फार्मेसीमा बिरामी नपठाएपछि कुटिए एम्बुलेन्स चालक

A+ A A-

विराटनरमा एक फार्मेसी सञ्चालकले आफ्नो फार्मेसीमा बिरामी नपठाएको भन्दै एम्बुलेन्स सञ्चालकलाई कुटेका छन् । विराटनगर अस्पताल अगाडि रहेको हामे गोलबजार फार्मेसीका सञ्चालक रवीन्द्र महतोले सुनसरी घर भएका ५२ वर्षीय रामकुमार राईले कुटपिट गरेका हुन् ।

सिरहा धनगढी नगरपालिका घर भएका २१ वर्षीय महतोले आफ्नो फार्मेसीमा बिरामीलाई औषधि किन्न नपठाएको भन्दै शुक्रबार बिहान कुटेका हुन् ।

पूर्णबहादुर स्मृति प्रतिष्ठानको को १ च ६४५४ नम्बरको एम्बुलेन्स चलाउँदै आएका राईको दायाँ आँदा र ढाडमा चोट लागेको छ । कटपिटमा संलग्न महतोलाई प्रहरीले नियन्त्रणमा लिएर अनुसनधान गरिरहेको वडा प्रहरी कार्यालय विराटनगरका डीएसपी वेदप्रसाद गौतमले बताए ।

हालसम्म पीडितले जाहेरी दिएका छैनन् । दुई साताअघि मात्रै फार्मेसी सञ्चालनमा आएको हो । प्रहरीकाअनुसार एम्बुलेन्स चालक राईले बीपी कोइराला स्वास्थ्य विज्ञान प्रतिष्ठानले रेफर गरेको सिरहाका अढाई वर्षीय बालक आशिष यादवलाई लिएर आएका थिए ।

निमोनियाले थलिएका यादवको धरानमा उपचार सम्भव नभएको भन्दै रेफर गरेपछि एम्बुलेन्समा विराटनगर ल्याएको राईले बताए । उनकाअनुसार टंकीसिनवारीमा रहेको विराट टिचिङ अस्पतालमा एनआईसीयू खाली नभएपछि बालकलाई विराटनगरको ग्रीनक्रस अस्पताल लगियो । त्यहाँ पनि उपचार नभएपछि विराटनगर अस्पताल ल्याइएको थियो ।

‘विराटनगर अस्पतालभित्र प्रवेश नगरिकन बिरामीका आफन्तलाई आफ्नो फार्मेसीबाट औषधि किन्ने वातावरण बनाइदिन आग्रह गर्दै केही फार्मेसी सञ्चालकले एम्बुलेन्सलाई घेरिहाले,’ चालक राईले भने, ‘बालकको अवस्था गम्भीर रहेका कारण एम्बुलेन्सलाई बाटो नछेक्न आग्रह गर्दा भीडमा रहेका एक जनाले ममाथि कुटपिट गरेका हुन् ।’ अस्पतालको आकस्मिक कक्षमा भर्ना गरेको केही बेरमै बिरामी बालकको मृत्यु भएको प्रहरीले जनाएको छ ।

प्रकाशित मिति: शुक्रबार, मंसिर १३, २०७६ १३:४०