शिक्षा इकाई प्रमुख फर्काइदिन मन्त्रालयमा गुहार

A+ A A-

डोटीका शिक्षा विकास तथा समन्वय इकाई प्रमुखलाई कार्यालयमा फर्कादिन जिल्ला प्रशासनले शिक्षा, विज्ञान तथा प्रविधि मन्त्रालयसँग् गुहार मागेको छ । लामो समयदेखि बिदामा बस्दै आएका प्रमुख अमरप्रसाद भट्ट सम्पर्कमा नआएपछि मन्त्रालयलाई पत्र लेखेर प्रशासनले कि अर्को व्यक्ति वा उनी भट्टलाई तत्काल जिल्ला पठाइदिन आग्रह गरेको हो ।

लामो समयदेखि बिदामा बस्दै आएका डोटीका शिक्षा विकास तथा समन्वय इकाई प्रमुख भट्ट

सात महिनाको अवधिमा प्रमुख भट्ट कार्यालयमा ४४ दिन मात्र हाजिर भएका छन् । प्रमुख नहुँदा कार्यालयमा आउने सेवाग्राही रित्तो हात फर्किन बाध्य छन् । शिक्षाका योजना, अनुगमनलगायतका कामहरू ठप्प भएको भन्दै प्रशासनले भट्टको सट्टा अर्को प्रमुख पठाउन अनुरोध गरेको छ । उनको लापरबाहीका कारण कार्यालयको काम लथालिंग भएकोले जिम्मेवार व्यक्ति पठाउन पत्रमा आग्रह गरिएको छ ।

पत्रमा इकाई प्रमुख लामो समयदेखि कार्यालयमा अनुपस्थित रहेको, उपस्थित हँुदासमेत आफ्नो जिम्मेवारी पूरा नगर्ने गरेको, कार्यालयको नाममा रहेको मोबाइल फोनसमेत आफूसँग लिएर प्रयोग गर्ने गरेको, सरोकारवालाले गरेको फोन नउठाउने, जिल्ला भित्रका विद्यालय व्यवस्थापन समिति, सरकारी कार्यालय र स्थानीय सरकारकाबाट आउने गुनासा सुनुवाई नगर्ने गरपछि मन्त्रालयलाई पत्र लेख्न बाध्य भएको प्रमुख जिल्ला अधिकारी टेकनारायण पौडेलले बताए ।

इकाई प्रमुखको हाजिर हेर्दा बैशाख १ गते देखि मंसिर १७ गतेसम्म जम्मा ४४ दिनमात्र कार्यालयमा उपस्थित भएको देखिन्छ । कात्तिक २२ गतेदेखि काज लेखेर काठमाडौंमा बिदामा बसेको, मंसिर ८ र ९ गते रित्त। रहेको, मंसिर १०, ११, १२ र १३ गते पर्व बिदा र मंसिर १५ देखि पुस ५ गतेसम्म घरबिदा लेखेको देखिएको प्रजिअ पौडेलले बताए ।

शिक्षा विकास तथा समन्वय इकाई डोटीका प्रमुखको व्यवहार र कार्यशैलीका कारण जिल्लाको शैक्षिक क्षेत्रमा अनपेक्षित समस्या सिर्जना हुनसक्ने भन्दै प्रशासनले समस्या समाधानका लागि माथिल्लो निकायबाट समाधान खोज्न अनुरोध गरेको छ ।

जिल्ला तहमा सञ्चालन हुने गरेका सार्वजनिक कार्यक्रममा सबैभन्दा बढी गुनासा र आलोचना हुने कार्यालयको रूपमा शिक्षा विकास तथा समन्वय इकाईलाई लिने गरिन्छ ।

प्रकाशित मिति: बुधबार, मंसिर १८, २०७६ १२:२२