स्ट्याण्डर्ड चार्टर्डको सेयरः बढ्दा ५५५ नकट्ने, घट्दा ५१३ बाट नझर्ने (समग्र विश्लेषण)

स्ट्याण्डर्ड चार्टर्डको सेयरः बढ्दा ५५५ नकट्ने, घट्दा ५१३ बाट नझर्ने (समग्र विश्लेषण)

A+ A A-

कम लागतको निक्षेपले नाफामा सुधार
कर्जा र निक्षेपको वृद्धिदर सुस्त, आक्रामक हुने घोषणापछि पनि बढेन
रिटेल र एसएमई क्षेत्रमा विस्तार बढ्दो

१६ माघ २०४३ देखि सञ्चालनमा आएको स्ट्याण्डर्ड चार्टर्ड बैंक (एससीबी) नेपालले चालू आवको पहिलो त्रैमासमा ६.२८ प्रतिशतले नाफा बढाएको छ । बैंकको नाफा ६४ करोड ४१ लाख पुगेको छ । नाफामा सुस्त वृद्धि देखिए पनि समग्र बैंकिङ क्षेत्रको औसतभन्दा माथि नाफा छ ।

बैंकले ८ अर्बको चुक्ता पुँजी पुर्‍याउन बोनस र एफपीओमा जोड दियो । बैंकले यस पटक पनि नगद लाभांश मात्रै घोषणा गरेको छ । बैंकले २३ मंसिरमा हुने साधारणसभामा २२.५ प्रतिशत नगद लाभांश दिने पारित गर्ने भनेको छ । यससँगै एससीबीले विगत ५ वर्षमा वार्षिक औसत ४४.९१ प्रतिशतको लाभांश दिएको छ ।

बैंकले हालसम्मको नाफाको आधारमा लगानीकर्तालाई ४९ करोड ४ लाख रुपैयाँ वितरण गर्न सक्छ । यो भनेको चुक्ता पुँजीका आधारमा ६.१२ प्रतिशत हो । निश्चय नै आव अन्त्यमा यो दर बढ्न सक्छ ।

बैंकको जगेडा तथा सञ्चित कोषमा ५ अर्ब १० करोड रुपैयाँ छ । सञ्चित तथा जगेडामा औसतभन्दा माथि छ । बैंकको ब्याज आम्दानी १८ प्रतिशत र खुद ब्याज आम्दानी करिब १० प्रतिशतले बढेको छ ।

निक्षेपमा खासै वृद्धि नभए पनि र कर्जा घटेपछि पनि बैंकको खुद ब्याज आम्दानी भने बढेको छ । निक्षेप संकलन र कर्जा लगानीमा भने समग्र क्षेत्रको औसतभन्दा तल छ । १ अर्ब ७७ करोड रुपैयाँ ब्याज आम्दानी गरेको बैंकको खुद ब्याज आम्दानी ९३ करोड रुपैयाँ पुगेको छ । कोष लागत भने ४.८२ प्रतिशतबाट बढेर ५.३२ पुगेको छ ।

खराब कर्जा अनुपात सीमान्तदरमा घटेर ०.१८ प्रतिशतमा सीमित छ । कर्जा नोक्सानको सम्भावनाको आधारमा बैंकले २४ लाख रुपैयाँ प्रावधान राखेको छ ।

निक्षेप प्राथमिक पुँजीका आधारमा कर्जा लगानी अनुपात ६९.९३ प्रतिशत छ । बैंकले थप लगानी गर्न सक्ने अवस्था भए पनि यसो गरेको छैन ।

बैंकले कोर्स करेक्सन गर्ने खबरहरू आएका थिए । गत आव अन्त्यमा कर्जा लगानी बढाएको कारण कर्जा निक्षेप अनुपात ७८ सम्म पुगेको बैंकले अहिले पुनः त्यसमा ब्रेक लगाएको छ । गतवर्ष अन्य बैंकहरू तरलता अभावमा रहँदा बैंकले बेलाबेलामा यसको लाभ उठाउँदै आएको थियो ।

बैंकको प्रतिसेयर आम्दानी ३२.१६ रुपैयाँ, प्रतिसेयर नेटवर्थ १ सय ९४ रुपैयाँ र मूल्य आम्दानी अनुपात १७.८२ गुणा छ ।

अन्तर्राष्ट्रिय बैंक स्ट्याण्डर्ड चार्टर्ड ग्रिनलेज र बेलायतको लगानी रहेको बैंकमा त्यसपछि अग्रवाल समूहको सेयर स्वामित्व धेरै छ । बैंकको अध्यक्षमा जितेन्दर अरोरा छन् । बैंकको प्रमुख कार्यकारी अधिकृतमा अनिरभन घोष दस्तिदार छन् ।

हालै क्रेडिट रेटिङ एजेन्सी इक्रा नेपालले कम्पनीलाई ट्रिपल ए रेटिङ दिएको छ । रेटिङ कम्पनीले गरेको विश्लेषणका केही मुख्य पक्षहरू निम्न छन्ः

–स्वस्थकर निक्षेप संरचना

–निक्षेप र कर्जामा केन्द्रीकरण (प्रमुख २० ग्राहकको निक्षेपमा ३५ र कर्जामा ३० प्रतिशत हिस्सा)

–कर्जामा सावधानी अपनाइरहेका कारण लगानी कम

–रिटेल र एसएमई क्षेत्रमा विस्तार बढ्दो

–बलियो समूहको लगानी रहेको हाइड्रोपावर र पर्यटन क्षेत्रमा मात्र लगानी

–निर्माणको चरणमा पुगेको हाइड्रोमा मात्र लगानी

–पुँजी लागतमा हुन सक्ने नियन्त्रण र बजारमा निक्षेपका लागि भइरहेको प्रतिस्पर्धाले कर्जा लगानीमा भार पर्न सक्ने, कर्जा लगानीलाई याद गर्नुपर्ने देखिन्छ

–तर कम लागतको निक्षेप संकलनमा राम्रो रहेको बैंकलाई यसबाट लाभ

–बैंकले वर्षौंदेखि खराब कर्जा कम दरमा राख्न सफल हुँदै आएको छ

–खुद ब्याज मार्जिन स्वस्थकर अवस्थामा, ३.९९ प्रतिशत

पर्ख र हेर

बैंकको सेयर एक वर्षयताकै न्यून विन्दु (५ सय २५ रुपैयाँ) नजिक छ । लाभांश प्राप्त गर्ने अन्तिम दिन भएका कारण बुधवार मूल्यमा सुधार देखियो । हाल ५ सय २८ रुपैयाँमा कारोबार भइरहेको छ । ५ सय २५ मा बैंकले टेवा खोजिरहेको छ ।

१४ दिने आरएसआई सूचकले बैंकको सेयर सूचक स्केल २५ मा देखाएको छ । बैंकको सेयर अधिक विक्रीको क्षेत्रमा रहेको यसले देखाउँछ । आरएसआई स्केल ३० भन्दा मुनि भए सेयर अधिक बिक्री क्षेत्रमा, ३० देखि ७० बीचमा भए सन्तुलित क्षेत्रमा र ७० भन्दा माथि भए अधिक खरिद क्षेत्रमा रहेको विश्लेषण गरिन्छ ।

२१ दिने सिम्पल मुभिङ एभरेज रेखा ७ दिने रेखालाई तल पारेरै दूरी कायम गरिरहेको छ । मूल्यमा सुधार देखिइनसकेको यसले संकेत गर्छ । पीभट विश्लेषणले भने अब बजार बढ्ने क्रममा रहे आगामी एक महिनामा ५ सय ५५ मा पहिलो प्रतिरोध र घट्ने क्रममा रहे ५ सय १३ मा पहिलो टेवा पाउने देखाउँछ ।

बैंकको सेयर मूल्यले अन्तिम तीन दिनमा पहिलो दिन कालो मैनबत्ती, दोस्रो दिन डोजी र तेस्रो दिन सेतो मैनबत्ती आकृति बनाएको छ । यसले मूल्य घट्न रोकिन सक्ने सम्भावनालाई देखाएको छ । तर, यो संकेत दरिलो भने छैन । कालो मैनबत्तीको सुरु मूल्यसम्म नै सेतो मैनबत्ती पुग्न नसकेकाले मूल्य बढिहाल्नेमा शंका छ । तर, ५ सय २५ रुपैयाँ मूल्य आसपास बैंकले टेवा पाइरहेकोले केही दिन पर्खेर लगानी गर्ने निर्णय लिनु उपयुक्त हुन सक्छ ।