युट्युबमा हेर्नुहोस् भजनशिरोमणिको जीवनीमा आधारित चलचित्र ‘आचार्य’

भजनशिरोमणि भक्तराज आचार्यको जीवनीमा आधारित नेपाली चलचित्र ‘आचार्य’ युट्युबमा सार्वजनिक भएको छ । ओएसआरको आधिकारिक युट्युब च्यानलमार्फत बुधबार ‘आचार्य’ सार्वजनिक भएको हो । गायक आचार्यको ८२ वर्षको उमेरमा १४ फागुन २०८० मा निधन भएको थियो ।

१३ वर्षअघि नै पहिलोपटक प्रदर्शनमा आएको चलचित्र ‘आचार्य’ भजनशिरोमणिप्रति श्रद्धाञ्जली अर्पण गर्ने उद्देश्यले गत ७ असारदेखि पुनः हलमा प्रदर्शन गरिएको थियो । चलचित्र ‘आचार्य’मा भजनशिरोमणि भक्तराजकै छोरा तथा लोकप्रिय गायक सत्यराज आचार्यले आफ्नो बुबाको भूमिका निर्वाह गरेका छन् ।

प्रशान्त रसाइलीको निर्देशन रहेको चलचित्र ‘आचार्य’ युट्युबमा सार्वजनिक भएको जानकारी दिँदै गायक तथा अभिनेता सत्यराजले सामाजिक सञ्जालमा लेखेका छन्, ‘हाम्रो चलचित्र ‘आचार्य’ आजदेखि तपाईंहरूको चलचित्र भएको छ है ! अब जहाँ, जसरी अनि जति बेला पनि मजासँग आनन्दले हेर्न सक्नुहुनेछ ।’

सत्यराजका अनुसार ६ असोज २०६८ मा पहिलोपटक सिनेमा हलमा प्रदर्शन गरिएको यो फिल्मलाई पुनः सम्पादन गरी प्रदर्शनमा ल्याइएको हो । ‘यो फिल्म हाम्रो बुबा दिवंगत भक्तराज आचार्यलाई एउटा श्रद्धाञ्जली पनि हो । बुबाको चलचित्रलाई पुनः प्रदर्शन गर्न आग्रह आएपछि हामीले प्रदर्शन गर्न लागेका हौँ । यो फिल्म हेर्नेले बुबाको जीवनीलाई बुझ्न पाउनुहुनेछ,’ सत्यराजले गत असारमा भनेका थिए ।

सत्यराज नै पिताको भूमिकामा रहेको यस फिल्ममा स्वर्गीय गायक आचार्यको जीवनीका हरेक पाटालाई पस्किएको छ । फिल्ममा गायक आचार्यसँगै सुनील पोखरेल, अरुणा कार्की, दयाहाङ राई, विपिन कार्की, सौगात मल्ललगायत कलाकारले अभिनय गरेका छन् ।