मेगा बैंक ‘बैंक अफ दि इयर २०१९’बाट सम्मानित

A+ A A-

मेगा बैंक नेपाल लिमिटेड सन् २०१९ का लागि ‘बैंक अफ दि इयर’ बन्न सफल भएको छ । बेलायतको लण्डनस्थित फाइनान्सियल टाइम्सले प्रकाशित गर्ने ९० वर्षभन्दा बढी इतिहास बोकेको विश्वविख्यात पत्रिका दि बैंकर ले सन् २०१९ का लागि अन्तर्राष्ट्रियस्तरमै प्रतिष्ठित ‘बैंक अफ दि एयर २०१९, नेपाल’ बाट मेगा बैंकलाई सम्मान गरेको हो ।

लण्डनमा बिहीबार साँझ आयोजित एक समारोहबीच मेगा बैंकका अध्यक्ष भोजबहादुर शाह र प्रमुख कार्यकारी अधिकृत अनुपमा खुञ्जेलीले बैंक अफ दि एयर २०१९ को सम्मान ग्रहण गरेका हुन् ।

दि बैंकरले विश्वभरका १ सय २० भन्दा बढी राष्ट्रहरूका १ हजारभन्दा बढी बैंकहरूमध्ये हरेक राष्ट्रबाट एउटा उत्कृष्ट बैंकको छनाेट गरी बैंक अफ दि इयर पुरस्कारबाट वर्षैपिच्छे सम्मान गर्ने गरेको छ ।

सम्मान ग्रहण गरेपछि मेगा बैंकका अध्यक्ष शाहले अनवरत रूपमा ग्राहकवर्गलाई उत्कृष्ट वित्तीय सेवा प्रदान गर्दै थप हौसलाका साथ अघि बढ्न यो सम्मान मेगा बैंकका लागि कोसेढुङ्गा हुने बताए ।

अध्यक्ष शाहले मेगा बैंकको सफलता एवं उपलब्धिमा आफ्नाे सहयोग, साथ तथा हौसलाद्वारा महत्त्वपूर्ण योगदान पुर्‍याउने ग्राहकवर्ग, सेयरधनी, कर्मचारी, नियामक निकायहरू, सञ्चार जगतलगायत शुभेच्छुकहरूप्रति आभार र कृतज्ञतासमेत व्यक्त गरे ।

यसैगरी, मेगा बैंककी सीईओ अनुपमा खुञ्जेलीले ९ वर्षको छोटो सञ्चालन अवधिमै गुणस्तरीय बैंकिङ सेवा तथा सुविधाहरू प्रदान गरेर प्रतिस्पर्धाको अग्रपङ्क्तिमा रहन सफल भएकै कारण मेगा बैंकले ‘बैंक अफ दि एयर, २०१९’ को उपाधि हासिल गरेको बताइन् । उनले आगामी दिनमा बैंकलाई थप सवल, समृद्ध एवं सक्षम बनाउन सबैको निरन्तर साथ र सहयोग रहिरहने विश्वास प्रकट गरिन् ।

यसै साता मेगा बैंकले अन्तर्राष्ट्रिय मापदण्डबमोजिमको गुणस्तरीय व्यवस्थापन प्रणाली अनुसरण गरेबापत ‘आईएसओ ९००१ २०१५’ प्रमाणपत्र समेत प्राप्त गरेको छ ।

तीव्र गतिका साथ ग्राहकको विश्वास जित्दै अघि बढ्दै गरेको मेगा बैंकका हाल १ सय ११ वटा शाखा कार्यालय, २१ वटा एक्सटेन्सन काउण्टर, १ सय १२ वटा एटीएम मेसिन, १ सय १९ वटा शाखारहित बैंकिङ केन्द्रहरू तथा २ हजार ५ सयभन्दा अधिक मेगा रेमिटका प्रतिनिधिहरू रहेका छन् ।