१३औं सागः कराते र तेक्वान्दोका स्वर्णको छिनोफानो आज

A+ A A-

१३औं दक्षिण एसियाली खेलकुद (साग) अन्तर्गत आज कराते र तेक्वान्दोसहित विभिन्न स्पर्धामा स्वर्ण पदकको छिनोफानो हुँदैछ । आइतबार औपचारिक उद्घाटन भएको सागमा भलिबल ११ मंसिरदेखि नै सुरु भएको थियो ।

नेपालले सागमा सबैभन्दा बढी पदक दिलाएकामे तेक्वान्दो र करातेका खेल आजबाट सुरु हुँदैछन् । सन् १९९९ मा नेपालमै आठौं साग आयोजना हुँदा यी दुई खेल एकसाथ भित्रिएका हुन् ।

त्यसपछि तेक्वान्दो लगातार चारपटक सागमा समावेश हुँदा कराते भने २०१६ मा भारतमा भएको १२औं संस्करणमा हुन सकेन भने नेपालले तेक्वान्दोमा स्वर्ण जित्न सकेन ।

यसपटक यी दुवै खेलमा नेपालले स्वर्ण जित्ने लक्ष्य राखेको छ । आजदेखि सुरु हुने दुई खेलको पहिलो दिनदेखि नै स्वर्णको छिनोफानो हुनेछ।

तेक्वान्दोमा ग्योरोगीमा १६ र पुम्सेमा १३ गरी कूल २९ स्वर्ण पदकका लागि प्रतिस्पर्धा हुँदैछ। यस्तै, करातेमा कुमुतेतर्फ १५ र कातातर्फ ४ गरी कूल १९ स्वर्णका लागि प्रतिस्पर्धा हुनेछ ।

तेक्वान्दोमा पुम्सेतर्फ समावेश १३ वटै स्वर्णको छिनोफानो आज एकै दिनमा हुनेछ । यस्तै, करातेमा व्यक्तिगत र टिम कातातर्फको ५ र कुमेतेको ५ गरी ९ स्वर्णको आज छिनोफानो हुनेछ ।

फुटबल र क्रिकेटको स्पर्धाहरू पनि आजदेखि नै सुरु हुनेछन् । क्रिकेटअन्तर्गत महिलातर्फको खेलहरू सोमबारदेखि पोखरामा सुरु हुनेछ । नेपालले उद्घाटन खेलमा माल्दिभ्ससँग खेल्दैछ ।

ब्याडमिन्टन र खोखोका खेलहरू सुरु भइसकेका छन् । ब्याडमिन्टन पोखरा र खोखो काठमाडौंकै कीर्तिपुरमा सुरु भएको हो । करिब ५ वर्षपछि दशरथ रंगशालामा सागअन्तर्गत पुरुष फुटबलका खेल हुनेछन् । भारतले नखेल्ने भएपछि पुरूष फुटबलमा ५ टिमले राउण्ड रोविनमा प्रतिस्पर्धा गर्नेछन् ।

जसअनुसार, पहिलो दिन सोमबार बंगलादेश र भुटान तथा माल्दिभ्स र श्रीलंकाबीच खेल हुनेछ । नेपालले मंगलबार भुटानसँग खेल्नेछ। महिला फुटबल मंगलबारदेखि पोखरामा सुरु हुनेछ।

११ मंसिरदेखि नै सुरु भएको भलिबलको भलिबलको सेमिफाइनलसम्मका खेलहरू भइसकेका छन् । नेपाली महिला भलिबल टोली फाइनलमा पुगेको छ भने पुरुष टोली बाहिरिएको छ ।

सोमबार कास्य पदकका लागि दुवैतर्फको खेल हुँदैछन् । पुरुषतर्फ सेमिफाइनलमा पराजित श्रीलंका र बंगलादेशबीच तेस्रो स्थानका लागि खेल हुनेछ भने महिलातर्फ श्रीलंका र बंगलादेशबीच नै कास्य पदकका लागि खेल हुनेछ।

फाइनल खेल भने मंगलबार हुनेछन् । पुरूषतर्फ स्वर्णका लागि भारत र पाकिस्तान खेल्नेछन् भने महिलातर्फ नेपाल र भारतबीच प्रतिस्पर्धा हुनेछ ।

प्रकाशित मिति: सोमबार, मंसिर १६, २०७६ ०९:३५