१३औं साग उद्घाटनपछि फुटबल खेल्न चाहन्थे प्रधानमन्त्री ओली

A+ A A-

नेपालमा १३औं साग हुने भएपछि भूकम्पले भत्काएको दशरथ रंगशालाको तीव्र पुनर्निर्माण गर्नुपर्ने भयो ।

पुनर्निर्माणका लागि पर्याप्त समय नभएपछि प्रधानमन्त्री केपी शर्मा ओलीको सक्रियतामा मन्त्रिपरिषदले बिनाटेण्डर रंगशाला पुनर्निर्माणको अनुमति प्रदान गर्‍याे ।

आज राष्ट्रपति विद्यादेवी भण्डारीले १३औं सागको भव्य उद्घाटन गर्दैछिन् । राष्ट्रपतिले उद्घाटन गर्ने सागमा खेलप्रेमीको छवि बनाएका प्रधानमन्त्रीले मन्तव्य दिने कार्यक्रम थियो । तर दुर्भाग्य, एपेण्डिसाइटिस भएर प्रधानमन्त्री ओली यतिबेला मनमोहन सेन्टरको आईसीयूमा छन् ।

सेन्ट्रल जोन च्याम्पियन महिला भलिबल टोलीलाई नगद पुरस्कार वितरण गर्दै सागका खेलाडीको मनोबल उच्च बनाउन विशेष सम्बोधन गर्ने तयारीमा रहेका ओली अचानक अस्पतालमा पुगे ।

उनको उपस्थितिमा हुने कार्यक्रममा अर्थमन्त्री डा. युवराज खतिवडा आए तर उनले विशेष प्याकेज घोषणा गर्न सकेनन् । केपी ओलीलाई खेलकुदप्रेमी प्रधानमन्त्रीका रूपमा चिनिन्छ ।

फुटबलका चर्चित खेलाडी तथा प्रशिक्षक हरि खड्का प्रधानमन्त्री ओलीको वर्थ डेमा बालुवाटार पुगेका थिए । ‘हरि, एक पटक हामीले पनि सागका बेला फुटबल खेल्ने वातावरण मिलाऊ न,’ प्रधानमन्त्रीको जन्मदिन मनाउन बालुवाटार पुगेका बेला ओलीले भनेको सन्दर्भ सम्झँदै हरि भन्छन्, ‘उद्घाटनमा उहाँ आउन नसक्ने भएपछि खल्लो लागिरहेको छ ।’

खेलाडी प्रशिक्षक देखेपछि उनीहरूसँग भलाकुरासी गर्न तम्सिहाल्ने प्रधानमन्त्रीले अहिलेसम्मकै सबैभन्दा ठूलो साग प्रतियोगिताको उद्घाटन समारोहलाई भने प्रत्यक्ष अवलोकन गर्न पाएनन् ।

महाराजगन्जस्थित शिक्षण अस्पताल परिसरमा रहेको मनमोहन कार्डियोथोरासिक भास्कुलर तथा ट्रान्सप्लान्ट सेन्टरमा एपेन्डिसाइटिसको शल्यक्रियापछि उनी अस्पतालमा नै रहेकाले सागको उद्घाटन समारोहमा उपस्थित हुन नसक्ने भएका हुन् । ओली अझै एक साता अस्पतालमा बस्नुपर्ने बताइएको छ । स्रोतका अनुसार समापन समारोहमा पनि ओलीको उपस्थिति हुन सक्ने छैनन् ।

मिडिया सेन्टरको ‘कन्तबिजोग’

१३औं दक्षिण एसियाली खेलकुदको आज भव्य उद्घाटनको तयारी भइरहँदा विभिन्न देशबाट समाचार संकलन गर्न आएका मिडियाकर्मीका लागि व्यवस्थापन गरिएको मिडिया सेन्टरको अवस्था भने भद्रगोल छ ।

त्रिपुरेश्वरस्थित कभर्डहलको बाहिर तयार गरिएको मिडिया सेन्टरमा मुश्किलले ३० जना बस्न पुग्ने व्यवस्था छ । जबकि बंगलादेशबाट मात्र ५० जना पत्रकार रिपोर्टिङका लागि नेपाल आएका छन् ।

श्रीलंका, माल्दिभ्स, भुटान, भारत, पाकिस्तानबाट पत्रकारको बाक्लो उपस्थिति छ । त्यसका लागि व्यवस्थापन हुन सकेको छैन । पत्रकारका लागि खेल तालिका उपलब्ध हुन नसक्दा विदेशी पत्रकार रनभुल्लमा परेका छन् ।

प्रचार प्रसार तथा प्रसारण उपसमितिका लागि ८ करोड बजेट विनियोजन गरिएको भनिएको छ । तर, मिडिया सेन्टरमा भने यो बजेटको सदुपयोग भएको देखिन्न ।

विदेशी मिडयाकर्मीहरूले समेत मिडिया सेन्टरको विषयमा आलोचना गर्न थालेपछि फुटबलले प्रयोग गर्ने मिडिया सेन्टरलाई मुख्य मिडिया सेन्टरका रूपमा रहेको यो अस्थायी भएको भन्न थालिएको एक प्रत्रकारले बताए ।

प्रतियोगिता छिटोभन्दा छिटो समाचार सम्प्रेषण गर्नुपर्ने हुँदा मिडिया सेन्टरको अवस्थाले काम गर्ने वातावारण नबनेको एक बंगलादेशी पत्रकारले गुनासो गरेका छन् । ‘हामीले हिजो पत्रकार सम्मेलनमा राखेपका सदस्यसचिवसँग पनि यो कुरा राख्यौं । उहाँले व्यवस्था राम्रो हुन्छ भन्ने आश्वासन दिनुभएको छ । यहाँका स्थानीय पत्रकारलाई जिम्मा दिएको भन्नुभएको छ । आशा छ सुधार होला,’ उनले भने ।

प्रकाशित मिति: आइतबार, मंसिर १५, २०७६ १५:०२