दिगो र सुरक्षित निर्माण गर्न विज्ञको सुझाव

A+ A A-

समयमै र गुणस्तरीय निर्माण हुन नसकेकोमा आक्रोश बढिरहेका बेला नेपालसहित अन्य १३ मुलुकका विज्ञहरूको सम्मेलनले १२ बुँदे काठमाडौं घोषणापत्र जारी गरेको छ ।

स्क्याफले तीन दिनसम्म काठमाडौंमा आयोजना गरेको उज्ज्वल भविष्यका लागि उत्थानशील निर्माण विषयक सम्मेलनमा सहभागी विज्ञहरूले खुल्ला प्रतिस्पर्धाका नाममा अति न्यून रकममा ठेक्का दिने व्यवस्था कानुनतः अन्त्य गर्न सुझाव दिएका छन् ।

उनीहरूले काम गर्न सक्ने दरमा प्रतिस्पर्धा गर्नुपर्ने र व्यावसायिक संस्थाहरूले पनि सामाजिक उत्तरदायित्वअन्तर्गत कम्तिमा एक प्रतिशत रकम उत्थानशील संरचना निर्माणमा लगानी गर्नुपर्नेमा जोड दिएका हुन् ।

विज्ञहरूले निर्माण क्षेत्रमा दक्ष कामदारको उत्पादन, निर्माणका प्रत्येक चरणमा सबै सरोकारवालाको सार्थक सहभागिता र नेपालका ठूला आयोजनामा नेपाली परामर्शदाता तथा निर्माण व्यवसायीलाई संलग्न गराउन सके उत्थानशील संरचना निर्माण हुन सक्ने दाबी गरेका छन् ।

नेपालले गोर्खा भूकम्पपछि सिकेका अनुभवलाई विश्व समुदायसम्म पुर्‍याउन आवश्यक रहेको सम्मेलनका सहभागीहरूको जोड दिइरहेका बेला राष्ट्रिय पुनर्निर्माण प्राधिकरणका प्रमुख कार्यकारी अधिकृत सुशील ज्ञवालीले धरहरा पुनर्निर्माणसँगै भूकम्प संग्रहालय बनाउने तयारी गरिरहेको जानकारी दिए । विश्वविद्यालय तहमा छुट्टै अनुसन्धान केन्द्रको स्थापना गर्न लागिएको ज्ञवालीले बताए ।

तीन दिनको सम्मेलन उत्थानशील संरचना निर्माण, यसका चुनौती, जारी प्रयत्न, नवीनतम प्रविधि र पुरातत्त्व संरक्षणलगायतका विषयमा केन्द्रित रहेर विज्ञहरूका कार्यपत्र प्रस्तुति रहेको स्क्याफका महासचिव कृष्णप्रसाद सापकोटाले जानकारी दिए ।

स्क्याफको २९औं वार्षिकोत्सवका अवसरमा आयोजित अन्तर्राष्ट्रिय सम्मेलनमा अमेरिकास्थित नेपाली इन्जिनियरहरूको संस्था र सीईएआईसँग स्क्याफले छुट्टाछुट्टै सम्झौता गरेको सम्मेलन व्यवस्थापक ठाकुरप्रसाद शर्माले जानकारी दिए ।

सम्मेलनको समापनमा समारोहमा स्क्याफका अध्यक्ष राजेश थापाले घोषणापत्रको कार्यान्वयनमा सबै पक्ष जिम्मेवार हुने अपेक्षा गरे । सम्मेलनको उद्घाटन उपराष्ट्रपति नन्दबहादुर पुनले गरेका थिए ।

प्रकाशित मिति: बिहीबार, मंसिर ५, २०७६ १७:५६