फेसबुक र इन्स्टाग्राम डाउन

A+ A A-

दुई सर्वाधिक चर्चित सामाजिक सञ्जाल फेसबुक र इन्स्टाग्राममा समस्या देखिएको छ । फेसबुक इन्स्टाग्राम दुवैको सिस्टम डाउन भएपछि अर्को सामाजिक सञ्जाल ट्विटरमा #FacebookDown र #InstagramDown ह्यासट्याग ट्रेन्डिङ भएको छ ।

इन्टरनेटका वेबसाइटको सर्भर स्टाटस ट्रयाक गर्ने वेबसाइट डाउनडिटेक्टर डटकमको तथ्यांक अनुसार साँझ ७ः४० बजेबाट फेसबुकमा देखिन थालेको समस्या ८ः०० बजेसम्ममा आकाशिएको थियो ।

७ः४० मा १ सय ८३ जना प्रयोगकर्ताले फेसबुकमा समस्या आएको रिपोर्ट गरेका थिए भने ८ः१० बजेसम्ममा त्यो संख्या बढेर ६ हजार ५ सय ४० पुगेको थियो ।

यस्तै, इन्स्टाग्राममा पनि त्यही समयबाट समस्या देखिन थालेको थियो । ७ः३० मा १९ जनाले इन्स्टाग्राममा समस्या आएको रिपोर्ट गरेका थिए भने ७ः५५ मा त्यो संख्या बढेर १२ हजार ८ सय ४५ पुगेको थियो ।

डाउनडिटेक्टर डटकमको तथ्यांक

सामाजिक सञ्जाल प्रयोगकर्ताले फेसबुक र इन्स्टाग्राम डाउन भएको भँडास ट्विटरमा गएर पोख्न थालेपछि त्यहाँ यो समस्या ट्रेन्डिङमा आएको छ ।

नेपालसहित एसियाको सर्भरमा मुख्य समस्या फेसबुक पेजमा देखिए पनि केही देशमा न्युजफिड लोड हुन पनि समस्या आइरहेको छ । इन्स्टाग्रामको न्युजफिड पनि लोड भइरहेको छैन । फेसबुक एपबाट भने नेपाललगायत केही देशहरूमा फेसबुक चलिरहकाे छ । ती क्षेत्रमा वेब ब्राउजरमा फेसबुक चलाउँदा मात्र समस्या देखिएकाे छ ।

वेलायतसहित युरोपका अधिकांश देशमा भने फेसबुक र इन्स्टाग्राम लगइन नै भइरहेको छैन । युरोपको सर्भरका प्रयोगकर्ताले लगइनको प्रयास गर्दा फेसबुकले सर्भर डाउन भएर मर्मत भइरहेको र केही क्षणमा समस्या समाधान हुने ‘एरर मेसेज’ पठाइरहेको छ ।

शिलापत्र डटकमकाे फेसबुक पेज लाेड गर्दा देखाएकाे एरर मेसेज

अपडेटः नेपालमा पनि समस्या क्रमशः बढिरहेकाे छ । एड म्यानेजरबाट सुरू भएकाे समस्या, फेसबुक पेज हुँदै ग्रुपबाट टाइमलाइनसम्म पुगिसकेकाे छ । न्युजफिड स्क्राेल भइरहेकाे भएपनि ग्रुप, पेज र टाइमलाइनमा पाेस्ट गर्न नमिल्ने भएकाे छ ।

प्रकाशित मिति: बिहीबार, मंसिर १२, २०७६ २१:१७