हुम्ला दुर्घटनामा मृत्यु हुनेको संख्या चार पुग्यो

A+ A A-

हुम्लाको नाम्खा गाउँपालिकामा बुधबार भएको टिपर दुर्घटनामा परी मृत्यु हुनेको संख्या चार पुगेको छ । बुधबार नै तीनजनाको मृत्यु भएको थियो । बिहीबार थप एक जनाको मृत्यु भएको जिल्ला प्रहरी कार्यालय हुम्लाले जनाएको छ ।

११ जना घाइते भएका छन् । नाम्खा गाउँपालिकाको सल्ली खोलाबाट नेपाल खाद्य सँस्थानको चामल ल्याएर सदरमुकाम सिमकोट आउँदै गरेको लु४ख ३२६९ नम्बरको टिपर बुधबार सिमकोट–डाँडालाग्नामा दुर्घटना भएको थियो ।

दुर्घटनामा परी नाम्खा गाउँपालिका–१ हेप्का गाउँका ४५ वर्षीय छिरिङकार्मा लामा, ३५ वर्षीय नरी लामा, खार्पुनाथ गाउँपालिका–१ प्युसका बबरजंग शाही र स्वास्थ्य कार्यालयका कार्यालय सहयोगी सिमकोट–६ का बखत रोकायाको मृत्यु भएको छ ।

भक्त रोकायाको उपचारका क्रममा मृत्यु भएको हो । दुर्घटनामा घाइतेमध्ये नाम्गेल तामाङ, सन्तोष सुनार खगेन्द्र रावत र अंग फडेरा अवस्था गम्भीर छ । चालक आनन्द तामाङसहित डिचिन तामाङ र उनकी छोरी सन्ध्या पाण्डे भने सामान्य घाइते छन् ।

घाइतेको उद्धारमा कर्णाली प्रदेश सामाजिक विकास मन्त्रालयको पहलमा हेलिकप्टर पठाइएको प्रमुख जिल्ला अधिकारी बिनिता भट्टराईले बताइन् । घाइते ११ जनालाई बिहीबार नै थप उपचारका लागि हेलिकप्टरमार्फत नेपालगन्ज पठाइएको छ ।

दुर्घटनामा घाइते भएकाहरुको उपचारका लागि नेकपा हुम्लाले एक लाख रुपैयाँ सहयोग सहयोग गरेको छ । नेकपा कर्णाली प्रदेशका अध्यक्ष गोरखबहादुर बोगटीले उक्त रकम जिल्ला समन्वय समितिका हुम्लाका संयोजक दानबहादुर रावतलाई हस्तान्तरण गरे ।

प्रकाशित मिति: बिहीबार, मंसिर १२, २०७६ १३:४१