स्थानीयले दिए गाउँपालिका अध्यक्षविरुद्ध भ्रष्टाचार मुद्दा

स्थानीयले गाउँपालिका अध्यक्ष लोकबहादुर शाहीविरुद्ध प्रशासनमा दर्ता गराएको उजुरी । तस्बिर : शिलापत्र

A+ A A-

केही दिनअघि गाउँपालिकाको बजेटमा अनियमितता भएको भन्दै प्रशासकीय अधिकृतविरुद्ध अख्तियारमा उजुरी दिएका मुगुको सोरु गाउँपालिकाका स्थानीयले गाउँपालिका अध्यक्षविरुद्ध पनि उजुरी दिएका छन् । प्रशासकीय अधिकृत परशुराम उपाध्यायले गाउँपालिकाको बजेट दुरुपयोग गरी भ्रष्टाचार गरेको भन्दै छानबिन गरी कारबाहीको माग गर्दै स्थानीयले मुद्दा दिएका थिए ।

अधिकृतविरुद्ध मुद्दा दायर गरेको एक हप्ता नबित्दै पुनः स्थानीयले गाउँपालिका अध्यक्षविरुद्ध पनि उजुरी दिएका हुन् । बजेटमा अनियमितता गरी विकासको रकम दुरुपयोग गरेको भन्दै पालिका अध्यक्ष लोकबहादुर शाहीविरुद्ध जिल्लाप्रशासन कार्यालय मुगुमा उजुरी दिएका छन् । गाउँपालिका अध्यक्षमाथि छानबिन गरी कारबाही गर्न प्रशासन र अख्तियारलाई स्थानीयले आग्रह गरेका छन् । अध्यक्षले आफ्नो पदको दुरुपयोग गरी विभिन्न समयमा अनियमितता गरेको भन्दै तुरुन्त छानबिन गर्न अनुरोध गरेका छन् ।

स्थानीयले उजुरीमा तत्कालीन कार्यालय सहयोगी धनबहादुर मल्लको नाममा काठमाडौंमा डेलिगेशनका लागि जाने भन्दै गाउँपालिका अध्यक्ष लोकबहादुर शाहीले गत साउनमा तीन लाख रुपैयाँ पेश्की लिन लगाई पछि उक्त रकम आफ्नै खातामा स्थानान्तरण गर्न लगाएको र मल्लको नाममा रहेको पेश्की फर्छ्याेट गराउँदा नक्कली बिल भरपाइ बनाई अनियमितता गरेको आरोप छ ।

अध्यक्ष शाहीका छोरा सवइन्जिनियर बलिगंग शाहीलाई जबर्जस्ती नियुक्त गर्न लगाएको उजुरीमा उल्लेख छ । यस्तै, छोरा बलिजंको बोनश्वरमा रहेको बिल्ड लास्टिङ इन्जिनियरिङ कन्सल्टेन्सी लिमिटेडको फर्मबाट सोरुकोट–थार्पुनाथ हुँदै बिल्लीधारा–फोलु सडकको फिल्डमै नपुगी काठमाडौंदेखि नै गुललबाट डीपीआर तयार पारी १० लाख रुपैयाँ भुक्तानी दिएको उजुरीमा स्थानीयले उल्लेख गरेका छन् ।

गाउँपालिकाको नाममा रहेका २ मोटरसाइकल, २ घोडा र ४–डब्लुडी गाडी व्यक्तिगत प्रयोजनमा लगाउँदै सरकारी सम्पत्तिको चरम दुरुपयोग गरेको आरोप छ । सोरु गाउँपालिका–६ पुरुमुरुमा रहेको स्वास्थ्य कार्यक्रमको खोप केन्द्रको भवन नै नबनाई पुरानो भत्केको भवनको तस्वीर देखाएर ३ लाख रुपैयाँ भुक्तानी लिन लगाएको स्थानीयले प्रशासन र अख्तियारमा दिएको उजुरीमा उल्लेख छ ।

यस्तै, कार्यालयको नाममा रहेको भे १ झ २७९ नम्बरको गाडी मर्मत गर्न लैजाने भन्दै कार्यालय सहयोग चन्द्र दमाईं नेपालीको निवेदनअनुसार उनको नाममा एकलाख रुपैयाँ पेश्की हाल्न लगाएको र पछि उक्त रकम विभिन्न होटलमा खाएको बिल पेश गरी र गाडी बनाउन पुनः कर्मचारीलाई दबा दिएर १ लाख ४६ हजार रुपैयाँ गाडी बनाउने कम्पनीको नाममा हाल्न लगाई पालिकाको बजेट हिनामिना गरेको आरोप छ ।

यस्तै अध्यक्षले आफ्नो पार्टीको विभिन्न कार्याक्रममा जाँदा गाडी रिजर्ब गर्न लगाई ५ लाख रुपैयाँ गाउँपालिकाको बजेटबाट भुक्तानी दिएको स्थानीयले आरोप लगाएका छन् । जिल्ला प्रशासनमार्फत अख्तियारसँग उनीहरूले यी आरोपमाथि छानबिन गरी कारबाही गर्न अनुरोध गरेका छन् ।

प्रकाशित मिति: शुक्रबार, मंसिर ६, २०७६ ०९:१७