एसबीआई बैंकः सावधानीपूर्वक कर्जा विस्तार, लाभांश पछि के होला सेयर मूल्य ? (समग्र विश्लेषण)

एसबीआई बैंकः सावधानीपूर्वक कर्जा विस्तार, लाभांश पछि के होला सेयर मूल्य ? (समग्र विश्लेषण)

A+ A A-

नाफा घट्यो
खुद्रा कर्जा विस्तार हुँदै
लाभांश समायोजनको मूल्यमा असर

२३ असार २०५० मा सञ्चालनमा आएको नेपाल एसबीआई बैंकले चालू आवको पहिलो त्रैमासमा ४३ करोड ७२ लाख रुपैयाँ नाफा कमाएको छ । गत आवको सोही अवधिको तुलनामा बैंकको नाफा १०.७२ प्रतिशतले घटेको हो । समग्र बैंकिङ क्षेत्रको तुलनामा बैंकको नाफा पनि औसतभन्दा कम छ ।

बैंकले ८ अर्बको चुक्ता पुँजी पुर्‍याउन बोनस र एफपीओमा जोड दियो । बैंकले पछिल्लो केही वर्षयता नगद लाभांशमा बढी जोड दिन लागेको छ । बैंकले मंसिर २९ मा हुने साधारणसभामा ६ प्रतिशत बोनस सेयर र १०.८४ प्रतिशत नगद लाभांश दिने घोषणा गरेको छ ।

यससँगै विगत ५ वर्षमा बार्षिक औसत २६.३६ प्रतिशतको लाभांश बैंकले दिएको छ । बैंकले हालसम्मको नाफाका आधारमा लगानीकर्तालाई ३१ करोड ९१ लाख रुपैयाँ वितरण गर्न सक्छ । यो भनेको चुक्ता पुँजीका आधारमा ३.७७ प्रतिशत हो । निश्चय नै आव अन्त्यमा यो दर बढ्न सक्छ ।

बैंकको सञ्चित कोषमा ३ अर्ब ८५ करोड रुपैयाँ छ । सञ्चित तथा जगेडामा रहेको रकम औसतभन्दा माथि छ । बैंकको ब्याज आम्दानी ८.६७ प्रतिशतले बढे पनि र खुद ब्याज आम्दानी करिब २.२९ प्रतिशतले घटेको छ । निक्षेपमा खासै वृद्धि नभए पनि र कर्जामा केही वृद्धि छ । तर, ब्याज खर्च केही वृद्धि भएकोले बैंकको खुद ब्याज आम्दानी भने घटेको छ ।

रकमको आधारमा निक्षेप संकलन र कर्जा लगानीमा भने समग्र क्षेत्रको औसतभन्दा बैंक माथि छ । २ अर्ब ८५ करोड ब्याज आम्दानी गरेको बैंकको खुद ब्याज आम्दानीमा १ अर्ब ३ करोड पुगेको छ । कोष लागत भने ६.२० प्रतिशतबाट बढेर ७.१७ पुगेको छ ।

खराब कर्जा अनुपात सीमान्तदरमा घटेर ०.१७ प्रतिशतमा सिमित छ । कर्जा नोक्सानको सम्भावनाका आधारमा बैंकले ४ करोड ५५ लाख रुपैयाँ प्रावधान राखेको छ ।

निक्षेप प्राथमिक पुँजीको आधारमा कर्जा लगानी अनुपात ७८.५८ प्रतिशत छ । बैंकसँग थप लगानीको स्पेस छैन । बैंकले २ अर्ब ५० करोड रुपैयाँको ऋणपत्र जारी गर्न धितोपत्र बोर्डमा आवेदन दिएको छ । बोर्डले मंसिर ४ गते प्रतिक्रिया दिएको छ । अनुमति पाएपछि यसले बैंकलाई लगानी गर्न स्पेस बढ्नेछ ।

बैंकको प्रतिसेयर आम्दानी २०.७० रुपैयाँ, प्रतिसेयर नेटवर्थ १ सय ७२ रुपैयाँ र मूल्य आम्दानी अनुपात १९.३२ गुणा छ ।

वित्तीय क्षेत्रमा भारत र नेपालबीच संयुक्त लगानीको पहिलो बैंकमा कुनै समय कृषि विकास बैंकको समेत लगानी थियो । हाल बैंकमा एनबीआई बैंक भारतको सबैभन्दा धेरै सेयर स्वामित्व छ । यस बैंकको अध्यक्षमा बीआरएस सत्यनारायण छन् । बैैंकको प्रमुख कार्यकारी अधिकृतमा अनुकुल भट्टनागर छन् ।

हालै क्रेडिट रेटिङ एजेन्सी इक्रा नेपालले कम्पनीले जारी गर्न लागेको ऋणपत्रलाई एल ए ए रेटिङ दिएको छ ।

गत आव अन्त्यसम्मको तथ्यांकका आधारमा रेटिङ कम्पनीले गरेको विश्लेषणका केही मुख्य पक्षहरू निम्न छन्ः

–करिब ८ प्रतिनिधि माउ संस्था एसबीआई भारतबाट नियुक्त हुने बैंकमा अनुभवी व्यवस्थापन समूह

–गुणस्तरीय सम्पत्ती (भाका नाघेको कर्जा १.८ प्रतिशत मात्र)

–सावधानीपूर्वक कर्जा विस्तार (२ आर्थिक वर्षमा समग्र क्षेत्र २० प्रतिशतले बढ्दा बैंकको १८ प्रतिशत)

–कर्जा र निक्षेपको आधारमा समग्र बजारमा ३.५ प्रतिशत हिस्सा

–कम लागतको निक्षेपको हिस्सा घट्दै (३ वर्ष अघि ५१ प्रतिशत रहेकोमा ३९ प्रतिशतमा सीमित)

–सञ्चालन लागत बढ्दा बेस रेटमा वृद्धि, यसले प्रतिस्पर्धामा दबाब

–खुद्रे कर्जामा उल्लेख्य वृद्धि हुँदा खुद ब्याज मार्जिनमा सुधार (४.३० प्रतिशत)

–गैरब्याज आम्दानीमा सुधार

पर्ख र हेर

बैंकको सेयर एक वर्षयताकै न्यून विन्दु (३ सय ४८ रुपैयाँ) नजिक छ । हाल घोषणा भएको लाभांश प्राप्त गर्ने अन्तिम दिन कटिसकेको र लाभांशको समायोजन समेत भएकाले मूल्य निकै तल ओर्लिएको हो । यद्यपि मूल्य बढ्ने प्रयासमा छ ।

१४ दिने आरएसआई सूचकले बैंकको सेयर सूचक स्केल १४.४७ मा देखाएको छ । बैंकको सेयर अधिक विक्रीको क्षेत्रमा रहेको छ । आरएसआई स्केल ३० भन्दा मुनि भए सेयर अधिक बिक्री क्षेत्रमा, ३० देखि ७० बीचमा भए सन्तुलित क्षेत्रमा र ७० भन्दा माथि भए अधिक खरिद क्षेत्रमा रहेको विश्लेषण गरिन्छ ।

२१ दिने सिम्पल मुभिङ एभरेज रेखा ७ दिने रेखालाई तल पारेरै दुरी कायम गरिरहेको छ । मूल्यमा सुधार देखिइनसकेको यसले संकेत गर्छ । पीभट विश्लेषणले भने अब बजार बढ्ने क्रममा रहे आगामी एक महिनामा ३ सय ८८ मा पहिलो प्रतिरोध र घट्ने क्रममा रहे ३ सय २६ मा पहिलो टेवा पाउने देखाउँछ ।

बैंकको सेयर मूल्यले अन्तिम तीन दिनमा पहिलो दिन कालो मैनबत्ती, दोस्रो दिन सेतो मैनबत्ती बनाएर पियर्सिङ लाइन बुलिस आकृति बनाएको छ । यसले वियरिश प्रवृत्ति प्रवेश गर्ने र पुरानो प्रवृत्तिमा परिवर्तन आउने संकेत गर्छ ।

यसलाई मध्यम संकेतको रूपमा लिइन्छ । अन्तिम दिन डोजी आकृति बनेको छ । यसले भने लगानीकर्ताहरू सो तहभन्दा बढी मूल्य तिर्न इच्छुक नदेखिएको संकेत गर्छ । डोजीको संकेत तुलनात्मक रूपमा कमजोर हुने भएकाले आगामी दिनमा बजार घट्ने सम्भावना पनि उत्तिकै कम छ । पछिल्लो कारोबार हेरेर नै निर्णय लिनु सही हुन्छ ।

प्रकाशित मिति: बिहीबार, मंसिर १९, २०७६ १०:३२