हेलिकाेप्टर चार्टर्ड गरेर बालविवाह, जनप्रतिनिधि र प्रहरी बने रमिते

A+ A A-

धनुषाको कमला नगरपालिकामा अचानक हेलिकोप्टर अवतरण भयो । शनिबार मध्याह्न धनुषाको कमला– ४, बल्हा सघारास्थित भर्खरै धान काटिएको खेतमा आर६६ टर्बाइन हेलिकोप्टर अवतरण भएलगत्तै हजारौँ स्थानीयको भीड लागेको थियो ।

हेलिकोप्टरबाट १८ वर्षीय किशोर सम्साद सबैभन्दा अगाडि ओर्लिए । त्यसपछि उनीसँगै हेलिकोप्टरमा सवार सम्सादका बुबा र अन्य दुई जना ओर्लिए ।

हेलिकोप्टर अवतरण हुनुभन्दा अगावै दुई दर्जनभन्दा बढी जीपमा सवार पुगिसकेका थिए ।
पत्याउनुहुन्छ ? यहाँ बालविवाहको भव्य तयारी हुँदै छ ।

एक निजी विद्यालयका संचालक बल्हासघाराका सतार कबारीले आफ्नी १६ वर्षीया छोरी सबनमको विवाह चर्चाको विषय बनोस् भन्ने इच्छाका साथ ज्वाइँलाई हेलिकोप्टर चार्टर्ड गरेर ल्याउन लगाएका थिए ।

हुन त विवाह त्यति चर्चाको विषय बन्दैनन् तर यो विवाह दुई कारणले चर्चाको विषय बनेको हो । पहिलो, यो बालविवाह थियो भने अर्को दुल्हालाई हेलिकोप्टर चार्टर्ड गरेर ल्याइएको थियो ।

यो ग्रामीणहरूका लागि मनोरञ्जनको विषय भए पनि कानुनको हिसाबले दण्डनीय रहेको छ । तर, सो बालविवाहमा जनप्रतिनिधिहरू तथा सुरक्षा निकायसमेत रमिते बनेका देखियो ।

१२ बजे जन्तीसहित आएका किशोर दुल्हा आफ्नी १६ वर्षीया दुलहीलाई लिएर ४ बजेतिर आफ्नो घर सिरहाको सुखीपुर नगरपालिका लर्कन्हाका लागि हेलिकोप्टरबाट फर्किएका थिए ।

सो बालविवाह तामाझामका साथ सम्पन्न भयो । विवाहमा वडाध्यक्ष पल्टु कबारी, बल्हा प्रहरी चौकीका इन्चार्ज प्रहरी सहायक निरीक्षक गणेश दनुवार, दुब्बरकोट सशस्त्र प्रहरी वेस क्याम्पका वरिष्ठ हवल्दार रञ्जित दनुवारलगायतको उपस्थिति रहेको थियो ।

सुरक्षा निकायका पदाधिकारीहरू वैवाहिक समारोहलाई सुरक्षा प्रदान गर्नकै लागि सहभागी भएका बताइएको छ । यद्यपि, कानुनी रूपले यो विवाह गैरकानुनी हुँदाहुँदै कानुनकै संरक्षक, पालक प्रहरीकै अगाडि उक्त विवाह कसरी सम्भव भयो भन्ने प्रश्न भने उठेको छ ।

‘तपार्ईं पनि बालविवाहको साक्षी बन्नुभयो नि ?’ भन्ने प्रश्नमा विवाहमा सहभागी सोही वडाका वडाध्यक्ष पल्टु कबारीले भने, ‘मलाई के थाहा बालविवाह भएको हो कि के हो ? म सबैको जन्मदर्ता हेर्दै हिँड्छु र ! गाउँमा हुने विवाहमा निम्ताे थियो, भोज खाएर आएँ, अरू मलाई केही थाहा छैन ।’

निकाह भएका किशोर सम्सादले भर्खर जनकपुरधामस्थित मोडेल मल्टिपल कलेजबाट कक्षा १२ को परीक्षा दिएका छन् । किशोरी भने गाउँकै विद्यालयमा कक्षा १० मा अध्ययनरत थिइन् ।

स्थानीय चौकी इन्चार्ज दनुवारले दुलही बुर्कामा रहेकाले केटीको उमेर कति होला भन्ने अनुमान लगाउन कठिन भएको प्रतिक्रिया दिए । गाउँ ठाउँमा हेलिकोप्टर आएपछि हेर्नेको भीड लाग्ने भएर कुनै असुरक्षाको अवस्था नहोस् भनेर मात्रै सुरक्षा प्रदान गरेको उनको भनाइ छ ।

धनुषाका प्रमुख जिल्ला अधिकारी प्रदीपराज कणेलले २० वर्षमुनि कुनै पनि वहानामा विवाह गर्ने र गराउने हक कसैको नरहेको बताउँदै त्यस्तो गर्ने र गराउने दुवैलाई पक्राउ गरी कारबाही गर्ने प्रतिबद्धता व्यक्त गरे । प्रजिअ कणेलले यो विवाहका बारेमा भने अनभिज्ञता प्रकट गरे ।

प्रकाशित मिति: आइतबार, मंसिर ८, २०७६ १७:३८