रसुवागढी भन्सारबाट चार वर्षमा २४ अर्ब राजस्व

A+ A A-

रसुवागढी नाकाबाट सामान आयात निर्यात हुन थालेपछि प्राप्त राजस्वको यकिन तथ्यांक सार्वजनिक भएको छ । १५ मंसिर २०७२ देखि ७ मंसिर २०७६ सम्मको कुल भन्सार शुल्क तथा मूल्य अभिवृद्धि करसमेतको राजस्व २४ अर्ब ६६ करोड ७१ लाख ५० हजार रुपैयाँ संकलन भएको छ ।

नेपाली बजारका लागि चीनबाट आयात हुने मालवस्तुमा जुत्ता, चप्पल, बच्चाका खेलौना, थर्मस, यान्त्रिक पार्टपुर्जा, विद्युतीय सामान, लत्ताकपडा तथा खाद्यान्नलगायत सामग्रीको शुल्कबापत भन्सार राजस्व प्राप्त भएको भन्सार कार्यालय टिमुरेका प्रमुख भन्सार अधिकृत पुण्यविक्रम खड्काले जानकारी दिए ।

यस्तै, नेपालबाट चीनतर्फ बाँसबाट निर्मित मुढा, हस्तकला, क्युरियोका सामान, तामाका भाँडाकँडा र गलैंचा रसुवागढी नाकाबाट जाने गरेको छ । चालू आवको साउनदेखि कात्तिक मसान्तसम्म हेर्दा लक्ष्यभन्दा ४६ प्रतिशत राजस्व वृद्धि भएकोे छ । सामान आयातको परिमाण बढेपछि भन्सार शुल्कसमेत दिन प्रतिदिन बढ्दै गएको बताइएको छ ।

चिनियाँ सामग्री बोकेर भन्सार हातामा प्रवेश गरेका मालवाहक ट्रकमध्ये सरदर दैनिक ६०\७० वटा जाँच हुने गरेको छ । छिटोछरितोे जाँच परीक्षणका लागि ३० जाँचकी अहोरात्र खटिरहेको भन्सार कार्यालयले जनाएको छ । कर्मचारीको मेहनतबाटै मंसिरकाे पहिलो हप्तामै ३० करोड ६० लाख रुपैयाँ भन्सार शुल्क असुली गर्न सफल भएको बताइएको छ ।

भन्सारको कार्यसम्पादन गर्न १० अधिकृतसहित समग्रमा ६१ कर्मचारी कार्यरत छन् । तिनको तलबभत्तालगायतमा मासिक ५० लाख रुपैयाँ खर्च हुने गरेको जनाइएको छ । पूर्वाधारको कमी, सडक जीर्ण र चाडपर्वका बेला ल्याइने सामान काठमाडौं पुर्‍याउन राजमार्गमा हुने बाढीपहिराेको समस्या जस्ता चुनौती भए पनि सडक सुधार र स्तरोन्नति तथा एकीकृत भन्सार तथा सुक्खा बन्दरगाह निर्माण अगाडि बढिरहेकाले अबको केही समयपछि नेपालको उत्तरी नाका व्यवस्थित र आकर्षण हुने अपेक्षा गरिएको प्रमुख भन्सार अधिकृत खड्काले बताए ।

घरेलु प्रयोजनका लागि भन्दै सानातिना पोके व्यापारीले दिनानुदिन बोकेर ल्याउने क्रम बढेपछि भन्सार शुल्क बेगरको सामान ल्याउन रोक लगाएको छ । जुन व्यापारीले व्यावसायिक प्रयोजनका लागि ल्याउने सबै प्रकारका सामानको परिमाणका आधारमा निर्धारित दररेटअनुसारको भन्सार शुल्क तिर्नुपर्ने र राजस्व चुहावट रोक्न सशस्त्र प्रहरी २१ नं गुल्मले पहरा दिइरहेको भन्सार कार्यालयले जनाएको छ ।

प्रकाशित मिति: मंगलबार, मंसिर १०, २०७६ ०८:४६