विश्व कीर्तिमानी अञ्जलीबारे यस्ताे लेखे अन्तर्राष्ट्रिय मिडियाले

A+ A A-

नेपाली महिला क्रिकेट टिमकी अञ्जली चन्द एकाएक चर्चामा आइन् । १३औं दक्षिण एसियाली खुलकुद (साग)अन्तर्गत १६ मंसिरमा पोखरामा भएको टी–२० खेलमा अञ्जलीले २ ओभर र १ बलमा ६ विकेट लिएर विश्वभर चर्चामा रहेकी हुन् ।

उनको यो कीर्तिमान विश्व कीर्तिमान भएकाले पनि उनी विश्वभरका क्रिकेटप्रेमीबीच चर्चामा रहेकी हुन् ।

बलर अञ्जलीले हिजो भएको माल्दिभ्ससँगको खेलमा ६ विकेट लिइन्, त्यसमा पनि शून्य रन दिएर । अञ्जलीको यो कीर्तिमानलाई लिएर विश्वका विभिन्न मिडियामा उनी छाइरहेकी छिन् ।

भारतबाट प्रकाशन हुने हिन्दुस्तान टाइम्सले भनेको छ, ‘अञ्जलीले सोमबार असामान्य नतिजा दिइन्, अञ्जली चन्दले महिला टी–२० को विश्व कीर्तिमान तोडेकी छन् ।’

हिन्दुस्तान टाइम्सले अगाडि भनेको छ, ‘अञ्जलीको यस रेकर्डसँगै नेपाली महिला क्रिकेटमा चालू १३औं सागमा नेपालले राम्रो र बलियो सुरुवात गरेको छ ।’

पोखरामा जारी यस खेलमा नेपालले माल्दिभ्स, बंगलादेश र श्रीलंकासँग प्रतिस्पर्धा गर्दै छ ।

पुरुष टी–२० तर्फ भने भारतको चेन्नई सुपर किङ्सका तीव्र बलर दीपक चहारले बंगलादेशविरुद्धको खेलमा ३.२ ओभरमा ६ विकेट लिएर कीर्तिमान राखेका थिए ।

यसरी नै भारतबाटै प्रकाशन हुने टाइम्स अफ इयिडयाले ‘नेपालकी अञ्जली चन्दले लिइन् ६/०, महिला टी–२० की मेधावी बलर’ शीर्षकमा चन्दबारे लेखेको छ ।

उक्त पत्रिकाले लेखेको छ, ‘नेपालकी बलर अञ्जली चन्दले नेपालको पोखरामा जारी १३औं सागमा माल्दिभ्सविरुद्धको खेलमा ६/० विकेट लिएर विश्व कीर्तिमान कायम गरेकी छिन् । यसरी एक बलरले कुनै पनि अन्तर्राष्ट्रिय क्रिकेट प्रतियोगितामा कुनै रन नदिई ६ विकेट लिएको इतिहास छैन ।’

यसले लेखेको छ, ‘२४ वर्षीया अञ्जलीले माल्दिभ्सका ६ ब्याट्सम्यानलाई २.१ ओभर अर्थात् १३ बलमा आउट गरिन् ।’

यसरी नै भारतबाटै प्रकाशन हुने इण्डिया टुडेले ‘६ विकेट, ० रन : नेपालकी अञ्जली चन्दले सागमा रचिन् टी–२० इतिहास’ शीर्षकमा भनेको छ, ‘नेपाली बलर अञ्जली चन्दले सोमबार पोखरामा भएको खेलमा नयाँ विश्व कीर्तिमान कायम गरेकी छिन् ।’

‘नेपालकी अञ्जली चन्दले रचिन् इतिहास’ भन्दै स्पोर्ट्स डट एनडीटीभी लेख्छ, ‘नेपालकी अञ्जली चन्दले माल्दिभ्सलाई कुनै पनि रन नदिई ६ विकेट लिएकी छिन् । यो विश्व क्रिकेट इतिहासमै नयाँ कीर्तिमान हो ।’

उता, आजतक इन टुडेले ‘यी महिला बलरले तोडिन् सबैको कीर्तिमान, रन नदिई लिइन् ६ विकेट’ शीर्षकमा भनेको छ, ‘नेपालकी महिला क्रिकेट खेलाडी अञ्जली चन्दले सोमबार कुनै रन नदिई ६ विकेट लिएर टी–२० अन्तर्राष्ट्रियमा इतिहास रचेकी छिन् । उनले पोखरामा चलिरहेको दक्षिण एसियाली खेलकुदमा माल्दिभ्सविरुद्ध सुन्दर प्रदर्शन गर्दै यस्तो इतिहास रचेकी हुन् । यससँगै अञ्जली महिला र पुरुष दुवैतर्फ सर्वश्रेष्ठ प्रदर्शन गर्ने क्रिकेट खेलाडी बनेकी छिन् ।’

यसअघि माल्दिभ्सकी मेस इल्यसाले चीनविरुद्धको खेलमा तीन रन दिएर ६ विकेट लिएको विश्व कीर्तिमान रहेको थियो ।

प्रकाशित मिति: मंगलबार, मंसिर १७, २०७६ १२:३३