नेकपा एमालेले सबै राजनीतिक दल, नागरिक समाज र आमनेपाली जनतालाई लोकतन्त्रका पक्षमा र पश्चगमनका दुष्प्रयासका विरुद्ध गोलबन्द हुन आह्वान गरेको छ । आइतबार प्रधानमन्त्री एवं पार्टी अध्यक्ष केपी शर्मा ओलीको अध्यक्षतामा बसेको पार्टी सचिवालयको बैठकले यस्तो आह्वान गरेको हो ।
बैठकपछि महासचिव शंकर पोखरेलले जारी गरेको विज्ञप्तिमा भनिएको छ, ‘नेकपा एमाले लोकतान्त्रिक गणतन्त्र र नेपालको संविधानका रक्षाका लागि दृढतापूर्वक उभिने सङ्कल्प गर्दछ ।’ साथै, एमालेले राजावादीका नाममा काठमाडौंको तीनकुने, कोटेश्वर र जडीबुटीलगायतका क्षेत्रमा आपराधिक समूहले देखाएको उद्दण्डता, अराजकता, तोडफोड, लुटपाट, हत्या र हिंसाका घटनालाई अत्यन्त गम्भीर रूपमा लिँदै त्यसको निन्दा तथा भर्त्सना गरेको छ ।
विज्ञप्तिमा भनिएको छ, ‘शान्तिपूर्ण प्रदर्शनका नाममा सवारीसाधनको प्रयोग गरी सुरक्षा घेरा तोड्ने, सुरक्षाकर्मीमाथि आक्रमण गर्ने, हतियार खोस्ने, सर्वसाधारण नागरिकका घर, व्यावसायिक भवन, सञ्चारगृह, राजनीतिक दलका कार्यालय र सरकारी भवनमाथि आगजनी गर्ने, लुटपाट गर्ने, जानी–जानी हिंसा र आतङ्क सिर्जना गर्ने तथा मुलुकको लोकतान्त्रिक प्रणालीलाई बिथोलेर अराजकतातिर धकेल्नेजस्ता अराजक र आपराधिक क्रियाकलापको छानबिन गरी दोषीउपर तत्काल कारबाहीको प्रक्रिया अघि बढाउन सरकारको ध्यानाकषर्ण गर्दछ ।’
लगातार संसद अवरोधका विषयमा पनि एमाले सचिवालयमा छलफल भएको छ । महासचिव पोखरेलले जारी गरेको विज्ञप्तिमा भनिएको छ, ‘प्रतिनिधिसभा र राष्ट्रियसभाको अवरोधका कारणले प्रतिस्थापन विधेयक पारित गर्ने प्रक्रियामा व्यवधान सिर्जना भइरहेको प्रति बैठकको ध्यानाकर्षण भएको छ । संविधान र कानुनको व्यवस्थाअनुरुपको कार्यसम्पादनमा उत्पन्न बाधा हटाउनका लागि प्रतिपक्षी दलहरूलाई अनुरोध गर्दछ । सरकारी विधेयकलाई संविधान र कानुनको व्यवस्थाअनुरुप सम्पादन गर्ने कर्तव्यतर्फ राष्ट्रियसभा अध्यक्ष र प्रतिनिधिसभाका सभामुखको ध्यानाकर्षणसमेत गर्दछ ।’
यस्तै, एमालेले आगामी ९ वैशाखमा पार्टी स्थापना दिवसलाई युथ समिटका रूपमा मनाउने निर्णय गरेको छ । उक्त समिटमा ४० वर्ष मुनिका ६ हजार युवाहरूको सहभागिता रहनेछ ।
प्रकाशित मिति: आइतबार, चैत १७, २०८१ १९:०६
