श्रद्धाञ्जली दिँदै मन्त्री अधिकारीबारे कसले के भने ?

A+ A A-

नेपाल सरकार संस्कृति पर्यटन तथा नागरिक उड्डयन मन्त्री रवीन्द्र अधिकारीलाई आज शुक्रबार अन्तिम श्रद्धाञ्जली दिन टुडिँखेल पुगेका नेताहरूले उनलाई विचार, सिद्धान्त र संगठकको साथसाथै विकास गर्न चाहने नेताको रूपमा बुझेको बताएका छन् ।

झलनाथ खनाल, सचिवालय सदस्य नेकपा

अकल्पनीय क्षति भएको छ, पार्टी र देशलाई । उदयमान नेता गुमाउँदाको पीडा कस्तो हुन्छ ? त्यही भएको छ । छोटो उमेरमा धेरै काम गर्नेमा रवीन्द्रजी हुन् । उनले देश र पार्टीलाई धेरै योगदान गरेका छन् । कम्युनिष्ट आन्दोलन, विद्यार्थी आन्दोलन नयाँ तरिकाले अगाडि ल्याएका हुन् ।

वामदेव गौतम, सचिवालय सदस्य नेकपा

देश र पार्टीको लागि ठूलो क्षति भएको छ । मैले नै सदस्यता दिएर हुर्काएको हुँ । पार्टीको असल इमान्दार नेता हुन् । उनको भिजन पूरा गर्नुपर्ने दायित्व हाम्रो हो । हामी सबै मिलेर उनको भिजन पूरा गर्नेछौं । यसको क्षतिपूर्ति हुन सक्दैंन । यस्तो नेता जन्माउन धेरै समय लाग्छ ।

रामचन्द्र पौडेल, वरिष्ठ नेता नेपाली कांग्रेस

नेपाली राजनीतिमा ठूलो क्षति भएको छ । युवापुस्ताको लागि झनै ठूलो क्षति हो । उहाँ ऊर्जावान नेता हुनुहुन्थ्यो ।

भिम रावल,स्थायी समिति सदस्य नेकपा

म पहिला सस्कृति पर्यटन तथा नागरिक उड्डयन मन्त्री भएको हुँ । अहिले उनी त्यही मन्त्रालयको मन्त्री थिए । उनी र म बिच सधैं हवाइसुरक्षाको बारेमा कुराकानी हुन्थ्यो । सधैं छलफल हुन्थ्यो । देश र पार्टीलाई ठूलो क्षति भएको छ । होनहार युवा नेता गुमाएका छौं ।

योगेश भट्टराई, स्थायी समिति सदस्य नेकपा

सहयोद्धा गुमाएको छु । सँगैबसेर राजनीति गरेको हुँ । एउटै कोठामा बसेर राजनीति गरेका हाैं । विद्यार्थी राजनीति, पार्टीको राजनीतिमा सँगै भयांै । वाइडवडीको विषयमा जुन कुरा आएको छ त्यो छानबिन हुनुपर्छ । उनको छविमा लागेको दाग मेटिनुपर्छ ।

गगन थापा, केन्द्रीय सदस्य नेपाली कांग्रेस

अकल्पनीय क्षति भएको छ । छानबिन समिति बनेको छ । यसले छिटो काम गर्नुपर्नेछ । दुर्घटना हुँदा मात्र हल्ला गर्ने काम नगर्ने हो भने समस्या हुन्छ । अब यो दुर्घटनाको छानबिन हुनुपर्छ ।

रवीन्द्रजीले विद्यार्थी आन्दोलनलाई नयाँ तरिकाबाट अगाडि बढाउनु भएको हो । राजनीतिक दलहरूको राख गिरेको समयमा उहाँले बल्लबल्ल भरोसा गर्ने बनाउनुभयो ।

कांग्रेस र एमाले एक भएर माओवादी सडकमा भएको समयमा उनको नेतृत्वमा पार्टी अध्यक्ष केपी ओलीलाई भेट्न गयाैं । दूरी बढाउनु भन्दा मिलेर जानुपर्छ भन्यौं । त्यसपछि प्रचण्ड भेट्न गयांै । दुई घण्टा कुरेर प्रचण्डलाई भेट्यौं । उहाँलाई पनि मिलेर जानुपर्छ भन्यौं । यसको नेतृत्व उहाँले नै गर्नुभयो ।

नेताहरू मिलेर जानुको विकल्प छैन भन्ने मानिस उहाँ नै हो । हामीले राजनीति मात्रभन्दा उहाँले राजनीतिको सँगसँगै विकास लैजानु पर्छ भनेर भन्नुभयो । केही कुरामा मेरो पनि सहमति थिएन तर उहाँ अडिग, लगनशील, निडर नेता हुन् । हामीले विरोध गर्दा हाम्रै मुख बिग्रेको हुन्थ्यो, रातो–पिरो हुन्थ्यो तर उहाँ सधैं हँसिलो हुनुहुन्थ्यो आलोचना पचाएर हाँस्ने मानिस हुन् ।

प्रकाशित मिति: शनिबार, फागुन १८, २०७५ ००:०१