घरजग्गा र सेयर बजारले नरुचाएका खतिवडाको जोगिएला अर्थमन्त्री पद ?

A+ A A-

प्रधानमन्त्री केपी शर्मा ओलीले सम्भवतः आज मन्त्रिपरिषद पुनर्गठन गर्ने भएका छन् । नेकपा अध्यक्षसमेत रहेका प्रधानमन्त्री ओलीले मन्त्री हेरफेरबारे अर्का अध्यक्ष पुष्पकमल दाहालसँग बिहानै छलफल पनि गरिसकेका छन् ।

मन्त्रिपरिषद् पुनर्गठनकै लागि ३ मंसिरमा प्रधानमन्त्री ओली र अर्का अध्यक्ष दाहालले राष्ट्रपतिसँग संयुक्त रूपमा छलफल पनि गरेका छन् ।

मन्त्रिपरिषद् पुनर्गठन हुने करिब पक्का भएसँगै कुन मन्त्री रहने र कुन मन्त्री हट्ने भन्ने चर्चा सुरु भएको छ । नेकपा सचिवालयले मन्त्रिपरिषद् पुनर्गठनको अधिकार प्रधानमन्त्रीलाई दिइसकेको छ । अर्का अध्यक्ष दाहालको सचिवालयले हिजो (३ मंसिर) विज्ञप्ति जारी गर्दै मन्त्री हेरफेर गर्ने अधिकार प्रधानमन्त्रीको भएको स्पष्ट पारिसकेको छ ।

नयाँ बन्ने र हट्ने मन्त्रीको चर्चा भएसँगै आर्थिक क्षेत्रमा भने डा. युवराज खतिवडा अर्थमन्त्रीकै रूपमा रहने हुन् वा हट्ने हुन् भन्ने चर्चा सुरु भएको छ । आगामी चैतमा राष्ट्रियसभाको सांसद पद स्वतः समाप्त हुने भएकाले प्रधानमन्त्री ओलीले खतिवडालाई हटाउँछन् कि हटाउँदैनन् भन्ने अझै यकिन छैन । प्रधानमन्त्री ओलीले सांसद नभएकै अवस्थामा खतिवडालाई अर्थमन्त्री बनाएका थिए ।

खतिवडालाई अर्थमन्त्री बनाउँदा पार्टीभित्र नै विवाद भएको थियो । यस्तै, अर्थमन्त्रीको रूपमा उनले गरेका काम कारबाहीप्रति पनि प्रश्न उठेको छ ।

डा. खतिवडालाई घरजग्गा र सेयर बजारले भने रुचाएको छैन । अर्थमन्त्री हुनेबित्तिकै खतिवडाले बीबीसी नेपाली सेवालाई दिएको एक अन्तर्वार्तामा सेयर बजार र घरजग्गा कारोबारलाई अनुत्पादक क्षेत्र भने र त्यसकै कारण त्यसयता घरजग्गा र सेयर बजार माथि उठ्न सकेन भन्ने आरोप लाग्ने गरेको छ । यद्यपि, उनले सो अन्तर्वार्तामा सेयर बजार, घरजग्गाजस्ता अनुत्पादक क्षेत्रमा धेरै लगानी केन्द्रिकृत हुनु अर्थतन्त्रका लागि राम्रो नहुने बताएका थिए ।

मन्त्री परिवर्तन हुने यकिनसँगै अर्थमन्त्री खतिवडा हट्छन् कि रहन्छन् भन्ने तीब्र प्रतीक्षामा नेपाली सेयर र घरजग्गा बजार छ ।

प्रकाशित मिति: बुधबार, मंसिर ४, २०७६ ११:१७