दुई वर्षसम्म पर्यटकशून्य पर्यटकीय गन्तव्य गोरखनाथ

A+ A A-

सरकारले सन् २०२० लाई नेपाल भ्रमण वर्षको रूपमा मनाउने घोषणा गरेको छ । भ्रमण वर्षलाई सफल पार्न देश तथा विदेशमा प्रचारप्रसारका विभिन्न कार्यक्रमसमेत सञ्चालन भइरहेका छन् । तर, देशका कतिपय यस्ता पर्यटकीय स्थलहरू छन्, जहाँ दुई वर्षसम्म एक जना पर्यटक पनि पुगेका छैनन् ।

गत आर्थिक वर्षमा नै सरकारले १०० वटा नयाँ पर्यटकीय गन्तव्य र १०० वटा स्थापित तर प्रवर्द्धन गर्नुपर्ने पर्यटकीय गन्तव्य छानिसकेको छ ।

ती स्थानमध्ये बझाङको दुर्गाथली गाउँपालिकामा पर्ने गोरखनाथ मन्दिर र सुर्मा गाउँपालिकामा पर्ने सुर्मा सरोवर ताललाई स्थापित तर प्रवर्द्धन गर्नुपर्ने पर्यटकीय गन्तव्यका रूपमा छानिएको थियो । गत वर्ष नयाँ पर्यटकीय गन्तव्यको रूपमा छानिएको गोरखनाथ मन्दिरलाई ५० लाख रुपैयाँ छुट्याइएको थियो तर यस वर्ष दुवै गन्तव्यलाई २५–२५ लाख रुपैयाँ मात्र छुट्याइएको छ ।

तर, यी दुई गन्तव्य रहेका स्थानीय तहको तयारी भने शून्यजस्तै देखिएको छ । केही समयअगाडि सुर्मा गाउँपालिका अध्यक्ष नरबहादुर बोहराले कुनै तयारी नै नभएको जानकारी गराएका थिए । यता, दुर्गाथली गाउँपालिकाले भने ६ मंसिरको बैठकले निर्णय लिने प्रवक्ता तथा वडा नम्बर ४ का अध्यक्ष महेशप्रसाद जोशीले बताए ।

‘एक सय गन्तव्यमध्ये छानिएको गोरखनाथ मन्दिर बनिसक्यो भन्ने त सुनेका छौं तर म त्यहाँ कहिल्यै गएकै छैन । अर्को बाठपाली मन्दिर त अधुरै छ रे ! हामीलाई त्यहाँको जिम्मेवारी छैन’, दुर्गाथली गाउँपालिकाका अध्यक्ष प्रयागराज जोशीले शिलापत्रसँग भने, ‘जनताले बनाउने हुन् । हामीलाई थाहा छैन । अन्य पर्यटकीय संभावनाको प्रचार प्रसारमा हामी जुटेका छौं ।’

बझाङमा अन्य पर्यटकीय सम्भावना हुँदाहुँदै दुर्गाथली गाउँपालिकाको वडा नम्बर– ७ मा पर्ने यस निजी मन्दिरलाई गन्तव्यमा पारेको भन्दै सांसद भैरवबहादुर सिंहको आलोचना हुँदै आएको छ ।

‘नेताज्यूले कमिसन खानका लागि आफ्नो नुवागी खाने (आफ्ना परिवारसँग बसेर नयाँ अन्न सुरुवात गर्ने पूजा) मन्दिरलाई छान्नुभएको हो । मन्दिर सानो छ । यस क्षेत्रमै हालसम्म स्थानीयबाहेक एउटा पनि पर्यटक आएको छैन’, स्थानीय युवा धनबाबु जप्रेलले भने ।

अर्का स्थानीय आरबी महतले ‘तपाईं कस्तो मजाक गर्नुहुन्छ ? यो गोरखनाथ मन्दिर कहाँ छ दुर्गाथलीमा ?’ भन्दै प्रश्न गरे । समाजसेवी गणेश बुढाले गोरखनाथ मन्दिरलाई मात्र आधार बनाउने हो भने केही उपलब्धि नभएको भन्दा पनि हुने तर गत वर्ष छुट्याएको बढी रकम बाठपाली मन्दिरमा छुट्याएकाले समग्रमा हेर्दा संरचना तयारी हुने क्रममा रहेको र पर्यटक भित्रिने विश्वास व्यक्त गरे ।

यता, पर्यटकीय गन्तव्यका रूपमा छान्ने प्रतिनिधिसभा सदस्य भैरवबहादुर सिंहले भने मन्दिर बने, नबनेको पनि आफूलाई थाहा नभएको भन्दै फोन सम्पर्कविच्छेद गरे ।

बलिया आधार भएका स्थानीय तह पनि गुपचुप

बझाङको प्रवेशद्वार मानिने बित्थडचिर गाउँपालिकाको माथिल्लो बित्थड, भाटी गुफा, मनसाई मन्दिर, बुङ्गल नगरपालिकाको बड्डी ज्यावन धार्मिक स्थल, खोल्लेक घाँसे मैदान र ताल, केदारस्युँ गाउँपालिकाको केदारनाथ मन्दिर, दहशैन ताल, ठूली गोदा ताल, थलाराको खापर दह, मालिका मन्दिर, छडिभेल झरना, दुर्गाथलीको बाठपाली मन्दिर, थलीचौरका ताल, छबिसपाथिभेरा गाउँपालिकाको बान्नी मष्टा मन्दिर, सुर्मा मन्दिर, टिकथली डाँडा, जयपृथ्वी नगर, खप्तडछान्नाको गडराय झरना, खप्तड राष्ट्रिय निकुञ्ज, जयपृथ्वी नगरपालिकाको बारिल झरना, पुगर प्रदर्शनी स्थल, सुर्मादेवी मन्दिर, विनायक, कैलाश गुफा, मष्टा गाउँपालिकाको तपोवन, मष्टा मन्दिर, तल्कोट गाउँपालिको तपोवन, तल्कोट दरबार, साइपाल गाउँपालिकाको साइपाल हिमाल, सेती नदीको झरना र सुर्मा गाउँपालिकाको सुर्मा सरोवर ताल, सुर्मा मन्दिर आदि पर्यटक भित्र्याउने बझाङका बलिया आधारहरू हुन् । तर, यी आधारहरू संरक्षण, प्रचार प्रसार तथा प्रबद्र्धन गर्न नसक्दा ओझेलमा परेका छन् ।

छबिसपाथिभेरा गाउँपालिका अध्यक्ष अक्कलबहादुर धामीले नेपाल भ्रमण वर्ष २०२० लाई स्वागत गर्न आफूहरूले जयपृथ्वी राजमार्गको भाँडेबजारदेखि बान्नीचौरसम्मको सडक सफा गरिसकेको, डकुमेन्ट्री बनाउने तयारीमा भरहेको जानकारी दिए । त्यस्तै, बित्थडचिर गाउँपालिकाका र थलारा गाउँपालिकाले पनि सामान्य तयारी थालेको जनाएका छन् ।

नेपाल भ्रमण वर्ष आउन अब डेढ महिना मात्र बाँकी रहँदा बझाङका अन्य स्थानीय तहहरू अझै बैठकको पर्खाइमा छन् ।

प्रकाशित मिति: बुधबार, मंसिर ४, २०७६ १७:२१