सुदूरपश्चिममा उपनिर्वाचनको तयारी पूरा, ७ पदका लागि २१ उम्मेदवार

A+ A A-

सुदूरपश्चिम प्रदेशमा भोलि हुने उपनिर्वाचनको सम्पूर्ण तयारी पूरा भएको छ । उपनिर्वाचनका लागि सुदूरपश्चिममा १२ स्थल र १५ केन्द्र तोकिएका छन् । प्रदेशका ५ जिल्लामा सात वडा अध्यक्ष पदका लागि चुनाव हुँदै छ ।

निर्वाचन हुने सम्पूर्ण स्थानमा मतपत्र पुगिसकेको र आवश्यक सम्पूर्ण तयारी पूरा भएको जनाइएको छ । सातवटा रिक्त वडाध्यक्ष पदका लागि २१ जना उम्मेदवार चुनावी मैदानमा छन् भने १० हजार ९ सय ३७ मतदाताले भाग लिन पाउने छन् । भोलि बिहान ७ बजेदेखि साँझ ५ बजेसम्म मतदान हुनेछ ।

सुदूरपश्चिम प्रदेशको बैतडीमा सबैभन्दा बढी तीन स्थानीय तहका तीन वडा अध्यक्षका लागि निर्वाचन हुँदैछ । जिल्लाको पुर्चौडी नगरपालिका–४ का अध्यक्ष गौतमप्रसाद भट्ट, सुर्नया गाउँपालिका– १ का अध्यक्ष कलसबहादुर चन्द, दोगडाकेदार गाउँपालिका–४ का अध्यक्ष मानबहादुर विष्टको मृत्यु भई पद रिक्त रहेकाले उपनिर्वाचन हुन लागेको हो ।

उपनिर्वाचनका लागि आवश्यक सम्पूर्ण तयारी पूरा भइसकेको बैतडीका जिल्ला निर्वाचन अधिकारी माधवप्रसाद फुयाँलले जानकारी दिए । उनले ११ गते नै ६ वटा मतदान केन्द्रमा मतदान अधिकृतसहितको टोली खटिइसकेको र मतदाता परिचयपत्र वितरणलगायतका सबै काम सकिसकेको बताए ।

बैतडीमा उपनिर्वाचनका लागि सुरक्षाकर्मीसहित करिब ४५० जनशक्ति परिचालन गरिएको छ । उपनिर्वाचन हुने दोगडाकेदार–४, सुर्नया गाउँपालिका–१ र पुर्चौडी नगरपालिका–४ मा ३ सयभन्दा बढी सुरक्षाकर्मी र ५४ कर्मचारी परिचालन गरिएको निर्वाचन अधिकृत फुयाँलले जानकारी दिए ।

दोगडाकेदार गाउँपालिका–४ मा केदार मावि पिपलकोट र हुनैनाथ आधारभूत विद्यालय कपिन्ना मतदानस्थल तोकिएको छ । सुर्नया गाउँपालिका–१ को साबिकको गाविस भवन गुर्केलीलाई मतदानस्थल तोकिएको छ । यस्तै, पुर्चौडी नगरपालिका–४ को महादेव मावि सिवाबो र पहरौल मावि बाङ्गालाई मतदानस्थल तोकिएको उनले बताए ।

उपनिर्वाचनमा तीनवटै वडामा गरी महिलाभन्दा १ सय १० पुरुष मतदाता बढी रहेका छन् ्। कुल ४ हजार ३ सय ३६ मतदाता रहेकोमा २ हजार २ सय २३ पुरुष र २ हजार १ सय १३ महिला मतदाता रहेको निर्वाचन अधिकारी फुयाँलले जानकारी दिए ।

डोटीको आदर्श गाउँपालिका–२ मा वडा अध्यक्षका लागि चुनाव हुँदै छ । डोटीमा एकै स्थानमा चुनाव भए पनि सबैभन्दा बढी २४ सय ६९ मतदाता यहाँ छन् । डोटीमा पनि आवश्यक सम्पूर्ण तयारी पूरा भइसकेको जिल्ला निर्वाचन कार्यालयका निमित्त प्रमुख दलबहादुर मलासीले बताए । शनिबार बिहान ७ बजेबाट मतदान सुरु हुने उनले जानकारी दिए ।

आदर्श गाउँपालिका–२ को उपनिर्वाचनका लागि तोकिएका मतदानस्थलबाट मतदाता परिचयपत्र वितरण गर्ने कार्य सकिएको निमित्त प्रमुख मलासीले बताए ।

निर्वाचनका लागि शारदा मावि मौवानगरदह, कोटान्जर मावि, कोटान्जर तथा साउदकडा माविलाई मतदानस्थल तोकिएको छ । जिप दुर्घटनामा परी तत्कालीन वडाध्यक्ष प्रेम बोहराको निधन भएपछि उपनिर्वाचन हुन लागेको हो ।

कञ्चपुरको एक स्थानमा उपनिर्वाचन हुँदै छ । पुनर्वास नगरपालिका–३ मा वडाध्यक्ष पदका लागि हुने उपनिर्वाचनको सम्पूर्ण तयारी पूरा भएको छ । निर्वाचनस्थलमा सुरक्षाकर्मी, निर्वाचन अधिकृत, कर्मचारीसहितको टोली निर्वाचन सामग्री लिएर पुगेको छ ।

उपनिर्वाचनका लागि गोरखा माध्यमिक विद्यालयमा राखिएको मतदानस्थलमा दुई मतदान केन्द्र निर्धारण गरिएको मुख्य निर्वाचन अधिकृत गोपालप्रसाद बाँस्तोलाले जानकारी दिए ।

१ हजार १ सय ९९ मतदाता रहेको सो वडामा पुरुष ५ सय ५९ र महिला मतदाता ६ सय ४० रहेका छन् । ‘क’ मतदान केन्द्रमा ६ सय १६ र ‘ख’ मतदान केन्द्रमा ५ सय ८३ मतदाताले मतदान गर्ने गरी केन्द्र निर्धारण गरिएको छ ।

कञ्चनपुर, डोटी, बैतडी, अछाम र बाजुरा गरी पाँच जिल्लाबाट सात स्थानमा वडा अध्यक्षका लागि उपनिर्वाचन हुँदै छ । सो उपनिर्वाचनका लागि आवश्यक सम्पूर्ण तयारी पूरा भइसकेको साविकको क्षेत्रीय निर्वाचन कार्यालय कैलालीले जनाएको छ ।

हाल संरचना परिवर्तन भएसँगै प्रत्येक जिल्लामा जिल्ला निर्वाचन कार्यालय छन् तर प्रदेशस्तरीय निर्वाचन कार्यालय खोलिएको छैन । प्रदेशस्तरीय संरचना नभए पनि प्रदेशका सबै जिल्ला हेरीरहेको जिल्ला निर्वाचन कार्यालय कैलाली प्रमुख प्रेमराज भट्टले उपनिर्वाचनमा १० हजार ९ सय ३७ मतदाताले भाग लिन पाउने जानकारी दिए ।

अछामको मेल्लेख गाउँपालिका– ५ र बाजुराको त्रिवेणी नगरपालिका– १ मा वडा अध्यक्ष पदका लागि हुने निर्वाचनको सम्पूर्ण तयारी पूरा भएको भट्टले बताए ।

उपनिर्वाचन सुदूरपश्चिम प्रदेशका पाँच जिल्लाका सात स्थानमा हुँदैछ । बैतडीको पुर्चौडी नगरपालिका–४ का अध्यक्ष गौतम प्रसाद भट्ट, सुर्नया गाउँपालिका– १ का अध्यक्ष कलसबहादुर चन्द, दोगडाकेदार गाउँपालिका–४ का अध्यक्ष मानबहादुर विष्टको मृत्यु भई पद रिक्त रहेको थियो ।

यस्तै, डोटीको आदर्श गाउँपालिका– २ का अध्यक्ष पदम सिंह बोहरा, अछामको मेल्लेख गाउँपालिका– ५ का अध्यक्ष रामबहादुर बोहरा, बाजुराको त्रिवेणी नगरपालिका– १ का अध्यक्ष खम्म दमाईंको पनि मृत्यु भएकाले उपनिर्वाचन हुन लागेको हो ।

सुदूरपश्चिम प्रदेशका अन्य स्थानमा वडा अध्यक्षको मृत्युपछि पद रिक्त भए पनि कञ्चनपुरको पुनर्वास नगरपालिका– ३ मा निर्र्वािचत भएका वडा अध्यक्ष फैरु तामाङ जिल्ला समन्वय समितिको प्रमुख भएकाले उपनिर्वाचन हुन लागेको हो । शनिबार बिहान ७ बजेबाट साँझ ५ बजेसम्म मतदान जारी रहने जनाइएको छ ।

प्रकाशित मिति: शुक्रबार, मंसिर १३, २०७६ १९:५६