ऊर्जामन्त्री–चिनियाँ राजदूतबीच भेटवार्ता, नेपाल–चीनबीच भएका समझदारी अघि बढाउने विषयमा छलफल

ऊर्जामन्त्री–चिनियाँ राजदूतबीच भेटवार्ता, नेपाल–चीनबीच भएका समझदारी अघि बढाउने विषयमा छलफल

दुई देशबीच भएका सम्झौता कायान्वयन गराउने विषयमा आइतबार ऊर्जामन्त्री पुन र चिनियाँ राजदूतबीच भएको भेटवार्ता । तस्बिर : शिलापत्र

A+ A A-

ऊर्जा, जलस्रोत तथा सिँचाइमन्त्री वर्षमान पुन ‘अनन्त’ र चिनियाँ राजदूत होऊ याङछीबीच भेटवार्ता भएको छ । सिंहदरबारस्थित ऊर्जा मन्त्रालयमा आइतबार भएको द्विपक्षीय भेटवार्तामा आपसी हितका साथै दुई देशबीच गर्न सकिने सहकार्यका विषयमा छलफल भएको थियो ।

मन्त्री पुनले ६० मेगावाट क्षमता भएको अपर त्रिशूली ‘ए’ जलविद्युत् आयोजना भर्खरै सम्पन्न भएको भन्दै त्यसमा चीन सरकारले गरेको सहयोगप्रति धन्यवाद व्यक्त गरे ।

भेटमा ऊर्जामन्त्री पुनले गत महिना भएको चिनियाँ राष्ट्रपति सी चिनफिङको नेपाल भ्रमण ऐतिहासिक रूपमा सम्पन्न भएको भन्दै उक्त भ्रमणका क्रममा नेपाल–चीनबीच एक वर्षभित्र ऊर्जा र जलविद्युत्को क्षेत्रमा सहकार्यको योजना बनाई कार्यान्वयन गर्ने समझदारी भएको भन्दै उक्त समझदारीलाई अघि बढाउने विषयमा समेत छलफल भएको थियो ।

उनले नेपाल चीनबीचको ऊर्जा संयन्त्रको पहिलो बैठक सम्पन्न भइसकेको भन्दै दुवै देशबीच भएका समझदारीलाई अघि बढाउन संयन्त्रको दोस्रो बैठक छिट्टै आयोजना हुने विश्वास व्यक्त गरे । चिनियाँ राष्ट्रपतिकै नेपाल भ्रमणका क्रममा सम्झौतामा भएको तमोर र माडी जलविद्युत् आयोजनाको काम अघि बढिरहेको जानकारी गराए ।

मन्त्री पुनले सुनकोशी मरिन डाइभर्सन परियोजनामा चिनियाँ ऋण सहयोगका लागि अर्थ मन्त्रालयमार्फत प्रक्रिया सुरु भएको भन्दै त्यसलाई छिटो अघि बढाइदिन चिनियाँ राजदूतको ध्यानआकर्षण गराए । उनले पछिल्लो समय नेपालको जलविद्युत् क्षेत्रमा लगानीका लागि चिनियाँ लगानीकर्ताहरूको संख्यामा वृद्धि भइरहेकाले सरकार र मन्त्रालयले पूर्ण रूपमा सहजीकरण गरिरहेको बताए ।

चिनियाँ राजदूत यान्छीले चीन ऊर्जा क्षेत्रमा सहकार्यका लागि इच्छुक रहेको धारणा राखिन् । उनले चिनियाँ कामदारले ब्यहोरिरहेकाे भिसाको समस्या, लगानीकर्ताका नीतिगत समस्या र बिजुलीको दररेटजस्ता समस्या समाधानमा ऊर्जामन्त्रीले खेलेको भूमिकाको प्रशंसा गरेकी छन् । साथै, ऊर्जा संयन्त्रको बैठकका लागि आफूले सरोकारवाला निकायसँग छलफल गरेर बैठकको मिती चाँडै टुंगो लगाउने जानकारी दिइन् ।

चिनियाँ राजदूत यान्छीले ऊर्जामन्त्री पुनलाई चीनबाट युनान प्रान्तका गर्भनरको नेपाल भ्रमण हुन लागेको जानकारी दिँदै त्यस क्रममा ऊर्जा क्षेत्रमा सहकार्य गर्न आफूहरू इच्छुक रहेको धारणा राखिन् । ‘चीनबाट गभर्नर तहकै भ्रमण हुँदैछ, युनान जलविद्युत् र ऊर्जा क्षेत्रमा निकै प्रगति गरेको भनेर चिनिने प्रान्त पनि हो, उहाँको भ्रमण ऊर्जा र जलविद्युत् क्षेत्रमा सहकार्य गर्नेमा केन्द्रित हुनेछ’ राजदूत यान्छीले भनिन् ।

प्रकाशित मिति: आइतबार, मंसिर ८, २०७६ १३:४१