टेण्डर पाउन कर चुक्ता प्रमाणपत्र नै कीर्ते

A+ A A-

कैलालीमा औषधि आपूर्तिकर्ताले टेण्डर पाउनका लागि कर चुक्ता प्रमाणपत्र नै कीर्ते गरेको भेटिएको छ । धनगढीको अमित मेडिसिन डिस्ट्रिब्युटर्सले त्यस्तो कीर्ते काम गरेको हो ।

डिस्ट्रिब्युटर्सले २०७४ साल माघ १० गते आन्तरिक राजस्व कार्यालयबाट जारी भएको कर चुक्ताको प्रमाणपत्र आँखा अस्पतालको टेण्डरमा पेश गरेका थिए । सो प्रमाणपत्रमा कर अधिकृत रामबोली साम्बाहाम्फले हस्ताक्षर गरेका छन् । तर, उनको २०७४ असोजमै धनगढीबाट सरुवा भइसकेकाले सो डिस्ट्रिब्युटर्सले कर चुक्ताको प्रमाणपत्र कीर्ते गरेको खुलेको हो ।

कीर्ते भएको कुरा बाहिर आएपछि आन्तरिक राजस्व कार्यालय धनगढीले गेटा आँखा अस्पतालको गएको आर्थिक वर्षको औषधि खरिद प्रक्रियाका कागजपत्रहरू नियन्त्रणमा लिएको छ ।

सरुवा भएका कर अधिकृतको हस्ताक्षर स्क्यानिङ गरी मेडिसिनले कर चुक्ताको प्रमाणपत्र बनाएको हो । यस्तै, डिस्ट्रिब्युटर्सले कर चुक्ता प्रमाणपत्र कीर्ते गरेको उजुरी परेपछि आन्तरिक राजस्व कार्यालय कैलालीले गेटा आखा अस्पतालबाट कागजपत्रहरू नियन्त्रणमा लिएको छ ।

आन्तरिक राजस्व कार्यालय धनगढीका प्रमुख चन्द्रकुमार श्रेष्ठले सोबारेमा अनुसन्धान भइरहेको र दोषी देखिए कारबाहीको प्रक्रिया अगाडि बढ्ने बताए । कीर्ते प्रमाणपत्र भेटिए पनि सञ्चालकलाई भने पक्राउ गरिएको छैन ।

जिल्ला प्रहरी कार्यालय कैलालीका प्रहरी नायव उपरीक्षक दक्षकुमार बस्नेतले आन्तरिक राजस्व कार्यालयसँग सोबारेमा समन्वय हुने बताए । यता डिस्ट्रीब्युटर्सका सञ्चालक दुष्यन्त बस्नेतले भने आफूले कुनै पनि कागजात कीर्ते नगरेको बताउँदै फसाउने चलखेल भइरहेको दाबी गरे ।

गेटा आँखा अस्पतालमा उनले वर्षाैंदेखि औषधि आपूर्तिको टेण्डर पाउँदै आएका छन् । अस्पतालका कर्मचारीसँगको मिलेमतोमा उनले टेण्डर पाउँदै आएको स्रोतले दाबी छ ।