खै स्मार्ट लाइसेन्स ?

A+ A A-

घोडाघोडी नगरपालिका ६ बछुरियाका दिपेश बोहोरा आवेदन बुझाएर सवारीचालक अनुमति पत्रको पर्खाइमा बसेको १ वर्ष भयो । १२ महिनासम्म पनि लाइसेन्स नपाएको उनको गुनासो छ ।

यस्तै, गुनासो धनगढी उपमहानगरपालिका–३ बोराडाडीका श्याम रानाको पनि छ । लाइसेन्स पर्खेको वर्ष बित्दा पनि पाउन नसकेको उनले सुनाए । सवारी चलाउन योग्य हुँदा पनि हातमा अनुमतिपत्र नहुँदा जरिवाना तिर्नुपर्ने बाध्यता छ ।

समयमै लाइसेन्स नपाउँदा सवारीचालकहरूलाई निकै समस्या पर्ने गरेको छ । तराईका दुई जिल्लाभन्दा पहाडी ७ जिल्लाका नागरिकलाई सबैभन्दा बढी सास्ती छ ।

बाजुरा बुढीनन्दा–५ का श्रीराज जोशी लाइसेन्स पाउने आसमा एक महिनादेखि धनगढीमै छन् । लाइसेन्स लिन पटक–पटक धनगढी पुग्न उनले निकै खर्च गरिसके ।

यातायात व्यवस्था कार्यालयमा कैलाली, कञ्चनपुर र ७ पहाडी जिल्लासँगै छिमेकी जिल्ला बर्दिया, बाँकेबाट पनि सेवाग्राही आउने गरेका छन् । स्मार्ट लाइसेन्स पाउने आसमा यातायात व्यवस्था कार्यालय कैलाली पुगेका बर्दिया राजापुरका भागिराम थारूले लाइसेन्स नहुँदा आफूले दुई पटक जरिवाना तिरिसकेको गुनासो गरे ।

यातायात कार्यालयको लापरबाही र ढिलासुस्तीले सवारी चलाउन योग्य हुँदाहुँदै पनि स्मार्ट कार्ड नबन्दा समस्या खेप्नुपरेको भन्दै सेवाग्राही आक्रोशित छन् ।

स्मार्ट लाइसेन्स वितरणमा ढिलाइ हुँदा सेवाग्राहीलाई सास्ती भएको छ । कागजी लाइसेन्स हटाएर देशव्यापी रूपमा स्मार्ट लाइसेन्सको वितरण थालेपछि लाइसेन्सको माग र छपाइको सन्तुलन मिलेको छैन, जसका कारण दुई वर्षसम्म पनि वर्षसम्म पनि सेवाग्राहीले लाइसेन्स पाउन सकेका छैनन् । यातायात व्यवस्था कार्यालय धनगढीबाट ५६ हजार बढीले स्मार्ट लाइसेन्स पाउन बाँकी छ ।

यातायात व्यवस्था कार्यालय धनगढीबाट स्मार्ट लाइसेन्सका लागि हालसम्म ७६ हजारभन्दा बढी आवेदन परे पनि झन्डै आधाभन्दा बढीले अझै प्राप्त गर्न सकेका छैनन् । यातायात विभागबाट २१ हजार स्मार्ट कार्ड मात्र छापिएर धनगढी आइपुगे पनि ५६ हजार कार्ड अझै आएका छैनन् ।

त्यसमध्ये कार्यालयले १४ हजार ५ सय स्मार्ट कार्ड वितरण गरेको छ । स्मार्ट कार्ड छपाइमै ढिलाइ हुँदा वितरणमा समस्या देखिएको यातायात व्यवस्था कार्यालय धनगढीका प्रमुख लक्ष्मण शाहले बताए ।

यातायात व्यवस्था विभागले २०७४ सालदेखि लाइसेन्सको स्मार्ट कार्ड वितरण गर्न सुरु गरेको थियो । स्मार्ट कार्ड वितरण गर्न सुरु गरेको दुई वर्ष पूरा हुँदा पनि धनगढीबाट आवेदन दिएका करिब ५६ हजारको स्मार्ट कार्ड आउँन बाँकी छ । केन्द्रबाट छपाइमा ढिलाइ भएका कारण समस्या भएको भन्दै यातायात कार्यालय पन्छिने गरेको छ ।

आधुनिक प्रविधि, उत्कृष्ट गुणस्तर, नक्कली छाप्न नमिल्ने, आगोले नजल्ने, अक्षर नमेटिने, सेवाग्राही मैत्री र ई–गभर्ननेन्स लागू गर्न सहयोगी हुनेलगायतका अनेकन फाइदा देखाउँदै सरकारले स्मार्ट लाइसेन्सको घोषणा गर्‍यो ।

कागजी लाइसेन्स हटाएर देशव्यापी रूपमा स्मार्ट लाइसेन्सको वितरण थालिएको जनाइए पनि सेवाग्राहीले वर्षाैं बित्दा पनि स्मार्ट लाइसेन्स पाउन सकेका छैनन् ।

मोटरसाइकलको सवारीचालक अनुमतिपत्रको परीक्षा उत्तीर्ण गरेको लामो समयसम्म पनि यातायात व्यवस्था कार्यालयले स्मार्ट लाइसेन्स वितरण गर्न नसक्दा समस्या भइरहेको सेवा ग्राहीहरूको गुनासो छ । प्रहरीले पनि चेक जाँचका नाममा अनावश्यक दुःख दिने गरेको सेवाग्राही बताउँछन् ।

प्रकाशित मिति: शुक्रबार, मंसिर १३, २०७६ ११:४२