बालिका तस्करीमा भारतीय गिरोह सक्रिय

बालिका अपहरण गरी भारत लैजाँदै गर्दा स्थानीयले नियन्त्रणमा लिएका भारत, पश्चिम बंगालका बिनोद साह । तस्बिर : सुजीतकुमार झा

A+ A A-

नेपाली बालिका चोरीमा भारतीय गिरोह संलग्न रहेको खुलेको छ । बालिका चोरी आरोपमा दुई भारतीय नागरिक पक्राउ गरेको एक महिना नबित्दिै पुनः अर्का भारतीय नागरिक सोही आरोपमा पक्राउ परेका छन् ।

नेपालबाट बालिका चोरेर भारतमा बेच्दै आएको सूचना पाएपछि प्रहरीले बालिका तस्करी गर्नेविरुद्ध निगरानी बढाएको छ । सप्तरी प्रहरीले मंगलबार एक अर्का भारतीयलाई बालिका तस्करी गरेको आरोपमा पक्राउ गरेको जनाएको छ ।

पक्राउ पर्नेमा भारतको पश्चिम बंगाल राज्यको शिलीगुरी ठेगाना बताउने ५० वर्षीय विनोद साह छन् । बंगाली भाषा मात्र बोल्न जान्ने उनी पटक–पटक आफ्नो ठेगाना फरक–फरक बताउने गरेकाले वास्तविक ठेगाना पत्ता लगाउन कठिन भइरहेको प्रहरीले जनाएको छ ।

यसको अनुसन्धानका लागि बंगाली भाषा बुझ्ने एक स्थानीयको सहायताले उनी बंगाल राज्यका बासिन्दा भएको सप्तरीका प्रहरी नायब उपरीक्षक तिलक भारतीले पुष्टि गरे । प्रहरीले उनको साथबाट एक थान मोबाइल र पूजामा प्रयोग हुने घण्टी बरामद गरेको छ ।

उनलाई बिहान ९ बजेतिर स्थानीय पब्लिक विन्देश्वरी माध्यमिक विद्यालयमा कक्षा ३ मा पढने ५ वर्षीया बालिका निशा चौधरीलाई लिएर जाँदै गरेको अवस्थामा स्थानीयले नियन्त्रणमा लिई प्रहरीलाई बुझाएका थिए ।

‘सप्तरीको विष्णुपुर गाउँपालिका–७ का मनिकलाल चौधरीकी छोरी निशालाई विद्यालय जाने क्रममा बाटोमै चक्लेट र १ सय भारतीय रुपैयाँको नोट दिँदै फकाएर लैजाँदै गरेको देखेपछि स्थानीयले नियन्त्रणमा लिएका थिए’, ५ नम्बर वडाका वडाध्यक्ष समिर झाले भने । आक्रोशित स्थानीयले कुटपिट गरी निर्घात बनाएको अवस्थामा प्रहरीले नियन्त्रणमा लिएको हो ।

अहिले प्रहरी हिरासतमा रहेका साहसँग आवश्यक सोधपुछ भइरहेको प्रहरी नायब उपरीक्षक भारतीले बताए । बालिकालाई मंगलबारै प्रधानाध्यापक अरुणकुमार झाको रोहबरमा अभिभावकको जिम्मा लगाइएको छ ।

गत कातिक १४ गते पनि हनुमाननगर कंकालिनी नगरपालिका–४ स्थित मामाको घर अगाडि खेल्दै गरेकी ६ वर्षीया बालिकालाई चक्लेट र विस्कुटको प्रलोभन दिएर साइकलमा भारतर्फ लैजाँदै गरेको अवस्थामा दुई भारतीय नागरिक पक्राउ परेका थिए ।

पक्राउ परेका भारत बिहार राज्य,सुपौल जिल्लाका २० वर्षीय आनन्द गोश्वामी र २२ वर्षीय अमिर झा अहिले अनुसन्धानका क्रममा हिरासतमै छन् । पछिल्लो समय भारतीय तस्करले तराई क्षेत्रका बालिकालाई लक्षित गरेका छन् ।

सानो उपहारमा पनि प्रभावित हुने भएकाले घरमा कोही नभएको अवस्था, विद्यालयमा जाने वा फर्किने बेला अपहरण गर्ने गरेका छन् । प्रहरीले स्थानीयलाई आफ्ना बालबालिकाको सुरक्षामा ध्यान दिन स्थानीयलाई अनुरोध गरेको छ । साथै, गाउँमा कोही शंकास्पद अपरिचित व्यक्ति देखिएमा तुरुन्त प्रहरीलाई खबर गर्न पनि आग्रह गरेको छ ।

प्रकाशित मिति: बुधबार, मंसिर ११, २०७६ १२:२३