प्रदेश १ पर्यटकीय गन्तव्यको केन्द्रबिन्दुः मुख्य मन्त्री राई

A+ A A-

प्रदेश नं. १ सरकारका मुख्य मन्त्री शेरधन राईले प्रदेश नं. १ पर्यटकीय गन्तव्यको केन्द्रबिन्दु भएको बताएका छन् । आइतबार विराटनगरमा उद्योग, पर्यटन, वन तथा वातावरण मन्त्रालय र इम्याजिन नेपालले कोशी टप्पुदेखि सन्दकपुरसम्मको पर्यटन यात्रामा रहेका युवा पर्यटकहरूलाई शुभकामना दिने उद्देश्यले आयोजित यात्रा पूर्वको मिसन कार्यक्रममा बोल्दै उनले यस्तो भनाइ राखेका हुन् ।

मुख्य मन्त्री राईले सर्वोच्च शिखर सगरमाथादेखि गुराँसको राजधानीसमेत प्रदेश १ मा रहेकाले यो प्रदेश पर्यटकहरूका लागि प्रमुख गन्तव्य भएको बताए ।

उनले पूर्वबाट सुरु भएको यो यात्राले प्रदेशलाई समृद्धिको पथमा अगाडि बढाउन टेवा पुग्ने विश्वास व्यक्त गरे । हिमाल, पहाड र तराईको अनुपम संगमको रूपमा रहेको प्रदेश नं. १ प्राकृतिक, सांस्कृतिक, भौगोलिक र धार्मिक विविधताले भरिपूर्ण प्रदेश रहेको उनको भनाइ थियो ।

उनले पूर्वको यात्रामा रहेका युवा पर्यटकहरूलाई लालीगुँरासको राजधानीको रूपमा प्रख्यात प्रदेश नं. १ को तिनजुरे–मिल्के–जलजले तथा विश्व सम्पदाको सूचीमा परेको नाम्जे र त्यसको काखमा रहेको भेडेटारको समेत यात्रा गर्न आग्रह गरे ।

मुख्य मन्त्री राईले प्रदेशमा रहेका मुख्य र आकर्षक पर्यटकीय गन्तव्यहरूलाई विश्वसामु चिनाउन र आन्तरिक पर्यटन प्रर्वद्धनको विकास गर्ने उद्देश्यले हुन गइरहेको पर्यटन वर्ष २०२० लाई सफल बनाउन प्रदेश सरकार योजनाबद्ध रूपमा अगाडि बढिरहेको जानकारी दिए ।

कार्यक्रममा प्रदेश नं. १ का उद्योग पर्यटन वन तथा वातावरणमन्त्री जगदिशप्रसाद कुसियतले नेपालमा २० लाख र प्रदेश नं. १ मा मात्रै ५ लाख पर्यटक भित्र्याउने लक्ष्य हासिल गर्न प्रदेश सरकारले सोे भ्रमणलाई पनि समावेश गरेको जानकारी दिए । भ्रमण शनिबार कोशी टप्पुबाट आरम्भ भई सन्दकपुुर गएर सम्पन्न हुनेछ ।

प्रकाशित मिति: आइतबार, मंसिर ८, २०७६ १९:३८