वाणिज्य बैंकको वित्तीय विवरणः कसले कति कमाए, सूचक कस्ता छन् ?

A+ A A-

सञ्चालनमा रहेका अधिकांश वाणिज्य बैंकले चालू आर्थिक वर्षको पहिलो तीन महिनाको वित्तीय विवरण सार्वजनिक गरेका छन् । विवरणले वाणिज्य बैंकहरूको अवस्था कस्तो भइरहेको छ भन्ने देखाएको छ ।

वित्तीय विवरण सार्वजनिक गरेका बैंकहरूले कुनले कति नाफा कमाए ? कुनको अवस्था कस्तो छ ? परिसूचकहरू कस्ता छन् भन्नेजस्ता जानकारी यहाँ दिन खोजिएको छ ।

प्रभु बैंक

प्रभु बैंकले चालू आवकाे तीन महिनामा ६२ करोड ८४ रुपैयाँ नाफा गरेको छ । गत वर्षको ३ महिनामा प्रभुले ५९ करोड ८४ लाख रुपैयाँ नाफा गरेको थियो ।

बैंकमा असोज मसान्तसम्ममा १ खर्ब ६ अर्ब रुपैयाँ निक्षेप छ । यस्तै, ९१ अर्ब ८५ करोड रुपैयाँ कर्जा लगानी गरेको छ ।

प्रभु बैंकको पूँजीकोष अनुपात ११.०३ प्रतिशत छ । खराब कर्जा अनुपात ३.३२ प्रतिशत छ । पुँजी कर्जा निक्षेप अनुपात (सीसीडी रेसियो) ७७.८१ प्रतिशत छ । आधार दर ९.२४ प्रतिशत छ । बैंकको स्प्रेड दर ५.१५ प्रतिशत ।

माछापुच्छ्रे बैंक

माछापुच्छ्रे बैंकले ३७ करोड ६० लाख रुपैयाँ नाफा गरेको छ ।

माछापुच्छ्रेको निक्षेप ९१ अर्ब २० करोड रुपैयाँ छ । कर्जा तथा सापाटी ८३ अर्ब ६३ करोड रुपैयाँ छ । असोज मसान्तमा बैंकको वासलात १ खर्ब १४ अर्ब रुपैयाँ भएको छ, जुन असार मसान्तको तुलनामा ९ अर्बले बढी हो ।

खराब कर्जा ०.३१ प्रतिशतमा छ । कष्ट अफ फण्ड ७.९९ बाट ७.५७ प्रतिशत छ । आधारदर ११.२१ बाट घटेर १०.५६ प्रतिशतमा झरेको छ ।

कुमारी बैंक

कुमारी बैंकको नाफा गत वर्षको ३ महिनाको तुलनामा १४.२६ प्रतिशतले बढेको छ । कुमारीले ४० करोड १९ लाख रुपैयाँ नाफा गरेको छ । गत आर्थिक वर्षको पहिलो ३ महिनामा बैंकले ३५ करोड १८ लाख रुपैयाँ नाफा गरेको थियो ।

कुमारी बैंकको निक्षेप ५ अर्ब १० करोड रुपैयाँले बढेर ७८ अर्ब ३० करोड रुपैयाँ पुगेको छ । कर्जा तथा लगानी पनि ५ अर्ब रुपैयाँ बढेर ७७ अर्ब २४ करोड रुपैयाँ पुगेको छ ।

कुमारीको प्रतिसेयर आम्दानी १६.८३ रुपैयाँ र प्रतिसेयर नेटवर्थ १२६.३९ रुपैयाँ छ । खराब कर्जा अनुपात घटेर १.०५ प्रतिशतमा झरेको छ । कष्ट अफ फण्ड ७.९१ बाट ७.२२ प्रतिशतमा पुगेको छ । आधार दर ११.०९ बाट १०.६८ प्रतिशतमा झरेको छ । स्प्रेड (निक्षेपमा दिने र कर्जामा लिने ब्याज अन्तर) दर ३.७५ प्रतिशत छ ।

हिमालयन बैंक

हिमालयन बैंकले चालू आर्थिक वर्षको पहिलो ३ महिनामा ६९ करोड ४२ लाख रुपैयाँ नाफा गरेको छ । गत वर्षको सोही अवधिमा हिमालयनको नाफा ६४ करोड ९६ लाख रुपैयाँ थियो ।

हिमालयनले चालू आर्थिक वर्षको पहिलो त्रैमासमा ६.४२ प्रतिशतले नाफा बढाएको छ ।

हिमालयनको चुक्ता पुँजी ८ अर्ब ५२ करोड रुपैयाँ छ । जगेडा कोषमा ५ अर्ब ७९ करोड रुपैयाँ छ । गत वर्षको सोही अवधिमा बैंकको जगेडा कोषमा ५ अर्ब ३० करोड रुपैयाँ थियो ।

यो बीचमा हिमालयन बैंकमा निक्षेप ६ अर्ब रुपैयाँले बढेर १ खर्ब १५ अर्ब रुपैयाँ पुगेको छ । कर्जा तथा लगानी ५ अर्ब रुपैयाँले बढेर ९७ अर्ब ७० करोड रुपैयाँ पुगेको छ ।

हिमालयन बैंकको खराब कर्जा घटेर १.१६ प्रतिशतमा झरेको छ । कस्ट अफ फण्ड ६.१४ बाट ६.४२ प्रतिशतमा पुगेको छ । आधार दर ९.२२ बाट घटेर ८.९३ प्रतिशत भएको छ । स्प्रेड (निक्षेपमा दिने र कर्जामा लिने ब्याज अन्तर) दर बढेर ५.३६ प्रतिशत पुगेको छ ।

बैंकको प्रतिसेयर आम्दानी ३२.५९ रुपैयाँ र प्रतिसेयर नेटवर्थ १९५.८३ रुपैयाँ रहेको छ ।

नेपाल इन्भेष्टमेन्ट बैंक

चालू आर्थिक वर्षको पहिलो ३ महिनामा नेपाल इन्भेष्टमेन्ट बैंकको नाफा घटेको छ । गत आवको पहिलो ३ महिनामा १ अर्ब ५ करोड रुपैयाँ नाफा गरेको इन्भेष्टमेन्ट बैंकले चालू आवको पहिलो ३ महिनामा ८४ करोड ४४ लाख रुपैयाँ नाफा गरेको छ ।

बैंकले यो अवधिमा १ खर्ब ५१ अर्ब २८ करोड रुपैयाँ निक्षेप संकलन गरेको छ । यस्तै, १ खर्ब ३० अर्ब ३ करोड रुपैयाँ कर्जा तथा लगानी गरेको छ ।

१२ अर्ब ८६ करोड चुक्ता पुँजी रहेको बैंकको जगेडा कोषमा १० अर्ब ४२ करोड रुपैयाँ छ । इन्भेष्टमेन्टको खराब कर्जा अनुपात २.८४ प्रतिशत पुगेको छ । आधारदर ८.४८ प्रतिशत, कस्ट अफ फण्ड ६.३४ प्रतिशत छ । स्प्रेड दर ४.३६ प्रतिशत छ । प्रतिसेयर नेटवर्थ २०४.४४ रुपैयाँ छ ।

एनएमबी बैंक

एनएमबी बैंकले गत वर्षको ३ महिनाको तुलनामा नाफा ४८ प्रतिशतले बढाएको छ । गत आवको पहिलो ३ महिनामा ५५ करोड ५ लाख रुपैयाँ नाफा गरेको एनएमबीले चालू आवको सोही अवधिमा ८१ करोड ५१ लाख रुपैयाँ नाफा गरेको छ ।

एनएमबीको निक्षेप २४ प्रतिशतले बढेर १ खर्ब २१ अर्ब रुपैयाँ पुगेको छ । कर्जा तथा सापटी १ खर्ब १० अर्ब रुपैयाँ पुगेको छ । बैंकको खराब कर्जा ०.७६ प्रतिशतबाट बढेर १.९७ प्रतिशत पुगेको छ । आधारदर ९.९३ बाट १०.३३ पुगेको छ ।

सेन्चुरी बैंक

सेञ्चुरी कमर्सियल बैंकले ३७ करोड ८ लाख रुपैयाँ नाफा गरेको छ । गत आवको सोही अवधिमा यस्तो नाफा २७ करोड ४० लाख रुपैयाँ थियो ।

सेन्चुरीको जगेडा कोषमा १ अर्ब २८ करोड रुपैयाँ छ । गत असोज मसान्तसम्ममा सेन्चुरीको निक्षेप ६१ अर्ब रुपैयाँ पुगेको छ भने ५८ अर्ब ५४ करोड रुपैयाँ कर्जा तथा लगानी छ ।

सेन्चुरी बैकको सीडी रेसियो ७९.२१ प्रतिशत छ । खराब कर्जा २.४७ प्रतिशत छ । स्प्रेड दर ४.८४ प्रतिशत छ ।

नेपाल बंगलादेश बैंक

नेपाल बंगलादेश (एनबी) बैंकको पहिलो ३ महिनामा ३३.३२ प्रतिशतले नाफा बढेको छ । असोज मसान्तमम्ममा नाफा ४० करोड २५ लाख रुपैयाँ छ । गत वर्ष सोही अवधिमा एनबीको नाफा ३० करोड १९ लाख रुपैयाँ थियो ।

बैंकको कर्जा तथा लगानी ५५ अर्ब ८५ करोड रुपैयाँ छ । निक्षेप ५९ अर्ब ३७ करोड रुपैयाँ छ । आधारदर १०.२० प्रतिशतबाट ९.८७ मा झरेको छ । कष्ट अफ फण्ड ७.४३ बाट ७.२९ प्रतिशतमा झरेको छ । खराब कर्जा अनुपात १.९७ प्रतिशत छ ।

बैंक अफ काठमाण्डू

बैंक अफ काठमाण्डू (बीओके) ले ३८ करोड ३७ लाख नाफा गरेको छ । गत वर्षको पहिलो ३ महिनामा बिओकेले ३८ करोड ६८ लाख रुपैयाँ नाफा गरेको थियो ।

बीओकेले ८५ अर्ब ७७ करोड निक्षेप संकलन गरेको छ भने ७२ अर्ब ४८ करोड रुपैयाँ कर्जा तथा लगानी गरेको छ ।

बैंकको आधार दर १०.०२ प्रतिशत छ ।

एभरेष्ट बैंक

एभरेष्ट बैंकले ६९ करोड ८ लाख रुपैयाँ नाफा गरेको छ । यो रकम गत आर्थिक वर्षको सोही अवधिको तुलनामा करिब ६ करोड रुपैयाँ बढी हो ।

निक्षेप १ खर्ब ३४ अर्ब रुपैयाँ पुगेको छ । कर्जा तथा लगानी १ खर्ब ९ अर्ब रुपैयाँ छ ।

बैंकको खराव कर्जा ०.१७ प्रतिशत छ । आधार दर ८.५२ प्रतिशत छ । प्रतिसेयर नेटवर्थ २२७ रुपैयाँ छ । प्रतिसेयर आम्दानी १६ रुपैयाँ ४६ पैसा छ ।

कृषि विकास बैंक

कृषि विकास बैंकको नाफा १०.१३ प्रतिशतले बढेको छ । गत आवको पहिलो ३ महिनामा ५५ करोड १४ लाख ६१ हजार रुपैयाँ नाफा गरेको बैंकले चालू आवको सोही अवधिमा ६० करोड ७३ लाख ४३ हजार रुपैयाँ नाफा गरेको छ ।

बैंकले १ खर्ब २३ अर्ब ५४ करोड ६७ लाख रुपैयाँ निक्षेप संकलन गरी १ खर्ब ११ अर्ब ४६ करोड ५७ लाख रुपैयाँ कर्जा तथा लगानी गरेको छ ।

बैंकको खराब कर्जा अनुपात ३.७० प्रतिशत, कस्ट अफ फण्ड ७.३४ प्रतिशत, आधार दर १०.१८ प्रतिशत, स्प्रेडदर ५.२६ प्रतिशत र सीसीडी रेसियो ७१.४२ प्रतिशत छ । प्रतिसेयर आम्दानी २३ रुपैयाँ ३३ पैसा छ ।

प्राइम कमर्सियल बैंक

प्राइम कमर्सियल बैंकले ६५ करोड ९७ लाख रुपैयाँ नाफा गरेको छ । यो नाफा गत आवको सोही अवधिको तुलनामा १३.३७ प्रतिशतले बढी हो ।

प्राइमले ७९ अर्ब १३ करोड ७२ लाख १८ हजार रुपैयाँ निक्षेप संकलन गरेको छ भने ७८ अर्ब ५९ करोड ४९ लाख ३१ हजार रुपैयाँ कर्जा लगानी गरेको छ ।

बैंकको खराब कर्जा १.४१ प्रतिशतबाट घटेर १.१४ प्रतिशत भएको छ । प्रतिसेयर आम्दानी २७ रुपैयाँ २४ पैसा छ ।

लक्ष्मी बैंक

लक्ष्मी बैंकले ४० करोड १९ लाख रुपैयाँ नाफा गरेको छ । गत वर्षको सोही अवधिमा बैंकले ३० करोड ३० लाख रुपैयाँ नाफा गरेको थियो ।

बैंकले ८२ अर्ब २० करोड ५७ लाख रुपैयाँ निक्षेप संकलन गरी ७८ अर्ब १९ करोड ८४ लाख रुपैयाँ कर्जा लगानी गरेको छ ।

बैंकको स्प्रेड दर ४.३३ प्रतिशत छ । खराब कर्जा १.०४ प्रतिशत, कष्ट अफ फण्ड ७.१९ प्रतिशत, आधार दर १०.२४ प्रतिशत छ । बैंकको प्रतिसेयर आम्दानी १८.०२ रुपैयाँ छ भने प्रतिसेयर नेटवर्थ १४५.९४ रुपैयाँ छ ।

जनता बैंक

काठमाडौं । जनता बैंकले पहिलो त्रैमासमा ३६ करोड ६९ लाख नाफा गरेको छ । गत वर्षको सोही अवधिमा बैंकले ३२ करोड १९ लाख रुपैयाँ नाफा गरेको थियो ।

जनता बैंकमा असोज मसान्तमा ७५ अर्ब ३ करोड निक्षेप रहेको छ । ६८ अर्ब ५९ करोड रुपैयाँ कर्जा लगानी छ । खराब कर्जाको अनुपात १.३३ प्रतिशत छ । जनता बैंक र ग्लोबल आईएमई बैंकबीच मर्जर हुदैछ ।

सिद्धार्थ बैंक

सिद्धार्थ बैंकले ५२ करोड १४ लाख रुपैयाँ नाफा गरेको छ । गत वर्षको ३ महिनामा सिद्धार्थले ५२ करोड ५० लाख रुपैयाँ नाफा थियो ।

असोज मसान्तसम्ममा बैंकले १ खर्ब १८ अर्ब ४० करोड ८२ लाख रुपैयाँ निक्षेप संकलन गरेको छ भने १ खर्ब ८ अर्ब ६८ करोड ३२ लाख रुपैयाँ कर्जा लगानी गरेको छ ।

त्यस्तै, बैंकको खराब कर्जा अनुपात १.२८ प्रतिशत छ । गत आर्थिक वर्षको पहिलो त्रैमासमा बैंकमा यस्तो कर्जा अनुपात १.४० प्रतिशत थियो ।

असोज मसान्तसम्म बैंकको आधार ब्याजदर १०.०२ प्रतिशत, स्प्रेडदर ४.४३ प्रतिशत, कोष लागत ७.३२ प्रतिशत छ । बैंकको पुँजी कर्जा निक्षेप (सीसीडी) अनुपात ७७.३६ प्रतिशत र प्रतिसेयर नेटवर्थ १७३ रुपैयाँ २७ पैसा छ ।

नेपाल बैंक

नेपाल बैंकले ५८ करोड १८ लाख रुपैयाँ नाफा गरेको छ । गत वर्षको ३ महिनामा नेपाल बैंकले ९१ करोड ३८ लाख रुपैयाँ नाफा गरेको थियो ।

गत असोज मसान्तमा नेपाल बैंकमा १ खर्ब १४ अर्ब ७९ करोड रुपैयाँ निक्षेप छ । गत वर्षको असोज मसान्तमा नेपाल बैंकमा १ खर्ब १७ अर्ब रुपैयाँ निक्षेप थियो ।

यस्तै, नेपाल बैकले ९२ अर्ब ६५ करोड ९२ लाख १० हजार रुपैयाँ कर्जा तथा लगानी गरेको छ । गत आर्थिक वर्षको सोही अवधिमा बैंकले ९२ अर्ब ४१ करोड रुपैयाँ कर्जा तथा लगानी गरेको थियो ।

नेपाल बैंकको खराब कर्जा अनुपात २.७७ प्रतिशत, कोषको लागत ५.२२ प्रतिशत, सीसीडी रेसियो ६८.६३ प्रतिशत र स्प्रेडदर ४.४७ प्रतिशत छ ।

सनराइज बैंक

सनराइज बैंकले ४५ करोड ४३ लाख रुपैयाँ नाफा गरेको छ । बैंकले गत आर्थिक वर्षको पहिलो त्रैमासमा ३३ करोड ९४ लाख रुपैयाँ नाफा गरेको थियो ।

गत असोज मसान्तसम्ममा बैंकमा ७७ अर्ब ८९ करोड ४६ लाख रुपैयाँ निक्षेप छ भने ७२ अर्ब ५५ करोड १८ लाख रुपैयाँ कर्जा तथा लगानी छ ।

सनराइज बैंकको खराब कर्जा १.२७ प्रतिशत, आधारदर ९.९७ प्रतिशत, कोषको लागत ७.१२ प्रतिशत, सीसीडी रेसियो ७८.०६ प्रतिशत र स्प्रेड दर ४.५० प्रतिशत छ ।

ग्लोबल आईएमई बैंक

ग्लोबल आईएमई बैंकले ४०.५५ प्रतिशतले नाफा बढाएको छ । चालू आर्थिक वर्षको ३ महिनामा ग्लोबल आईएमईले ७५ करोड ४६ लाख रुपैयाँ नाफा गरेको छ । अघिल्लो वर्षको सोही अवधिमा बैंकले ५३ करोड ५८ लाख रुपैयाँ नाफा गरेको थियो ।

बैंकको जगेडा कोषमा ४ अर्ब १ करोड ३२ लाख रुपैयाँ छ । यस्तै, १ खर्ब २८ अर्ब ९९ करोड रुपैयाँ निक्षेप संकलन गरेको ग्लोबल आईएमईले १ खर्ब १८ अर्ब ४८ करोड ७१ लाख रुपैयाँ कर्जा तथा लगानी गरेको छ ।

बैंकको खराब कर्जा अनुपात ०.८५ प्रतिशत छ । प्रतिसेयर आम्दानी २८ रुपैयाँ ८७ पैसा र प्रतिसेयर नेटवर्थ १६५ रुपैयाँ ७० पैसा छ ।

सानिमा बैंक

सानिमा बैंकले १४.४० प्रतिशतले नाफा बढाएको छ । चालू आवको असोज मसान्तसम्ममा बैंकले ५९ करोड ३६ लाख रुपैयाँ नाफा गरेको हो ।

सानिमाको जगेडा कोषमा २ अर्ब ५४ करोड ९० लाख रुपैयाँ छ । गत असोजसम्ममा ९५ अर्ब ९२ करोड रुपैयाँ निक्षेप संकलन गरी बैंकले ८३ अर्ब ५२ करोड रुपैयाँ कर्जा तथा लगानी गरेको छ ।

बैंकको खराब कर्जा अनुपात ०.२४ प्रतिशत, प्रतिसेयर आम्दानी २६ रुपैयाँ ४७ पैसा र प्रतिसेयर नेटवर्थ १३२ रुपैयाँ ८५ पैसा छ ।

सिटिजन्स बैंक

सिटिजन्स बैंकले गत असोज मसान्तसम्ममा ३४ करोड ९१ लाख रुपैयाँ नाफा गरेको छ । गत वर्षको ३ महिनामा बैंकले ४२ करोड ८८ लाख रुपैयाँ नाफा गरेको थियो ।

बैंकको सीसीडी रेसियो ७८.४१ प्रतिशत, स्प्रेडदर ४.१६ प्रतिशत र बेसरेट १०.७५ प्रतिशत छ ।

बैंकले ७२ अर्ब ४३ करोड ९१ लाख रुपैयाँ निक्षेप संकलन गरेको छ । गत आवको ३ महिनामा बैंकले ७० अर्ब ५० करोड ९० लाख रुपैयाँ निक्षेप संकलन गरेको थियो । बैंकले ६७ अर्ब ५५ करोड रुपैयाँ कर्जा तथा लगानी गरेको छ ।

राष्ट्रिय बाणिज्य बैंक

राष्ट्रिय वाणिज्य बैंकले १ अर्ब १२ करोड ७५ लाख रुपैयाँ नाफा गरेको छ ।

रावा बैंकले गत असोज मसान्तसम्ममा १ खर्ब ८७ अर्ब रुपैयाँ निक्षेप संकलन गरेको छ भने १ खर्ब ४३ अर्ब रुपैयाँ कर्जा तथा लगानी गरेको छ ।

बैंकको पूँजीकोष अनुपात १३.९५ प्रतिशत छ । खराब कर्जा अनुपात ३.५० प्रतिशत छ । कष्ट अफ फण्ड ३.९७ प्रतिशत, आधार दर ६.६० प्रतिशत, स्प्रेडदर ५.९६ प्रतिशत छ ।

नबिल बैंक

नबिल बैंकले १ अर्ब १२ करोड रुपैयाँ नाफा गरेको छ । नबिलले गत वर्षको भन्दा ६.७५ प्रतिशतले नाफा बढाएको हो । गत वर्षको ३ महिनामा बैंकले १ अर्ब ५ करोड रुपैयाँ नाफा गरेको थियो ।

गत असोज मसान्तसम्ममा नबिलले १ अर्ब ७२ अर्ब रुपैयाँ निक्षेप संकलन गरेको छ भने १ खर्ब ३५ अर्ब रुपैयाँ कर्जा तथा लगानी गरेको छ ।

नबिलको जगेडा कोषमा १० अर्ब ५७ करोड रुपैयाँ छ । पूँजीकोष अनुपात १२.२० प्रतिशत छ । खराब कर्जा अनुपात ०.६५ प्रतिशत छ । आधार दर ७.९४ प्रतिशत छ ।

नबिपलको कस्ट अफ फण्ड ६.२० प्रतिशत, स्प्रेडदर ४.५ प्रतिशत र प्रतिसेयर आम्दानी ४८ रुपैयाँ छ ।

स्ट्याण्डर्ड चार्टर्ड बैंक

स्ट्याण्डर्ड चार्टर्ड बैंक नेपालले ६४ करोड ४१ लाख रुपैयाँ नाफा गरेको छ । गत आवको ३ महिनामा बैंकले ६० करोड ५९ लाख रुपैयाँ नाफा गरेको थियो ।

बैंकले गत असोज मसान्तसम्ममा ७५ अर्ब ८६ करोड रुपैयाँ निक्षेप संकलन र ५१ अर्ब ६८ करोड रुपैयाँ कर्जा तथा लगानी गरेको थियो ।

प्रकाशित मिति: आइतबार, मंसिर १, २०७६ १८:०२