उच्च आकर्षण रहेको प्राइमको सेयरमा लगानी गर्नु उचित होला ? (समग्र विश्लेषण)

A+ A A-

नाफा १३.३७ प्रतिशत वृद्धि, नाफामा आधारमा नवौं स्थानमा
लाभांश घोषणा हुन बाँकी रहेकाले आकर्षण कायमै
कैलाश विकास र ललितपुर फाइनान्स प्राप्ति प्रक्रियामा
मुभिङ एभरेजमा क्रसओभर, लगानी गर्नुपर्ने संकेत

प्राइम बैंकले चालू आवको पहिलो त्रैमासमा १३.३७ प्रतिशतले नाफा बढाएको छ । बैंकको नाफा ६५ करोड ९७ लाख पुगेको छ । नाफा रकमका आधारमा समग्र २८ वाणिज्य बैंकहरूमध्ये यस बैंक नवौं स्थानमा छ ।

बैंकले ८ अर्बको चुक्ता पुँजी पुर्‍याउन मर्जर र प्राप्तिलाई जोड दियो । हालै कन्काई विकास बैंक प्राप्ति गरेपछि बैंकको चुक्ता पुँजी ९ अर्ब ६८ करोड रुपैयाँ पुगेको छ । चुक्ता पुँजीमा करिब ४ प्रतिशतले वृद्धि भएको हो । पहिलो त्रैमाससम्ममा यो पूँजी आधारमा प्राइम बैंक सातौं स्थानमा छ ।

प्राइम बैंक कैलाश विकास बैंक र ललितपुर फाइनान्सलाई प्राप्ति गर्ने तयारीमा छ । प्राइमको सय सेयरबराबर कैलाशको ९४ सेयर रहने गरी स्वाप रेसियो तय भएको छ । यसो भएमा प्राइमको चुक्ता पुँजी १२ अर्ब ४ करोड पुग्नेछ । हाल कैलाशको २ अर्ब ५२ करोड पुँजी छ । त्यस्तै, ललितपुर फाइनान्सको भने २३ करोड चुक्ता पुँजी छ । यस कम्पनीसँग स्वाप रेसियो तय भइसकेको छैन ।

बैंकले यसपटकको लाभांश घोषणा गरिसकेको छैन । प्राइमले विगत ५ वर्षमा बार्षिक औषत २०.०८ प्रतिशत लाभांश दिएको छ । चालु आवको हालसम्मको नाफाको आधारमा लगानीकर्तालाई २२ करोड ८८ लाख रुपैयाँ वितरण गर्न सक्छ । यो भनेको चुक्ता पुँजीको आधारमा २.३६ प्रतिशत हो । निश्चय नै आव अन्त्यमा यो दर बढ्नेछ ।

बैंकको जगेडा तथा सञ्चित कोषमा ३ अर्ब २० करोड रुपैयाँ छ । प्राप्ति गरिने भनिएको ललितपुर फाइनान्सको भने ७ करोड ७९ लाख रुपैयाँ सञ्चित नोक्सानी छ ।

बैंकको ब्याज आम्दानी ९.६४ प्रतिशत बढेको छ भने खुद ब्याज आम्दानी ९.२९ प्रतिशतले घटेको छ । २ अर्ब ७१ करोड ब्याज आम्दानी गरेको बैंकको खुद ब्याज आम्दानीमा १ अर्ब ६ करोड पुगेको छ । खुद ब्याज आम्दानीको आधारमा भने बैंक १५औं स्थानमा छ । यो समग्र बैंकको औसतभन्दा कम छ ।

खुद ब्याज आम्दानीसँगै फि, कमिशन र अन्य आम्दानी बढेको छ । सञ्चालन नाफा भने १३ प्रतिशतले बढेको छ । ९४ करोड रुपैयाँ सञ्चालन नाफा भएको छ । बैंकमा कन्काई प्राप्ति पछि ६ लाख रुपैयाँ मात्र प्रिमियम रहेको विवरण प्रकाशित गरेको छ । बैंकले प्रावधान रकम बढाएर २५ करोड १६ लाख पुर्‍याएको छ ।

बैंकको खराब कर्जा अनुपात घटेर १.१४ प्रतिशतमा सीमित भएको छ । तर, ललितपुर फाइनान्ससँग करिब ७५ प्रतिशत खराब कर्जा छ । प्राप्तिपछि यस्तो कर्जामा केही वृद्धि हुन सक्छ ।

प्राइमले नोक्सानी व्यवस्थामा १ सय ५९ प्रतिशत रकम राखेको छ । निक्षेप प्राथमिक पुँजीको आधारमा कर्जा लगानी अनुपात ७७.८६ प्रतिशत छ । बैंकलाई थप लगानीका लागि स्पेस कम भइसकेको छ । कोष लागत ७.६७ प्रतिशत छ ।

बैंकको प्रतिसेयर आम्दानी २७.२४, प्रतिसेयर नेटवर्थ १ सय ५३ रुपैयाँ र मूल्य आम्दानी अनुपात ९.६२ प्रतिशत छ । प्रतिसेयर आम्दानी र नेटवर्थ औसतभन्दा माथि नै रहेपनि मूल्य आम्दानी अनुपात भने औसतभन्दा निकै तल छ । यसले बैंकको सेयरले अझै उचित मूल्य नपाएको देखाउँछ । बैैंकको अध्यक्षमा राजेन्द्रदास श्रेष्ठ र प्रमुख कार्यकारी अधिकृतमा नारायणदास मानन्धर छन् ।

न्यून विन्दुबाट बढ्ने क्रममा

बैंकको सेयर हालसम्मकै न्यून विन्दु (२ सय ५७) आसपास छ । हाल २ सय ७६ रुपैयाँमा कारोबार भइरहेको छ । हाल नजिकको उच्च विन्दु (३ सय ८१) बाट मात्रै १५ प्रतिशत रिट्रस गरेको छ । बैंकको लाभांश घोषणा भए यसको प्रभावले बढ्दो गतिमा देखिएको बैंकको सेयर मूल्य केही समय थप बढ्न सक्छ ।

बैंकको सेयर १४ दिने आरएसआई सूचकको स्केल ७७.७७ मा छ । अहिले बैंकको सेयरमा अत्यधिक आकर्षण रहेको यसले संकेत गर्छ । आरएसआई स्केल ३० भन्दा मुनि भए सेयर अधिक बिक्री क्षेत्रमा, ३० देखि ७० बीचमा भए सन्तुलित क्षेत्रमा र ७० भन्दा माथि भए अधिक खरिद क्षेत्रमा रहेको विश्लेषण गरिन्छ ।

सातदिने सिम्पल मुभिङ एभरेज रेखाले २१ दिने रेखालाई काटेर केही माथि लागेको छ । यसले मूल्य बढ्ने संकेत गरिरहेको छ ।

एक महिनाको पीभट विश्लेषणले भने अब बजार बढ्ने क्रममा रहे आगामी दिनमा २ सय ८१ मा पहिलो प्रतिरोध र घट्ने क्रममा रहे २ सय ६५ मा पहिलो टेवा पाउने देखाउँछ ।

बैंकको सेयर मूल्य साताको पहिलो दिन घटे पनि त्यसपछि लगातार तीन दिन बढेको छ । अन्तिम दिन भने अघिल्लो दिनको अन्तिम मूल्यबराबरमै रहेर बजार बन्द भयो ।

यसले मूल्य घट्न सक्ने सम्भावनालाई पनि देखाइरहेको छ । सोमबारदेखि बुधबारसम्म करिबकरिब एड्भान्स बल्क वियरिश आकृति बनाएर मूल्य घट्ने संकेत गरिरहेको भए पनि मूल्य घटेन, स्थिर रह्यो । लगानीकर्ताहरू यो विन्दुमा निर्णय लिन सकिरहेका छैनन् । अन्य प्राविधिक विश्लेषणले बजार बढ्न सक्ने सम्भावनालाई भने देखाइरहेको छ । आइतबारको कारोबार हेरेर लगानी गर्नु भने सही हुनेछ ।

प्रकाशित मिति: आइतबार, मंसिर ८, २०७६ ११:५२