यो ठूलो कदम हो । त्यसै पनि पछिल्लो समय उनी नेपालमा हिमाल, पहाड र मधेशका उत्पीडित समुदाय नमिलेसम्म अधिकार प्राप्त हुँदैन भन्ने मान्यता राख्दै आएका छन् ।

मधेशी र पहाडका आदिवासी जनजाति मिलेर अधिकारका लागि संघर्ष गर्नुपर्छ भनि उनले पटक पटक पार्टीमा आवाज उठाउँदै आएका छन् । र, उनले नेवारी समुदायमा छोराको बिहे गरेर त्यसको सुरूवात आफ्नै परिवारबाट गरेका छन् ।

हुन त राघवेन्द्र र पलिशाको चिनजान पहिलादेखि नै थियो । खुमलटारस्थित एआईटी कलेजमा सँगै पढ्दा दुई जनाबीचमा चिनजान भएको थियो । त्यही चिनजान प्रेममा परिवर्तन भयो । र, पारिवारिक सहमतिमा दुई दुवैकाे बिवाह भएको हो ।

पलिशा अनलाइन कम्पनी ‘दराज’मा कार्यरत छिन् भने राघवेन्द्र फोहाेरमैलाको क्षेत्रमा काम गर्ने डोको रिसाइकलरका सञ्चालक हुन् । दुवै जनाले एमबीए गरेका छन् ।

प्रकाशित मिति: शुक्रबार, मंसिर २०, २०७६ ११:५५