१३औं सागमा दोस्रो हुने हाम्रो लक्ष्य हो

A+ A A-

मुलुकको प्रतिष्ठासँग जोडिएको १३औं दक्षिण एसियाली खेलकुद (साग) १५ मंसिरबाट औपचारिक रूपमा सुरु हुँदैछ । आयोजक राष्ट्रिय खेलकुद परिषद् (राखेप)ले प्रतियोगिताको तयारी करिब पूरा भएको जनाएको छ । सन् १९९९ मा नेपालमै आयोजित आठौं साग नेपालका लागि सम्झनलायक रह्यो ।

तर, यसपटक भौतिक पूर्वाधार निर्माणमा ढिलाइ हुँदा सागको तयारी हतारमा गरिएको छ । आयोजकको ध्यान खेलाडीभन्दा व्यवस्थापकीय र प्राविधिक पक्षमै बढी केन्द्रित हुँदा नतिजा राम्रो नआउने हो कि भन्ने चिन्ता पनि छ । यसै सन्दर्भमा सागको तयारी, अपेक्षित नतिजालगायतका विषयमा राष्ट्रिय खेलकुद परिषद् (राखेप)का उपाध्यक्ष पिताम्बर तिम्सिनासँग गरिएको कुराकानी :

सागको तयारी कहाँ पुग्यो ?

साग हाम्रो राष्ट्रिय प्रतिष्ठासँग जोडिएको प्रतियोगिता हो । हामी प्रतियोगिताको अन्तिम तयारी पूरा गर्ने चरणमा छौं । काठमाडौंमा २१, पोखरामा ९ र जनकपुरमा एउटा खेल आयोजना गर्दैछौं । फुटबल, भलिबल र क्रिकेटका खेल पोखरा र काठमाडौंमा हुनेछन् । प्रतियोगितामा कुल ३ सय २४ स्वर्ण, ३ सय २४ रजत तथा ४ सय ८७ कास्यका लागि प्रतिस्पर्धा हुनेछ ।

सागलाई भव्य र सभ्य रूपमा सम्पन्न गर्न सबै संयन्त्र परिचालन गरेका छौं । ७ हजार खेलाडी र अफिसियलका लागि हामीले ८४ वटा होटल बुक गरेका छौं । नेपाल प्रहरी, सशस्त्र प्रहरी र नेपाली सेना गरी २२ हजार बढी सुरक्षाकर्मी खटाइनेछ । २ हजारभन्दा बढी स्वयंसेवक हुनेछन् । राखेपबाट मात्रै १ हजार कर्मचारी हुनेछन् । यसैगरी, अन्य मन्त्रालयबाट कर्मचारी, विज्ञहरू रहनेछन् ।

हामीले अनलाइन टिकेटिङको पनि व्यवस्था मिलाएका छौं । मैदानहरू करिब सबै तयार गरिएको छ । अहिले चाहिँ मञ्च व्यवस्थापनको क्रममा छौं ।

तर, हिटिङ स्वीमिङ पुल, दशरथ रंगशाला, पोखरा रंगशाला त अझै तयार भएको देखिँदैन त ?

यसमा हामी काम गरिरहेका छौं । प्रतियोगिता सुरु हुन अझै केही दिन बाँकी छ । प्रतियोगिता सुरु हुनुभन्दा दुई दिनअगाडि सबै पूर्वाधार तयार भइसक्छन् । यसमा हामी ढुक्क छौं ।

अन्तर्राष्ट्रिय प्रतियोगिता गर्दा कम्तिमा ३ महिनाअघि नै पूर्वाधार सम्पन्न हुनुपर्ने हो कि होइन ?

तयारी अगाडि नै सकिएको भए राम्रो हुन्थ्यो ।

यत्रो ठूलो प्रतियोगिता आयोजना गरिरहँदा बेलैमा तयारी नसकिनु, कामहरू हतारमा हुनुले राम्रो नतिजाको संकेत गर्ला त ?

विल्कुल गर्दैन । सार्क रिजनका मुलुकहरू यस्तैयस्तै हुन् । अन्तिममा भए पनि हामी सागको व्यवस्थापकीय पाटो र प्रतियोगात्मक नतिजामा अब्बल नै हुन्छौं भन्ने मेरो विश्वास छ । कुनै पनि काम गर्दा सानोतिनो कमजोरी हुन्छन् । तर, कमजोरी भयो भनेर त्यो काम नै बन्द गरिदिने होइन, सुधार गरेर अघि बढ्ने हो ।

हामीले आईएसओ र सम्बन्धित संघहरूले सर्टिफाइ गरेका सामग्रीहरू ल्याएका छौं । पूर्वाधार पनि तयार पारेका छौं । खेलाडीको प्रदर्शन पनि उत्कृष्ट हुन्छ भन्ने विश्वास छ ।

हामी नेपाल सागको आयोजकसँगै प्रतिस्पर्धी पनि हो । तर, तपाईंहरूको ध्यान खेलडीभन्दा बढी प्राविधिक पक्षतिर गएको जस्तो देखिन्छ नि ?

आयोजक भएपछि सफल व्यवस्थापनको कुरा आउँछ । नेपालमा हुन लागेको खेल क्षेत्रको यो महाकुम्भ हो । त्यसैले यसलाई सफल पार्न हामी दत्तचित्त भएर लागेका छौं । यसो गरिरहँदा फेरि खेलाडीतिर हामीले ध्यान नदिएको होइन । हामीले खेलाडीप्रति कति ध्यान दिएका छौं भन्ने कुरा तपाईंले नतिजाबाट देखिहाल्नुहुन्छ नि ।

सन् १९९९ मा नेपालले दोस्रो पटक सागको आयोजना गर्दा ६ महिनाअगाडि नै खेलाडीहरूको बन्द प्रशिक्षण सकिएको थियो । उनीहरू यूरोपतिर गएर तालिम गर्न थालिसकेका थिए । यसपटक आजसम्म तपाईंहरू तयारी नै पूरा नगरेको अवस्था हुनुहुन्छ, खेलाडीतिर ध्यान दिनुभयो भनेर कसरी पत्याउने ?

भौतिक पूर्वाधारको निर्माणपछि दोस्रो पक्ष भनेको खेलाडीको प्रशिक्षण नै हो । खेलाडीहरूको प्रशिक्षण त पहिलेभन्दा राम्रो गरेका छौं हामीले । तीन चरणमा बन्द प्रशिक्षण र छनोट भए । २१ खेलका प्रतिस्पर्धीहरू प्रशिक्षणका लागि विदेश पठाएका छौं । आठ वटा खेलका खेलाडीलाई हामीले विदेशी प्रशिक्षक बोलाएर प्रशिक्षण दिएका छौं । त्यसैले खेलाडीप्रति ध्यान नदिएको भन्ने होइन । मैले फेरि पनि भने रिजल्टले देखाउने छ, धेरै कुरा ।

नेपालले आठौं सागमा सबैभन्दा राम्रो नतिजा हासिल गरेको थियो । त्यसयता नेपालले उत्कृष्ट नतिजा ल्याउन सकेको छैन । यसपटक कस्तो रिजल्टको अपेक्षा गर्नुभएको छ ?

सागमा दोस्रो हुने हाम्रो लक्ष्य हो । त्यसपछि धेरै सागमा मार्सल आर्ट्स छुटे जसका कारण हामी अलि पछि परेकोजस्तो देखियो ।

मलाई लाग्छ, यसपटक हामी दोस्रो हुन्छौं । योपटक हामीले २६ वटा खेल सञ्चालन गरिरहेका छौं । यी सबैमा पदक हात पर्ने विश्वास छ ।

कुरा जति नै ठूला गरे पनि दक्षिण एसियामा नेपालको हैसियत चौथो र पाँचौं नै हो । यसपटक कुन खेलबाट बढी पदक अपेक्षा गर्न सकिन्छ ?

खासगरी महिला फुटबल तथा मार्सल आर्टमा कराँते, तेक्वान्दो, उसु र आर्चरीमा बहुमत स्वर्णपदक जित्ने हाम्रो लक्ष्य छ । यसबाहेक महिला भलिबललगायत नयाँ खेलहरूबाट पनि हामीले पदकको अपेक्षा गरेका छौं । जे होस्, आठौं सागमा जे रिजल्ट निकालेका थियौं त्योभन्दा तल हामी झर्दैैनौं ।

हामीसँग उत्कृष्ट खेलाडी छन् र हामी अन्तर्राष्ट्रिय स्तरको प्रतियोगिता गर्न सक्षम छौं भनेर प्रमाणित गर्नु छ । हामी यी दुइटै कुरा गरेर देखाउँछौं ।

साग आयोजनाको विषयमा सरकारले प्रत्यक्ष रूपमा कत्तिको सहयोग गरेको छ ?

सरकारको पूर्ण सहयोग नभई सागजस्तो भव्य प्रतियोगिता कसरी आयोजना गर्न सकिन्छ र । प्रतियोगिता आयोजनाका लागि बजेटदेखि नैतिक, भौतिक, आर्थिक, कूटनीतिक हरेक पक्षमा सरकारले भरपूर सहायता उपलब्ध गराएको छ । यो मुलुककै प्रतिष्ठाको लागि भइरहेको प्रतियोगिता हो र राखेप भनेको सरकारकै एउटा अंग हो । प्रधानमन्त्रीज्यू स्वयमले पनि १३औं सागलाई भव्य र ऐतिहासिक रूपमा सम्पन्न गर्न कुनै कसर बाँकी नराख्नू भन्ने निर्देशन दिनुभएको स्मरण गर्न चाहन्छु । उहाँले खेलाडीहरूलाई पनि प्रोत्साहन गरिरहनुभएको छ ।

यसअघि राखेपकै प्रतिनिधिले सरकारले पर्याप्त बजेट दिएन, खेल पूर्वाधार निर्माणमा चासो देखाएन भन्थे त ?

अगाडि भन्थे होलान् तर, अहिले भन्दैनन् । किनकि, सरकारको सहयोग नभएको भए यो पटक पनि सागको मिति सर्न सक्थ्यो । हामी त प्रतियोगिताको घाँटीमा छौं । यसर्थ, हामीलाई सरकारले भरपूर सहयोग गरेको छ ।

हामी साग आयोजनाको संघारमा छौं । कतिपय खेल संघभित्र अझै पनि विवाद चलिरहेको छ । खेलाडी छनोट, बन्द प्रशिक्षण र प्रशिक्षक छनोटमा समेत यसको प्रभाव देखियो । यसले कतै खेलाडीको प्रदर्शन र नतिजामा त असर पार्दैन ?

संघ/संगठनभित्र विवाद, बहस हुन्छन् । यो नौलो कुरा होइन । राखेपले त्यस्ता विवाद समाधानका लागि अग्रसरता लिएको छ र केही हदसम्म हामी सफल पनि भएका छौं । अर्थात्, धेरै संघको विवाद हामीले मिलाइसकेका छौं ।

संघभित्रको विवादका कारण खेलाडीको प्रदर्शनमा असर नपरोस् भनेर राखेप सचेत रहेकैले उत्कृष्ट नतिजाको अपेक्षा गरेका हौं । अहिले देशको गौरव बढाउने बेला हो । सागलाई सबै मिलेर भव्य रूपमा सम्पन्न गर्नुपर्छ भनेर हामीले सबैलाई एक ठाउँमा ल्याएका छौं । विवादका कुरा सागपछि बसेर मिलाउन सकिन्छ ।

भनेपछि सागले नेपालको इज्जत जोगाउँछ भन्नेमा तपाईं ढुक्क हुनुहुन्छ ?

म शतप्रतिशत विश्वस्त छु । हामी कुनै कमजोरी नदेखिने गरी सागको सफल आयोजना सम्पन्न गर्नेछौं । साग नेपालको राष्ट्रिय प्रतिष्ठाको विषय हो । खेल क्षेत्रलाई मात्रै नभएर समग्र नेपाललाई विश्वसामु चिनाउने एउटा अवसर हो ।

सरकारले भ्रमण वर्ष २०२० मनाउँदै छ । यसलाई पनि सागले महत्त्वपूर्ण टेवा पुर्याउने छ । त्यसकारण सबैलाई म हार्दिक आह्वान गर्न चाहन्छु, आउनुस् हामी सबै मिलेर सागलाई भव्य रूमा सफल पारौं ।

प्रकाशित मिति: बुधबार, मंसिर ११, २०७६ ०९:४८