यस्तोसम्म भइरहेको छ नेपाल क्लियरिङ हाउसमा

A+ A A-

नेपाल राष्ट्र बैंक, २८ वटै वाणिज्य बैंक र विकास बैंक तथा फाइनान्स कम्पनीको लगानीमा स्थापना भएको नेपाल क्लियरिङ हाउसमा प्रमुख कार्यकारी अधिकृत निलेश सिंह प्रधान र प्रमुख संचालन अधिकृत मुनि राजभण्डारीले मनोमानी गरेका छन् ।

कम्पनीको व्यवस्थापनको जिम्मा लिएर बसेका प्रधान र राजभण्डारीले आर्थिक हिनामिना गरेका स्रोतले बतायो । कम्पनीमा नेपाल राष्ट्र बैंकका कार्यकारी निर्देशक अध्यक्ष र वाणिज्य बैंकहरूका डेपुटी प्रमुख कार्यकारी अधिकृत रहने व्यवस्था भए पनि व्यवस्थापनको जिम्मा पाएका सिंह र राजभण्डारीले मनोमानी गरेका हुन् ।

सिंह र राजभण्डारीमाथि आर्थिक हिनामिना गरेर संस्थालाई नोक्सानी पुर्‍याएको स्रोतले दाबी गर्‍याे । स्रोतका अनुसार सार्वजनिक खरिदमा मनोमानी गरिएको, टेण्डरमा चलखेल गरिएको, अनधिकृत रूपमा कमाएकाे रकम आफन्तको नाममा राखिएको, अनधिकृत रूपमा कम्पनीमा आफन्तलाई जाखिर खुवाइएको तथा गैरकानुनी रूपमा आफ्नो आर्थिक सुविधा वृद्धि गरेको आरोप लागेको छ ।

‘सिंह र राजभण्डारीले टेण्डरमा चलखेल गरेका छन्, अनधिकृत रूपमा आफन्तलाई कम्पनीमा जागिर दिलाएका छन्, गैरकानुनी रूपमा आर्थिक सेवा सुविधा लिएका छन्, गैरकानुनरी रूपमा कमाएकाे रकम आफन्तको बैंक खातामा राखेका छन्,’ स्रोतले भन्यो ।

कम्पनीको संचालक समिति अध्यक्ष नेपाल राष्ट्र बैंकका कार्यकारी निर्देशक नरेश शाक्य छन् । सदस्यहरूमा हिमालयन बैंकका उपमहाप्रबन्धक उज्वलराज राजभण्डारी, सिटिजन्स बैंक इन्टरनेसनलका सहायक प्रमुख कार्यकारी अधिकृत उमांग शर्मा, नेपाल बंगलादेश बैंकका डेपुटी प्रमुख कार्यकारी अधिकृत सुरेन्द्र भूषण श्रेष्ठ, स्मार्ट च्वाइस टेक्नोलोजीका निर्देशक कुसुम लामा, गरिमा विकास बैंकका उपमहाप्रबन्धक माधवप्रसाद उपाध्याय र रिलायन्स फाइनान्स कम्पनीका डेपुटी प्रमुख कार्यकारी अधिकृत समाज प्रकाश श्रेष्ठ छन् ।