साग २०१९ : कुन खेल कहाँ हुँदै ? कसको सहभागिता कुन विधामा ?

A+ A A-

नेपालले तेस्रो पटक आयोजना गरेको साग खेलकुद समारोहको भव्य उद्घाटन आइतबार काठमाडौंको दशरथ रंगशालामा राष्ट्रपति विद्यादेवी भण्डारीले गरेकी थिइन् ।

कुन खेल कहाँ हुँदै छ ?

यस पटकका सम्पूर्ण खेलहरू नेपालका तीन शहरमा हुनेछन् ।

काठमाडौंभित्र दशरथ रंगशालामा एथलेटिक्स, पुरुषतर्फको फुटबल र समारोहहरू हुनेछन् ।

अन्तर्राष्ट्रिय स्पोर्ट्स कम्प्लेक्समा बक्सिङ, कराते, सुटिङ, स्क्वास, पौडी, तेक्वान्दो र टेनिस खेल हुनेछन् ।

त्रिपुरेश्वर कभर्ड हलमा बास्केटबल र भलिबल हुनेछन् भने त्रिवि क्रिकेट मैदानमा पुरुषतर्फको क्रिकेट हुनेछ ।

गोर्कणको शहीद पार्कमा साइक्लिङ (माउण्टेन बाइकिङ) हुनेछ भने रिङ रोडमा साइक्लिङ हुनेछ ।

कीर्तिपुर कभर्ड हलमा फेन्सिङ हुनेछ भने गोकर्ण फरेस्ट रिसोर्टमा गल्फ हुनेछ ।

आर्मी फिजिकल फिटनेस सेन्टर लगनखेलमा जुडो र उस्सु हुनेछ भने एपीएफ हल हलचोकमा कबड्डी हुनेछ ।

नयाँ बजार कीर्तिपुरमा खोखो हुनेछ भने लैनचौर टेबुलटेनिस हलमा टेबुल टेनिस खेल हुनेछ ।

यसरी नै पोखरामा पोखरा ब्याडमिन्टन कभर्ड हलमा ब्याडमिन्टन हुनेछ भने पोखरा क्रिकेट रंगशालामा महिला क्रिकेट हुनेछ ।

पोखरा रंगशालामा आर्चरी र महिला फुटबल हुनेछ भने पोखरा कभर्ड हलमा ह्यान्डबल हुनेछ ।

यसैगरी बसुन्धरा पार्कमा ट्रायथलन हुनेछ ने बाराही घाटमा बिच फुटबल हुनेछ । यस्तै, माटेपानीमा भारोत्तोलन हुनेछ ।

उता, जनकपुरको जनकपुर कभर्ड हलमा रेस्लिङका सम्पूर्ण खेलहरू हुनेछन् ।

खेलका विधा र पदकहरू

यस पटकको सागमा २७ खेलहरू समावेश गरिएका थिए तर कम्तीमा चार देशले सहभागिताका लागि दर्ता नगरे खेल नहुन सक्ने प्रावधान छ । तसर्थ, प्याराग्लाइडिङमा नेपाल र पाकिस्तानले मात्र खेलका लागि दर्ता गरेकाले प्याराग्लाइडिङ खेल नहुने भएको छ । प्याराग्लाइडिङ प्रथम पटक हुन लागेको थियो । गल्फ र कराते नेपालले आयोजक राष्ट्रका हैसियतले आफैं राखेको हो ।

खेल र पदक

आर्चरी– १० पदक
एथलेटिक्स– ३६ पदक
ब्याडमिन्टन– ७ पदक
बास्केटबल– २ पदक
बक्सिङ– १६ पदक
क्रिकेट– २ पदक
फेन्सिङ– १२ पदक
फुटबल– २ पदक
गल्फ– ४ पदक
ह्यान्डबल– २ पदक
जुडो– १५ पदक
कबड्डी– २ पदक
कराते– १९ पदक
खोखो– २ पदक
सुटिङ– ११ पदक
स्क्वास– ४ पदक
पौडी– ३८ पदक
टेबलटेनिस– ७ पदक
तेक्वान्दो– २९ पदक
टेनिस– ७ पदक
भारोत्तोलन– २० पदक
रेस्लिङ– २० पदक
उस्सु– २२ पदक

साइक्लिङअन्तर्गत माउण्टेन बाइकिङमा ४ पदक र रोड साइक्लिङमा ४ पदक छन् । भलिबलअन्तर्गत विच भलिबलमा २ र भलिबलमा २ पदक रहेको छ । त्यस्तै, ट्रायथलनअन्तर्गत डुआथ्लोनमा २ पदक र ट्रायथलनमा ३ पदक छन् ।

यस पटक सम्पूर्ण २६ विधाका खेलमा ३१७ स्वर्ण, ३१७ रजत र ४८१ कास्य गरी कुल १ हजार ११५ पदकका लागि प्रतिस्पर्धा भइरहेको छ ।

देश र सहभागी संख्या

यस पटकको सागमा सात राष्ट्रका खेलाडीहरूले सहभागिता जनाएका छन् । सात देशका गरेर जम्मा २ हजार ७१५ प्रतिस्पर्धी रहेका छन् । २६ विधामै प्रतिस्पर्धा गर्ने नेपालबाट सबैभन्दा धेरै ५९६ प्रतिस्पर्धी रहेका छन् ।

त्यस्तै, बंगलादेशबाट २५ विधाका खेलका लागि ४७०, भुटानबाट १८ विधाका खेलका लागि ११६ र भारतबाट २२ विधाका खेलका लागि ४८७ प्रतिस्पर्धी रहेका छन् ।

त्यसैगरी, माल्दिभ्सबाट १२ विधाका खेलका लागि २१६, पाकिस्तानबाट १८ विधाका खेलका लागि २६६ र श्रीलंकाबाट २६ विधाका खेलका लागि ५६४ प्रतिस्पर्धी रहेका छन् ।

साग २०१९ को आयोजक नेपाल ओलम्पिक कमिटीले प्रत्यक्ष प्रसारणको अधिकार नेपाल टेलिभिजन, एपी–वान टीभी, इमेज च्यानल र एक्सन स्पोर्ट्सलाई दिएको छ ।

प्रकाशित मिति: सोमबार, मंसिर १६, २०७६ १६:२४