पाँच सय साधुसन्तको जन्ती आइपुग्यो जनकपुर, भव्य स्वागत

A+ A A-

रामजानकी विवाहपञ्चमी महोत्सवका लागि अयोध्याबाट साधुसन्तको जन्ती आज जनकपुरधाम आइपुगेको छ । राम र लक्ष्मणको स्वरुप बनाई झाँकी कीर्तन गर्दै लावालस्करसहित भारत उत्तर प्रदेशको अयोध्याबाट आज जन्ती जनकपुर आइपुगेको हो ।

आदर्श नारी सीता र मर्यादा पुरुषोत्वम भगवान् रामको विवाहका लागि जन्ती जनकपुर आएको हो । ५ सयको संख्यामा आएका जन्तीलाई महोत्तरीका विभिन्न स्थानसहित जनकपुरधाममा भव्य स्वागत गरिएको छ ।

दिउँसो झण्डै ३ बजे जनकपुरधाम आइपुगेका जन्तीलाई धनुषाका प्रमुख जिल्ला अधिकारी प्रदीपराज कँडेल, प्रहरी उपरीक्षक शेखर खनाल र सशस्त्र प्रहरी उपरीक्षक राजेश उप्रेतीलगायत विभिन्न संघसंस्थाका प्रतिनिधि र समाजसेवीले स्वागत गरेका छन् ।

यसैगरी, जानकी मन्दिरमा मन्दिरका महन्थ रामतपेश्वर दास वैष्णव, उत्तराधिकारी महन्थ रामरोशन दास वैष्णव, जनकपुरधाम उपमहानगरपालिकाका मेयर लालकिशोर साहले स्वागत गरेका थिए । महिलाहरूले त्यहाँ नाचगान गरी जन्तीलाई स्वागत गरे ।

स्थानीयवासीले जन्तीलाई बर्साए फूल

प्रत्येक ५ वर्षमा एकपटक भारतको अयोध्याबाट विवाहपञ्चमीमा साधुसन्तको जन्ती औपचारिक रूपमा सीता र रामको विवाहका लागि जनकपुर आउने गर्दछ । त्यसै क्रममा यस वर्ष पनि जन्ती आएको हो । जन्ती जनकपुरधाम आएपछि नगर परिक्रमा गरेका थिए । सो क्रममा आआफना घरबाट स्थानीयवासीले फूल बर्साएर स्वागत गरे ।

महोत्तरीमा स्वागत

मटिहानी नाका हुँदै नेपाल प्रवेश गरेका जन्तीलाई बुधबार राति महोत्तरीमा भव्य स्वागत गरिएको थियो । मटिहानी मठका मठाधीश जगरनाथ दास वैष्णव, प्रदेश २ का सामाजिक विकास राज्यमन्त्री अभिराम शर्मा, मटिहानी नगरपालिकाका प्रमुख हरिप्रसाद मण्डल, प्रमुख जिल्ला अधिकारी सूर्यबहादुर खत्री, सुरक्षा निकायका प्रमुखहरू तथा मटिहानीका स्थानीयहरूले भव्यताका साथ स्वागत गरेका थिए । नेपाली सेनाले समेत ब्याण्ड बाजाका विभिन्न धुन बजाई जन्तीलाई स्वागत गरेको थियो ।

मटिहानीबाट जनकपुर हिँडेको जन्तीलाई जलेश्वर नगरपालिकाले स्वागत गरेको छ । जनकपुर आइपुगेको जन्तीलाई शुक्रबार बाह्रविघा रंगभूमि मैदानमा राष्ट्रपति विद्यादेवी मण्डारीले स्वागत गर्ने कार्यक्रम छ ।

त्रेतायुगमा भगवान् राम र माता सीता मंसिर शुक्ल पञ्चमीको दिन विवाह भएको स्मरणमा जनकपुरमा प्रत्येक वर्ष सीताराम विवाहपञ्चमी महोत्सव मनाइन्छ ।

आज धनुष यज्ञ

मंसिर १० गतेबाट सुरु भएको सप्ताहव्यापी सीताराम विवाहपञ्चमी महोत्सव १६ गतेसम्म चल्नेछ । गत मंगलबार नगर दर्शन, बुधबार फुलबारी लीला गरिएको थियो भने आज बाह्रविघा मैदानमा धनुष यज्ञ गरिँदै छ । शुक्रबार तिलकोत्सव, शनिबार मटकोर र आइतबार सीतारामको विवाहको कार्यक्रम रहेको छ । त्यसै गरी सोमबार जन्तीलाई बिदाइ अर्थात् रामकलेवा गरी विवाहपञ्चमी महोत्सव सम्पन्न हुनेछ ।

५ सय वर्ष पुरानो भारतको अयोध्यास्थित विवादित राममन्दिरको जग्गाको पक्षमा भारतको सर्वोच्च अदालतको फैसला आएपछि यस वर्ष विवाहपञ्चमीमा थप उत्साह देखिएको छ । गत बिहीबार अयोध्याबाट जनकपुरधामका लागि जन्ती निस्केको थियो । त्रेतायुगमा सीता स्वयम्बरको बेला गुरु विश्वामित्रसँग रामलक्ष्मण जुन बाटो भएर आएका थिए, त्यही बाटो भएर जन्ती आउने गर्दछन् ।